Hatutan.com, (31 Maiu 2022), Díli—Prezidente Repúblika (PR), José Manuel Ramos-Horta promete sei komunika ho nasaun Xina atu lori hikas estudante bolseiru Timoroan sira ba kontinua sira nia estudu.

Porta-vos ATSC, Dircio Francisco Xavier Fátima Xavier hamutuk ho nia kolega sira ko’alia ba média hafoin audiénsia ho Xefe Estadu José Manuel Ramos-Horta iha Palásiu Prezidensiál Nicolau Lobato Bairru-Pité, Tersa (31/05/2022). Foto/Média PR.

Tanba ne’e Xefe Estadu husu mós ba estudante Timoroan sira ne’ebé halibur an iha Asosiation of Timorense Student in China (ATSC), atu kontinua luta ba sira nia futuru no labele deziste ho situasaun ne’ebé iha.

Lee Mós: Prezidente Xina Promete Bá Ramos-Horta Hametin Kooperasaun Bilateral

“Xefe Estadu promote atu kontinua komunika ho Governu no entidade relevante sira atu fasilita estudante timoroan sira fila ba kontinua estudu iha Xina. Ida seluk maka fasilita estudante sira finaliza sira nia estudu liu hosi aula online ka meius seluk ne’ebé posível atu tulun estudante sira finaliza sira nia kursu iha universidade,” Porta-vos ATSC, Dircio Francisco Xavier Fátima Xavier hateten,hafoin hasoru-malu ho Prezidente Repúblika José Ramos Horta iha Palásiu Prezidensiál Nicolau Lobato Bairru-Pité, Tersa (31/05/2022).

Durante hasoru-malu ne’e ATSC relata problema, difikuldade no dezafiu sira ne’ebé estudante bolseiru sira ne’ebé estuda iha nasaun Xina hasoru.

Estudante hirak ne’e husu atensaun hosi Xefe Estadu no apoiu atu bele ajuda mós estudante sira nia regressu hodi fila ba nasaun Xina nune’e kontinua sira nia estudu.

Durante Timor-Leste no mundu tomak enfrenta pandemia global ne’ebé halo voo internasional sira paradu no situasaun sira ne’e difikulta tebes estudante sira atu fila ba Xina.

Problema internet sai mós difikuldade ba estudante sira atu bele frekuenta aula online tanba ne’e ATSC deside mai hasoru Xefe Estadu atu bele ko’alia ho parte relevante sira hodi fó mós solusaun ba difikuldade hirak ne’e.

“Iha kursu balun rekere estudante sira tenke halo pratika iha laboratóriu no ospitál. Entaun, ida-ne’e sai hanesan dezafiu tanba iha Timor laiha laboratóriu atu ami hala’o pratika no situasaun ne’e difikluta ami atu finaliza ami nia estudu tuir tempu ne’ebé determina ona,” Dircio Francisco Xavier Fátima Xavier hateten.

Difikuldade ne’ebé estudante sira enfrenta hodi labele fila ba nasaun Xina atu kontinua estudu tanba kustu ba karantina iha Xina as liu nune’e estudante sira ne’ebé oras-ne’e iha Timor-Leste seidauk bele fila tanba ekonomikamente atu selu karantina iha Xina kbiit la to’o.

Prezidente asosiasaun ATSC Esmeraldito Fereira esplika razaun tolu ne’ebé obriga estudante bolseiru Timoroan sira iha nasaun Xina fila mai Timor-Leste, ida maka renovasaun ba pasaporte tanba iha Xina labele halo renovasaun.

Prezidente Repúblika (PR), José Manuel Ramos-Horta hamutuk ho estudante bolseiru Timoroan sira ne’ebé hala’o estudu iha Xina. Foto/Média PR.

Nune’e, estudante sira tenke fila mai Timor-Leste atu halo renovasaun tanba bainhira la halo renovasaun sei hetan deportasaun husi Estadu Xina no bainhira estudante sira iha ona Timor-Leste ba halo renovasaun hotu atu fila pandemia Covid-19 tama nune’e, difikluta sira labele fila hikas ba Xina atu kontinua estudu.

Razaun segundu, tanba ferias ba tempu malirin nian (winter Holiday’s) nune’e bainhira estudante sira fila mai pasa férias ho familia, pandemia tama no sira la konsege fila.

Razaun ida ikus liu maka estudante sira fila mai Timor-Leste tanba kauza hosi pandemia Covid-19 ne’e rasik no universidade sira rasik mak husu atu estudante sira hosi nasaun seluk ne’ebé sei estuda iha Xina obrigatoriamente tenke fila ba sira nia nasaun orijen.

“Ho situasaun no difikuldade sira ne’ebé estudante bolseiru sira enfrenta durante ne’e halo estudante lubuk ida mak deziste no la kontinua sira nia estudu liuliu ba estudante sira ne’ebé foti área estudu iha medisina no enjiñaria. Maski iha aula online maibé prátika laiha tanba fasilidade liuliu laboratóriu rasik iha Timor Leste seidauk iha kondisaun di’ak hanesan Xina,” Esmeraldito Ferreira hateten.

Parte asosiasaun antes ne’e iha ona komunikasaun ho parte governu maibé to’o oras-ne’e seidauk iha rezultadu.

Totál estudante Timoroan ne’ebé oras-ne’e sei iha Timor-Leste no seidauk fila ba kontinua estudu iha Xina hamutuk 130 no maioria estudante sira ne’e hetan bolus estudu hosi governu Xina.

Bolseiru hirak ne’e foti kursu iha área espesializada lubuk ida hanesan medisina jerál, enjiñaria, direitu, relasaun Internasionál no mós iha área ekonomia jestaun no sosiál inklui sira seluk.

Jornalista: Vito Salvadór