Hatutan.com (01 Juñu 2022), Díli—Afiliada IFJ, AJI Sindikasi, CJA, TPLU, NUJP no NUJM espressa sira nia preokupasaun liga ho númeru ass hosi índise violénsia kontra jornalista no sivíl sira durante rejime junta militár iha podér Mianmar.

Kongressu inaugural Federasaun Jornalista Ásia-Pasífiku (FAPaJ) iha Masct, Omã, iha loron 31 fulan maiu tinan 2022. Foto/TLPU.

Desde golpe militár tinan 2021, jornalista sira iha Mianmar hetan difikuldade hodi asesu ba informasaun no deklarasaun fonte sira nian.

Lee Mós: Kongresu IFJ Toka Makás Kona-bá Krime Kontra Jornalista

Nune’e mós, komunikasaun ho jornalista lokál sira iha Mianmar mós luta ba motivu hosi limitasaun atu asesu ba internet hosi Junta Militár.

Preokupasaun ne’e hato’o durante Kongressu inaugural Federasaun Jornalista Ásia-Pasífiku (FAPaJ) iha Masct, Omã, iha loron 31 fulan maiu tinan 2022.

Preokupasaun ne’e submete hosi Aliança de Jornalistas Independentes (AJI) e SINDIKASI (Indonésia), Associação de Jornalistas do Camboja (CamboJA) no União de Imprensa de Timor Leste (TLPU).

Jornalista sira iha Mianmar hetan presaun no intimidasaun, tantu fízika nune’e mós verbál. Hosi golpe fulan fevereiru tinan 2021 to’o loton 31 fulan marsu 2022, pelo menus jornalista no funsionáriu média nian na’in 122 mak prezu ona, inklui jornalista estranjeiru hosi Associated Press (AP) no Hosi BBC ne’ebé mak relata kondisaun iha Mianmar.

Na’in 48 Hosi sira iha hela detensaun nia laran no 22 kondenadu ona. Iha mós jornalista ida ne’ebé mate sob custódia.

Jornalista sira hetan prezu tanba iha rede sosiál, iha sira nia telemóvel no asesu ba rede privada virtuál (VPN).

Rejime refere akuza ona jornalista no funsionáriu média nian na’in 45 viola sesaun 505.ª Hosi Código Penal (disposisaun foun ne’ebé criminaliza comentáriu hirak ne’ebé “kauza tauk”, disemina “notícia falsa sira ka ajita direta ka indiretamente ba ofensa kriminál kontra funsionáriu governo ida”).

Além de ne’e, meios de comunicação 12 hetan akuzasaun ho baze ba Sesaun 505.ª Hosi kódigu penál Mianmar nian, sira hetan sira nia lisensa revoga ka rua ne hotu.

Rejime militar mós taka tiha média sosiál sira, inklui Twitter, Instagram no Facebook, além de hamate Internet sistematicamente iha tinan sira ikus ne’e; difikulta acesso ba informasaun. Além de ne’e, regime elabora ona lei foun ida kona ba segurança cibernética hodi prende qualquer pessoa ne’ebé asesu ba sites proibidu liu Hosi rede privada virtual sira.

Restrisaun informasaun hirak ne’e la rezulta kobertura ida ne’ebé ekuilibrada enkuantu situasaun iha Mianmar sai aat liu t’an.

Gerra civil sira nakfera iha rai laran. Agénsia refujiadu ONU, ACNUR, anunsia iha fevereiru katak númeru Hosi dezlokadus Hosi rai laran liu ona rihun atus ualu.

Asaun hirak ne’e klaru, hanesan violasaun ba direitus humanus ba liberdade imprensa no espresaun, nune’e mós hanesan supresaun ba direitu ba informasaun ne’ebé mak loloos tenke simu Hosi públiku.

“Ho razaun ne’e, ami enkoraza IFJ atu apela ba governu iha mundu tomak, espesialmente nasaun membru ASEAN sira, atu rejeita junta militár. Nasaun sira loloos labele fó espasu ba violênsia hasoru direitus humanus, jornalista no sivíl,” Hatutan.com sita komunikadu.

Além de ne’e, IFJ mós tenke pressiona junta militár atu garante protesaun no seguransa jornalista sira nian durante hala’o kobertura ba akontesimentu polítiku iha Mianmar, nune’e mós impede hahalok violênsia no prizaun kontra jornalista no sivíl sira.

Jornalista: Vito Salvadór