Hatutan.com, (19 Maiu 2022), Díli– Prezidente Repúblika sesante, Francisco Guterres “Lú Olo” husu  bá prezidente eleitu José Manuel Ramos-Horta, atu servisu hamutuk ho órgaun soberanu seluk bá normalizasaun sistema politika atu kombate korrupsaun no abuzu  podér.

Lee Mós : Ramos-Horta ho Alkatiri Hasoru-Malu Ko’alia Estratéjia Hamenus Povu Nia Terus

Prezidente Repúblika, José Ramos-Horta. Foto/Hatutan.com

Francisco Guterres “Lú Olo” iha nia diskursu ikus hanesan Prezidente Repúblika Timor-Leste periodu 2017-2022 bá serimónia investidura Prezidente  Repúblika foun ho mandatu 2022-2027 hateten, mandatu Prezidente Repúblika nian ne’ebé termina ho atensaun tomak bá povu, Estadu no nasaun nia moris tuir prinsípiu Konstitusionál, legalidade no etika polítika iha kuadru jurídiku ida tuir konviksaun atu konsolida pás no estabilidade nasionál hodi fortalese instituisaun demokratiku sira hodi reforsa sistema justisa ho baze ba dezenvolvimentu nasionál.

Konsiente ho difikuldade sira hotu no impase politíka iha sirkunstánsia hotu ne’ebé enfrenta, maibé buat hotu rekuperadu ho di’ak tuir lei no  desizaun komplexa liu iha nia mandatu mak deklarasaun Estadu emerjénsia hodi suspende direitu no liberdade fundamentál no ida-ne’e tenke halo dunik atu Estadu poupa ka salva vida umana sidadaun sira-nian hanesan rikusoin umanu.

Iha periodu sira nune’e iha diálogu ho Xefe Governu, Konsellu Estadu no Konsellu Superiór Defeza no Seguransa no ho partidu polítiku hotu ne’ebé hetan asentu iha Parlamentu Nasionál tuir konstituisaun haruka no hamutuk ho konfisoins relijiozu, organizasaun polítika no síviku sira.

“Diálogu no kooperasaun ho órgaun soberania sira seluk hanesan funsaun regular Prezidente Repúblika atu hamutuk buka mellora kondisaun no  prioridade sira bá interese nasionál no bem estar nasaun nian,” Lú Olo hateten.

Serímonia investidura Prezidente Repúblika, José Ramos-Horta iha Tasi Tolu, Dili, 19 Maiu 2022. Foto/Hatutan.com

Timor-Leste hanesan nasaun soberanu no demokratiku, garante prinsípiu valores Estadu direitu demokratiku ne’ebé konsagra ona iha Konstituisaun RDTL ne’ebé reflete Timor-Leste nia istória, identidade no objetivu ukun rasik an.

Lú Olo fiar katak Xefe Estadu  sei asegura solidariedade institusionál no interdependénsia funsaun entre órgaun soberanu sira, mezmu iha separasaun podér atu bele konsolida pás, estabilidade no unidade nasionál no luta bá progresu ekonomia no ekuidade planu ekonomia no sosiál hodi projeta Timor-Leste bá esperansa iinternasionál.

“Partisipasaun sidadaun iha prosesu politika, ekonomia, sosial no kultural  hodi asegura progresu dezenvolvimentu ne’ebé asentua ho reseita Estadu nian hodi promove edukasaun, saúde, abitasaun sosiál no salubridade publika ba benefísiu povu hotu nian,”  Lú Olo tenik.

Ikus liu husi diskursu Lú Olo dehan, nia kontinua  hatudu nia prontidaun atu nafatin servisu hamutuk ho prezidente eleitu no iha kolaborasaun mútua atu iha solidariedade fraterna bá povu nia moris hodi fó pasu foun atu hasoru dezafiu sira iha pais, rejionál no dezafiu sira ne’ebé mundu enfrenta.

Horta promete kumpre konstituisaun

Prezidente Repúblika José Ramos-Horta períodu 2022-2027 promete sei kumpre Konstituisaun no servisu hamutuk ho órgaun soberanu hotu, atu buka solusaun ba povu nia moris hodi hakbiit ekonomia nasaun nian ne’ebé oras ne’e iha frajilidade nia laran kauza husi pandemia global no funu entre nasaun Rússia no Ukránia iha Europa.

Horta afirma sei halo buat hotu tuir konstituisaun hodi próteze liberdade sidadaun sira nian no defende justisa sosial no valores umanu sira bá identidade nasionál no iha sentidu inkluzaun bá povu Timor-Leste.

“Hanesan Prezidente Repúblika ha’u sei hakaruk no halo tuir Konstituisaun no atentu bá lei  fundamental hotu ne’ebé hatuur valór fundamental no reflete bá nasaun no povu nia moris di’ak.” José Ramos-Horta hateten.

Horta sai prezidente bá povu tomak liu husi eleisaun ida ne’ebé lao demokratiku tebes tamba ne’e promete no kompromete atu sai prezidente bá povu hotu la’ós de’it povu ne’ebé fó votu bá nia iha eleisaun.

Xefe Estadu ne’e mós aproveita oportunidade hodi hato’o agradesimentu bá povu no bainaka sira hotu husi nasaun viziñu, pais amigu no enviadu espesiál hotu ne’ebé marka prezensa iha fatin historiku Tasi Tolu bá serimónia tinan 20 restaurasaun independénsia  no ninia investidura nu’udár Xefe Estadu foun Timor-Leste bá períodu 2022-2027.

Jornalista: Vito Salvador