Hatutan.com, (17 Maiu 2022), Díli—Governu liuhosi Ministériu Koordenadór Asuntu Ekonómiku (MKAE), iha Tersa 17 Maiu 2022, realiza ona lansamentu fatuk dahuluk ba projetu konstrusaun Timor Marina Square, ne’ebé ho projetu ne’e rasik bele konkretiza Timor-Leste ninia prioridade sira ba objetivu nasionál.

Serimónia lansamentu fatuk dahuluk ba projetu konstrusaun Timor Marina Square, iha Lecidere, Díli, Tersa (17/05). Foto/Média PM.

Lansamentu fatuk dahuluk ne’e hala’o hosi Primeiru Ministru (PM), Taur Matan Ruak, iha Lecidere, Díli.

Taur Matan Ruak hateten, VIII  Governu Konstitusionál define ona hanesan prioridade hodi diversifika ekonomia, liu-liu hodi promove inisiativa sira ne’ebé enkoraza no estimula kresimentu setór produtivu sira ne’ebé konsidera hanesan estratéjiku sira ba dezenvolvimentu nasionál nian, hanesan Turizmu, Agrikultura no Indústria sira ne’ebé transforma rekursu naturál no petrolíferu sira.

Konsagra mós nu’udár objetivu nasionál ne’ebé boot, hodi hamenus dependénsia ne’ebé demaziadu liu ba reseita sira Fundu Petróleu nian, no mós atu hamenus neineik pezu setór públiku nian iha ekonomia, liu hosi reforsu investimentu no inisiativa privada nian.

“Tanba ne’e, ho ksolok no satisfasaun boot, ohin loron ha’u partisipa iha Serimónia lansamentu fatuk dahuluk nian ba konstrusaun Timor Marina Square ne’ebé konkretiza prioridade sira nasaun nian iha prátika no iha posibilidade hodi kumpre objetivu nasionál sira ida ne’ebé boot ho projetu privadu ida, ne’ebé finansia hosi fundu internasionál sira ne’ebé posibilita aparesimentu operadór ekonómiku foun ida iha setór Turizmu nian,” Hatutan.com sita deklarasaun Primeiru Ministru (PM), Taur Matan Ruak iha  komunikadu.

PM Taur konsidera lansamentu fatuk dahuluk ba projetu ne’e marka inísiu hosi prosesu ida ba reabilitasaun urbana ne’ebé sei hala’o iha área importante ida-ne’e iha Largo Lecidere ho infraestrutura foun ida ne’ebé moderna, efisiente, sustentável iha nivel ekonómiku no ambientál.

Projetu ida ne’e, sei disponibiliza la’ós ba de’it servisu foun sira ba sidadaun, turista, investidór no emprezáriu sira ne’ebé vizita ita, liuhosi otél, restaurante, estabelesimentu komersiál no apartamentu sira, maibé mós oferta oteleira sira nasaun nian ne’ebé di’ak no kualidade servisu nian sira ne’ebé fó ba ita-nia utente sira.

Projetu ida ne’ebé marka ritmu kreximentu no progresu nian ne’ebé ita dezeja ba nasaun, ho inovasaun barak liu, kriatividade barak liu, empreendedorizmu privadu barak liu, hodi estimula aparesimentu jerasaun trabalhadór foun ida ne’ebé kualifikadu no operadór ekonómiku sira.

“Investimentu ida ne’ebé kontribui duni ba objetivu boot sira Governu nian no ne’ebé mak ezije husi ita-nia sidadaun sira, liu-liu joven sira, ne’ebé buka oportunidade foun sira kona-ba formasaun no empregu nian, ne’ebé bele hasa’e ninia abilitasaun no kompeténsia sira, nomos fonte sira rendimentu nian, moris-di’ak no kualidade moris nian. Kompleksu Timor Marina Square reprezenta kresimentu no modernu ne’ebé ita hakarak tebes ba ita-nia nasaun,” Taur Matan Ruak hateten.

Investimentu ida-ne’e ho valór orsamentu millaun $50, eskluzivamente privadu, investe ona iha TL, ne’ebé hatudu kompromisu no konfiansa hosi investidór esternu sira, ba TL nia futuru ne’ebé koletivu. 

Timor-Leste nasaun ida ne’ebé akolledór, seguru no pasífiku ho oferta sira diferente no potensialidade sira iha setór turizmu, agrikultura, peska, indústria, komérsiu no servisu nian sira, ne’ebé sei fó benefísiu ba komunidade ho prezensa hosi polu foun ida-ne’e ba dezenvolvimentu urbana.

Ho inisiativa ida-ne’e sei kria 170 empregu imediatu diretu, ne’ebé sei realiza obra sira konstrusaun nian. Tuirmai, durante faze operasionál sei kria empregu 250 ne’ebé liga diretamente ba projetu.

“Ita fiar katak ho prezensa infraestrutura ida-ne’e iha Lecidere, Dili, sei loke oportunidade foun empregu no negósiu nian sira, hodi hamosu vaga sira atus ba atus iha servisu sira apoiu nian, iha transporte, iha komérsiu, iha lojístika no iha servisu tékniku-finanseiru sira,” PM Taur espressa.

Investimentu ida-ne’e, loke mós oportunidade foun sira ba formasaun no kapasitasaun institusionál, ne’ebé hodi uza prátika sira ne’ebé di’ak liu ba atendimentu no servisu internasionál sira, sei hasa’e padraun no nível kualidade nian iha oferta indústria Otelaria Timor-Leste nian.

“Tanba ne’e, ha’u hakarak agradese ba reprezentante husi Empreza Timor Marina Square S.A., no ba CEO hosi Empreza “A-Smart Holdings Ltd”, Exelentísimu Sr. Liam Huan Chiang, ba investimentu ne’ebé realiza iha Timor-Leste no iha Timoroan sira, hodi renova ita-nia disponibilidade atu kontinua servisu hamutuk hodi konkretiza projetu ida-ne’e no projetu investimentu nian sira seluk,” nia agradese.

Agradese mós ba koordenasaun investimentu nian ne’ebé realiza hosi Ministru Koordenadór Asuntus Ekonómikus (MKAE), Joaquim Amaral, nomós servisu sira ne’ebé hala’o hosi funsionáriu, tékniku no espesialista sira, ho supervizaun hosi Ajénsia TradeInvest Timor-Leste I.P.

“Ikus-liu, hakarak tranzmite ha’u-nia apresu ba hotu-hotu ne’ebé kontribui ona ba konkretizasaun hosi investimentu ida-ne’e, ne’ebé onra tebes no hana’i ita. Parabéns ba ita hotu ba lansamentu fatuk dahuluk hosi kompleksu ne’ebé sei sai otél, komérsiu no apartamentu sira Timor Marina Square nian,” Taur Matan Ruak hateten tán.

Jornalista: Rogério Pereira Cárceres