Hatutan.com, (04 Maiu 2022), Díli-Peritu timoroan iha área informasaun no teknolojia (IT) Abílio Caldas, seidauk bele fó komentáriu ka koa’lia buat ruma bá mídia ka públiku kona-bá ninia envolvimentu iha ekipa investigadór bá deskobrimentu  kazu internet ilegál. 

Lee Mós : Kazu Internet Ilegál, Juridikamente Suspeitu Sira “Inosente”

Prezidente ANC, João Olívio Freitas, tuir julgamentu iha TDD kona-bá kazu internet ilegál. Foto/Dok. Espesiál

Abílio Caldas, timoroan ho espertu iha área IT servisu hamutuk ho  Polísia Nasionál Timor-Leste (PNTL) liuhosi Servisu Investigasaun Kriminál Nasionál (SIKN)  hodi halo deskobrimentu bá ligasaun internet ilegál hosi operadór telekomunikasaun balun ne’ebé akontese iha tinan 2020.

Iha operasaun maratona ne’ebé halo hosi PNSIK no envolve mós Abílio Caldas tempu ne’ebá hodi kumpre bá mandadu detensaun no apreensaun husi Tribunál Distritál Dili (TDD) bá operadór telekomunikasaun, hanesan Guardamor,  Jestór prinsipál iha Telemor,  Metrolink, Elite Computer, kompañia R2M IT Solution,  Prezidente Autoridade Nasionál Komunikasaun (ANC), João Olívio Freitas no seluk-seluk tan tanba deskonfia envolve iha ligasaun internet ilegál iha Timor-Leste.

Advertisement

Iha Kuarta (04/05/2022), Hatutan.com, kontaktu Abílio Carldas liu husi númeru WhatsApp atu Abílio Caldas bele fó justifikasaun bá nia envolvimentu hanesan investigadór hamutuk ho PNSIK hodi   ezekuta mandatu detensaun no apreensaun bá jerente ho operadór telekomunikasaun hirak-ne’e, infelizmente, Abílio Caldas  rejeita atu fó nia komentáriu tanba prosesu ne’e sei iha justisa nia liman no nia obedese bá segredu justisa. 

Lee Mós : Kazu Internet Ilegál iha Faze Rekolla Dokumentu

“Ha’u husu deskulpa, tanba ha’u iha hela juramentu bá segredu justisa nian, no prosesu sira la’o hela. Ha’u labele fó sai detallu liu bá prosesu sira ne’e, tanba ha’u bele hetan fali pena denúnsia katak fó sai segredu justisa,” Abílio Caldas hatán  bá Hatutan.com liuhusi mensajen WhatsApp.  

Abílio Caldas dehan, nia parte komprende tebes ho mídia ninia servisu kobertura bá kazu krime sira-ne’e, maibé nia labele fó sai informasaun ruma, tanba prosesu balu hosi kazu ne’e, tama ona iha Tribunál no julga ona.

“Ha’u nia intervensaun lubuk ida, antes ha’u entrevista iha televizaun, bele foti hosi ne’ebá, ne’e antes, agora, bá oin, ha’u labele denúnsia,” Abílio Caldas hateten.

Advertisement

Portavós Komandu Jerál PNTL, Superintendente Xefe Armando Monteiro. Foto/Hatutan.com

Iha sorin seluk, portavós Komandu Jerál PNTL, Superintendente Xefe Armando Monteiro dehan, iha instituisaun PNTL la’ós servisu mesak, maibé sempre servisu hamutuk ho parseiru sira sé de’it.

“Iha asuntu téknika balu ne’ebé mak presiza koordenasaun, komunikasaun di’ak liu, oinsá atu bele prodús provas ida-ne’e, hodi nune’e, reforsa bá finalidade investigasaun ida-ne’e, nune’e bele define estatutu ita-nia sidadaun ne’ebé mak komete iha krime,” Superintendente Xefe Armando Monteiro informa hodi responde Hatutan.com liuhusi konferénsia imprensa iha Kuartél Jerál PNTL, Díli.

Komandante Armando Monteiro afirma, kazu kona-bá internet ilegál ne’e, PNTL entrega ona bá Ministériu Públiku ne’ebé mak sai nu’udár na’in ka titulár bá asaun penál.

“Ita hein, sé enkuantu delegasaun kompeténsia ne’e sei mai mak ita bele kontinua. PNTL laiha kompeténsia atu ko’alia kona-bá kazu ida ne’ebé mak aprezenta ona bá ministériu públiku,” Armando Monteiro hateten.

Jornalista: Rogério Pereira Cárceres

Advertisement