Hatutan.com, (16 Marsu 2023), Dili—Parlamentu Nasionál (PN), re-ajenda data eleisaun bá Komisáriu foun Comissão Anti Corrupção (CAC) nian, iha Segunda 20 Marsu 2023.
Molok ne’e, Parlamentu Nasional rasik ajenda ona data eleisaun bá komisáriu foun CAC nian dala-rua, maibé bankada opozisaun sempre auzénsia iha plenária, tanba ne’e seidauk realiza eleisaun ho razaun la prienxe kuorum.

Lee Mós: Hili Komisáriu CAC Foun Presiza Konsensu Bankada Parlamentár

“Prezidente PN ohin halo konkluzaun katak, deputadu sira hosi bankada sira laiha entendimentu, maibé ida-ne’e la taka dalan ba meza atu ajenda nafatin eleisaun ida-ne’e. Tanba ne’e, segunda semana oin iha nafatin eleisaun,” Sekretária PN, Deputada Lídia Norberta hateten hafoin reuniaun lider bankada sira iha Uma-fukun, Kinta (16/03/2023).

Foin lalais, Deputadu sira hosi bankada FRETILIN ho CNRT halo ona konsultasaun bá malu, oinsá bele iha konsensu ida bá kandidatu ne’ebé Governu propoin bá Komissáriu foun CAC.

Maibé, ida-ne’e mós hanesan halo de’it konsultasaun bá malu no seidauk iha desizaun ruma, konkorda ka la’e.

“Bankada FRETILIN ohin sira pronúnsia dehan katak, ida ne’e iha Lei. Sé ita bá haree Lei CAC nian ne’e iha ne’ebá, determina kedan katak, inisiativa ne’e mai hosi Governu. Tanba ne’e, sira labele pronunsia buat ida,” Lídia Norberta hateten.

Rekezitu atu hala’o eleisaun bá kandidatu komissáriu foun CAC, nesesita deputadu mínimu 49 no másimu 50.

Maibé iha sala plenária, deputadu sira la prienxe 49 tanba presiza deputadu 49 maka foin halo eleisaun.

Komissáriu CAC, Sérgio Hornai eleitu iha 2019 no posse iha loron 21 fulan-Janeiru 2019 bá mandatu tinan-haat (4) no termina iha loron 21 fulan-Janeiru 2023.

Ho mandatu ne’ebé konklui ona ne’e, Kuarta 25 fulan-Janeiru 2023, Governu liuhosi sorumutu iha Konsellu Ministru, aprova tiha ona projetu proposta rezolusaun Governu nian hodi propoin eis Prokuradór Jerál Repúblika (PGR-sigla portugés), José Ximenes bá Komisáriu CAC.

Projetu proposta rezolusaun ida-ne’e aprezenta hosi Primeiru Ministru (PM), Taur Matan Ruak, bá dezignasaun hosi Komisáriu CAC, bá mandatu tinan-haat, tuir rejime eskluzividade no foin lalais, Governu aprezenta ona bá PN hodi bele halo votasaun bá kandidatu ne’ebé Governu rasik propoin tiha ona.

Jornalista: Rogério Pereira Cárceres