Hatutan.com (26 Maiu 2022), Díli— Komisariu Comissão Anti-Corrupção (CAC) Sérgio Hornai reafirma ba servidór Estadu tomak iha territóriu Timor-Leste katak, Funsionáriu Públiku (FP) ne’ebé asume kargu Xefia sira ne’ebé uza nafatin karreta Estadu ba uma, kontra Rezolusaun Governu númeru 130/2021 de 29 de Setembru kona-bá Gestao e Realocação de Veicolos do Estado no uza patrimóniu Estadu.

Funsionáriu Públiku asume kargu xefia uza karreta Estadu la tuir oras no loron servisu nian sei hetan kondenasaun ho Lei Medidas Prevensaun no Kombate Korrupsaun (MPCC) artigu 83 no Kídigu Penál artigu 296 – Pekulatu de Uzu.

Lee Mós:Lei MPCC Obriga Ajente Públiku Deklara Rikusoin

Advertisement

Funsionáriu Públiku ne’ebé utiliza sala karreta Estadu bainhira tama iha infrasaun hosi operasaun Ekipa Fiskalizasaun Konjunta (EFK) nian, mak sei tuir prosesu kriminál no kontra artigu 83 hosi lei Númeru 7/2020 MPCC no Kódigu Penál artigu 296 Pekulatu de Uzu ho moldura pena prizaun tinan rua (2) no lakon oportunidade assume kargu ruma iha ezersísiu funsaun públika nian.

“Rezolusaun ne’e prevalese no proibidu ba Funsionáriu Públiku ho kargu xefia hosi diretór, diretór jerál no sekretáriu ezekutivu sira ne’ebé hala’o knaar iha instituisaun públiku atu la uza karreta Estadu iha fora oras servisu nian inklui motoristas la ba tula iha uma iha oras dadersan tama servisu no lori fila ba uma bainhira fila hosi servisu iha oras lorokraik,” Hatutan.com sita deklarasaun Komisáriu Sérgio Hornai iha komunikadu, bainhira hetan entrevista hosi Jornalista Rádiu Televizaun Timor-Leste (RTTL).

Funsionáriu Públiku assume kargu xefeia sira uza karreta Estadu bainhira hala’o servisu Estadu nian no hetan autorizasaun.

Bainhira la hetan autorizasaun hosi superiór sira, maka Funsionáriu Públiku sei simu konsekuénsia todan administrativamente no kriminalmente.

Ne’e tamba, Funsionáriu Públiku assume hela kargu xefia hetan ona subsídiu ne’ebé hatu’ur ona iha Dekretu Lei Númeru 21/2021 10 Novembru kona-bá Cria Subsidio Mensal de Transporte iha ne’ebé oras ne’e aplika ona ba iha funsionáriu órgaun titulár no kargu xefia sira iha instituisaun públiku.

Advertisement

Funsionáriu Públiku sira ne’ebé simu ona subsidiu hosi Estadu mensalmente, labele uza tan karreta Estadu bainhira dadersan mai servisu fatin durante rekreiu iha meudia no (motoristas tula) fila sira ba uma iha tempu lorokraik sai servisu nian tanba “Ida ne’e prohibidu”.

“Anounser iha servisu ruma ne’ebé iha relasionamentu ho sira ninian servisu no hetan órden hosi superiór ba utilizasaun viatura ne’ebé halo justifikasaun ho karta autorizasaun,” nia hateten.

CAC hamutuk ho instituisaun relevante ne’ebé estabelese tiha ona Ekipa Fiskalizasaun Konjunta (EFK) kompostu hosi CAC, Diresaun Nasional Transporte Terrestre (DNTT), Polisia Nasional Timor-Leste (PNTL) Tránzitu, Patrimonio Estadu no Comissão Função Publica (CFP) kontinua hala’o operasaun ba utilizasaun viatura Estadu nian iha territóriu Timor-Laran tomak.

Operasaun EFK nian sei kontinua atu bele limiti sirkulasaun no utilizasaun viatura Estadu nian iha oras servisu vinkula ona iha rezolusaun governu númeru 130/2021.

Iha mós FP malandru balun ne’ebé simu tiha ona subsidiu ba kargu xefia nian, maibé parte lojistika liñas ministeriais sei kontinua fo karreta Estadu hodi halo sirkulasaun iha fora oras servisu nian no EFK toman halo prosesa adinistrativa no kriminál.

Advertisement

Funsionáriu Públiku  sira kontra rezolusaun ne’e, tama iha infrasaun operasaun EFK nian no Komisaun prosesa ona iha ne’ebé balun ninian kazu iha ona Ministériu Públiku hodi tuir prosesu judisiáriu.

“Rezolusaun governu la mai atu hafraku maibé halo disiplina liu tán iha utilizasaun patrimóniu Estadu ho di’ak no ho responsabilidade ba prestasaun interese públiku ninian,” Komisáriu subliña.

Jornalista: Carmelita Isaac

Advertisement