Hatutan.com, (29 Maiu 2022), Díli—Komité Sentrál FRETILIN (CCF, sigla portugés), Sábadu to’o Domingu (28-29/05/2022), hala’o reuniaun alargada iha salaun Canossa, Has Laran, Díli, hala’o análiza profunda no debate ida ne’ebé mak kle’an no deside hodi aprova rezolusaun haat.

Rezolusaun ne’e mak hanesan;

1. Rezolusaun kona-bá desizaun konsensual hodi prosede bá eleisaun lideransa partidu bá mandatu tuir mai liu husi V Kongresu Nasional.
2. Rezolusaun atu konvoka no halo ajenda ba V Kongresu Nasional ba loron-8 to’o loron-10 fulan-Setembru 2022, ho anúnsiu ofisial órgaun sendal eleitu bá loron 11 fulan Setembru, loron komemorasaun tinan 48 hosi disolusaun ASDT no kriasaun FRETILIN.
3. Rezolusaun seluk tan, mak elojia Presidente partidu FRETILIN, Francisco Guterres “Lú Olo” tamba dezempeñu ho korajen no sabedouria durante mandatu nu’udár Presidente Repúblika husi 2017 to’o 2022.
4. Rezolusaun ida seluk hodi kongratula Sekretáriu Jerál partidu FRETILIN, Mari Alkatiri bá lideransa ho barani no determinasaun bá partidu FRETILIN durante tinan-lima ikus, ho auzénsia temporáriu Prezidente partidu husi atividade partidária.

Reuniaun alargada partidu FRETILIN durante loron-rua, Sábadu-Domingu (28-29/05/2022), iha Canossa, Has Laran, Díli. Foto/Mídia FRETILIN

Sorumutuk ne’ebé lidera husi prezidente FRETILIN, Francisco Guterres “Lú Olo”, nu’udár mós reuniaun dahuluk ne’ebé mak Francisco Guterres “Lú Olo” prezide hafoin fila fali bá ativu iha CCF hodi asume fila fali ninia kna’ar polítika iha FRETILIN depois  hakotu ninia misaun nu’udár Prezidente  Repúblika iha tinan lima  (2017-2022).

Liuhusi komunikadu ne’ebé Hatutan.com asesu relata katak iha abertura sorumutuk ne’e, Lú Olo esplika katak CCF halibur atu ko’alia kona-bá tranzisaun lideransa FRETILIN nian no atu haree forma  lejitimidade ne’ebé mak FRETILIN atu opta bá halo prosesu ida ne’e atu la’o bá oin.

Biban ne’e, Sekretáriu Jerál FRETILIN, Mari Alkatiri hateten iha nia intervensaun katak FRETILIN ninia prosesu eleisaun bá lideransa FRETILIN nian hala’o ona liu husi maneira oin-oin hanesan eleisaun iha kongresu no eleisaun direita.

“Iha Kongresu Nasional FRETILIN 2006, ita deside hodi halo desizaun atu hili lideransa másimu FRETILIN nian ho brasu no ar. Ita halo ida-ne’e iha konjuntura no kontextu polítika ida. Iha 2011, ita deside hodi hala’o eleisaun direita ba hili lideransa FRETILIN, iha konjuntura no kontextu oin-seluk ida. Ohin loron, ita iha konjuntura no kontextu polítika ne’ebé mak diferente mós,” Mari Alkatiri hateten.

Lere Anan Timur partisipa iha reuniaun alargada FRETILIN. Foto/Mídia FRETILIN

Iha sorumutuk ne’e partisipa mós Lere Anan Timur, membru segunda Jerasaun CCF, ne’ebé partisipa iha reuniaun nu’udár konvidadu espesiál.

Lere Anan Timur iha nia intervensaun husu atu CCF konta mós ho nia hodi servisu hamutuk halo boot partidu FRETILIN.

“Konta mós ho ha’u, hamutuk ho maun Sekretáriu Jerál, Prezidente Partidu, ita sei servisu atu halo boot liután FRETILIN,” Lere Anan Timur tenik.

Iha sorumutuk ne’e, CCF rona mós aprezentasaun ida husi Komisaun Nasional Preparasaun no Organizasaun (KNPO) kona-bá sondajen interna ida relasiona ho eleisaun bá lideransa FRETILIN, progresu serbisu tékniku no polítiku sira ne’ebé mak hala’o ona bá kongresu nasionál no eleisaun lideransa FRETILIN nian no mós kalendáriu programa no atividade FRETILIN nian bá to’o Kongresu Nasional.

Membru CCF sira mós halo debate no análize kle’an kona-bá eleisaun prezidensiál ronde rua ne’ebé foin liubá no situasaun polítika atuál, hodi haree mós área sira ne’ebé presiza reforsa no hadi’a hodi bele hakat bá oin forte no unidu liután.

Jornalista : Rogério Cárceres