Hatutan.com (04 Maiu 2022) Díli—Tribunál Distritál Díli (TDD) iha Kuarta 04 fulan ne’e, liu hosi alegasaun Ministériu Públiku (MP) ne’ebé reprezenta hosi Prokuradór Napoleão Soares da Silva husu ba Tribunál atu aplika pena adekuadu tuir konviksaun Tribunál nian ba Diretór Estabelesimentu Prizaun Gleno arguidu Nito Maria dos Santos ba krime abuzu de konfiansa agravadu.

Krime ne’e tanba la fó fila lezadu Abilio Mesquita nu’udár dadur nia sasan hanesan sintu ho folin $300, Ipad ho folin $700 inklui livriñu tolu.

Lee Mós:Diretór Prizaun Gleno Sai Arguidu Tanba La Entrega Dadur Nia Sasan

Razaun MP husu aplika pena adekuadu ne’e, tanba maski arguidu konfesa imparsiál durante audiénsia julgamentu, maibé kona-bá lezadu nia sasan arguidu laiha koñesimentu.

MP mós konsidera sirkustánsia hotu ne’ebé iha katak arguidu koopera di’ak ho justisa no foin primeira vez komete krime refere, tanba ne’e MP husu ba Tribunál atu aplika pena adekuadu tuir konviksaun Tribunál nian.

Maibé, parte Defensór Públiku ne’ebé reprezenta hosi Humberto da Costa husu ba Tribunál atu absolve nia kliente hosi krime abuzu de konfiansa agravadu tanba bazeia ba arguidu nia deklarasaun katak laiha koñesimentu kona-bá sasan lezadu nian liu-liu osan.

Antes ne’e, tuir akuzasaun hosi MP ho Numeru Criminal 0029/18 ERSIC katak, arguidu hanesan funsionáriu públiku no Diretór estabelesimentu prizaun Gleno.

Maibé, iha loron 23 fulan Abril tinan 2013 lezadu Abilio Mesquita nu’udár dadur ne’ebé muda hosi prizaun Becora ba fali prizaun Gleno, to’o iha prizaun Gleno tuir regulamentu prizaun katak dadur ka lezadu nia sasan hanesan sintu ho folin $300, Ipad ho folin $700, livriñu tolu tenki entrega ba autoridade guarda prizionál sira inklui dokumentu akordu dame entre dadur ne’e ho arguidu kona-bá kazu ne’ebé lori lezadu sai kondenadu.

Iha fulan Outubru tinan 2014, lezadu ne’ebé nuudár dadur iha prizaun Gleno ejize ba arguidu atu entrega lezadu ninia sasan sira ne’e.

Maibé, liu tiha semana ida arguidu entrega de’it lezadu nia osan $240 no sasan sira seluk la entrega ho razaun katak sasan ne’ebé bandu, tuir regras liu ona tinan rua tenke sunu nune’e lezadu nia sasan arguidu sunu ona.

Iha loron 06 fulan Novembru tinan 2017, bainhira arguidu ho lezadu ne’ebé nu’udár dadur mesak iha sala vizita prizaun Gleno arguidu hateten ba lezadu katak, “ita hakarak sai ka la’e, se hakarak sai keta ejize no ha’u prontu atu hatan iha Tribunál”.

Iha loron 07 fulan Novembru tinan 2017, Xefe operasionál prizaun Gleno Manuel de Deus ba loke lezadu nia odamatan hodi transfere fali lezadu hosi prizaun Gleno ba Prizaun Becora hodi hatama kedan lezadu ba sela “Bloc 4- Bloc Alto”, tanba konsidera halo krime foun iha prizaun laran.

Ho hahalok arguidu nian, MP akuza arguidu ba pratika krime abuzu konfiansa agravadu ne’ebé previstu iha artigu 257 hosi kódigu penál TL.

Audiénsia julgamentu prezide hosi Juiz kolektivu, Afonso Carmona, Ercilia de Jesus no Evangelino Bello, Ministériu Públiku reprezenta hosi Prokuradór Napoleão Soares da Silva, arguidu hetan asisténsia legál hosi Defensór Públiku.

Jornalista: Carmelita Isaac