Hatutan.com, (23 Maiu 2022), Díli—Timor-Leste foin selebra tinan 20 restaurasaun independénsia, iha dezafiu no oportunidade lubuk ne’ebé sai sasukat ba susesu iha mundu nia matan.

Sekretáriu Jerál g7+, Helder da Costa. Foto/g7+.

Atu haree dezafiu no oportunidade sira ne’ebé sai hanesan sasukat ba susesu Timor-Leste nian iha mundu nia matan maka, Organizasaun g7+ ho Universidade Nasionál Timor Lorosa’e (UNTL) organiza semináriu internasionál ho tema “Timor Leste: Two Decades of Peace Building And Statebuilding; Challenges and opportunities” hodi halibur ideia hosi péritu nasionál no internasionál hodi foti lisaun ne’ebé sei partilla atu bele dezenvolve Timor Leste di’ak liután.

Lee Mós: g7+ Kongratula Eleisaun Prezidensiál iha TL La’o ho Trankuilidade

Konferénsia internasionál ida-ne’e, hodi selebra mós tinan 20 restaurasaun independénsia no g7+ hamutuk ho UNTL konsiente katak, to’o ona tempu Timor-Leste hamutuk ho oradór nasionál no internasionál hotu halo reflesaun no balansu kona-bá trazitória dezenvolvimentu Timor-Leste nian durante tinan 20, lisaun saida mak Timor Leste aprende, saida mak halo ona no saida mak Timor Leste sei aplika iha futuru.

Objetivu loloos hosi semináriu ne’e atu fahe esperiénsia ba malu, nune’e bele haree ba Timor-Leste nia lisaun saida mak bele partilla ho nasaun sira seluk.

“Semináriu ne’e sei harer parte rua importante tranzitóriu sósiu ekonomia liuliu dezenvolvimentu sósiu ekonómiku iha Timor Leste no ida seluk maka pozisionamentu Timor Leste nian iha mundu internasionál. Ema barak mak admira ho Timor-Leste tanba foin tinan 20 restaura nia independénsia maibé buat barak mak halo ona maski iha dezafiu barak ne’ebé enfrenta,” Sekretáriu Jerál g7+, Helder da Costa hateten ba Jornalista sira iha sala auditóriu, kampus UNTL, Hera, Segunda (23/05/2022).

Timor-Leste iha ninia lideransa vizionáriu no ho sira nia atitude ba hala’o rekonsiliasaun ho Indonéziu ne’ebé ohin loron sai modelu no ezemplár iha mundu inklui  Timor-Leste rasik.

“Timor-Leste tenke kontinua nafatin projeta nia imajen iha rai-liur tanba Timor-Leste koñesidu iha mundu nu’udár pais amante da pas, pais ida ne’ebé ema bolu iha ingles “Peace Loving Country” tanba ne’e maka hanesan timoroan fó-liman hamutuk,” nia husu.

Reitór UNTL, João Martins hateten Timor-Leste  foin mak selebra tinan 20 restaurasaun independénsia no nia prosesu kontrusaun estadu g7+ no UNTL organiza hamutuk konferénsia ida-ne’e atu haree oinsa Timor Leste  nia konstrusaun da pás ne’ebé la’o durante tinan 20 nia laran hodi haree mós dezafiu saida mak Timor-Leste atravesa, oportunidade saida mak sei mai atu Timor Leste  bele halo konstrusaun ida di’ak ba nia sosiedade no nasaun.

Semináriu ne’e hala’o durante loron ida, ne’ebé loke hosi Prezidente Repúblika José Manuel Ramos-Horta, no partisipa hosi estudante UNTL, membru Governu, diplomata sira, sosiedade sivíl no seluk tan.

Jornalista: Vito Salvadór