Hatutan.com (01 Juñu 2022), Díli—Comissão Anti Corrupção (CAC) sei kontinua halo prosesu investigasaun liu hosi ezame telefónika ba kazu krime abuzu podér no partisipasaun ekonómika iha negósiu ne’ebé akontese iha Rejiaun Administrativa Espesiál Oecusse Ambeno (RAEOA).

Ekipa Investigadór CAC hala’o investigasaun iha rezidénsia MN iha Sikluli, RAEOA.Foto/Dok.CAC.

Prosesu halo ezame telefónika ne’ebé sei hala’o durante loron 20 nia laran hodi kompleta investigasaun ba kazu ne’e.

Lee Mós: Kazu Abuzu Podér iha RAEOA, CAC Konstitui Arguidu Na’in-rua

“Kona-bá abuzu de podér ne’ebé akontese iha RAEOA, daudaun ne’e seidauk finaliza tanba Ministériu Públiku Oecusse haruka halo tán ezame telefónika hodi kompleta investigasaun. Tanba ne’e, daudaun iha hela faze ezame telefónika,” Diretór Jerál Investigasaun CAC, José Verdiál  hateten ba Hatutan.com iha Díli, Kuarta (01/06/2022).

Iha kazu ne’e, CAC rona ona sasin na’in 10 resin hodi konstitui arguidu na’in-rua ne’ebé involve direitamente iha kazu ne’e.

Iha ezame telefónika ne’e, CAC sei iha tempu loron 20 hodi termina prosesu investigasaun no sei remesa rezultadu ba MP hodi haree no halo akuzasaun.

Tanba ne’e, bainhira provas sufisiente atu halo akuzasaun maka sei konklui kedan, maibé bainhira provas seidauk sufisiente mak sei delega fali ba CAC hodi kontinua investiga.

Antes ne’e iha loron 18 fulan-Janeiru 2022, Ekipa Investigadór CAC nian lidera hosi Diretór Investigasaun Kriminál (UIK), Emílio Quintas akompaña hosi Polísia Nasionál Servisu Investigasaun Kriminál (PNSIK) ezekuta no asegura mandadu Tribunál Rejiaun Administrativa Espesiál Oé-Cusse Ambeno (RAEOA) ho númeru NUC 0057/21.PDOEC loron 17/12/2021.

Mandadu ne’e hasai hosi juiz Yudi Pamungkas fó podér ba investigadór CAC hodi halo operasaun buska no apreensaun ba suspeitu diretór emprezáriu na’in-ida (1) hanesan mós sobriñu hosi suspeitu seluk nudár Jerente Seniór RAEOA/ZEESM ka Adjuntu Prezidente Autoridade ho inisiál MN ho ninia espoza (co-autór ne’ebé posibilidade bele sai suspeitu), tanba deskonfia envolve iha kazu krime korrupsaun.

Mandadu ba buska iha domisiliáriu no prende sasán ne’e, juis haruka no fó orden atu halo buska iha domisiliáriu ho posibilidade ba prende sasán ne’ebé mak iha ligasaun ho faktu hirak ne’ebé investiga ona, tuir dispozisaun iha art 37 no nú 2, hosi KRTL, iha artigu 226 no 1, al. c) artigu 108 no 1 artigu 170, hotu-hotu hosi KPP ba suspeitu ninian hela fatin.

Ba kumprimentu efetivu ba mandadu ida-ne’e, iha autorizasaun ba asesu iha dependénsia hotu-hotu, inklui kofre, fatin hirak rai sasán nian, veíkulu hirak ne’ebé uza hosi suspeitu, bele fera odamatan, hakat sai hosi moru no neutraliza animál sira, se presija duni, ho observánsia ba dispozisaun iha artigu 169 no 170 hosi KPPTL.

Iha operasaun buska domisiliáriu no apreensaun ne’e, investigadór CAC halibur dokumentu lubun boot; konta bankária, osan cash ho montante boot, dokumentu kompañia nian, telefone no dokumentu sobre projetu eletrifikasaun, no projetu balun iha RAEOA/ZEEMS ne’ebé suspeitu ho ninian espoza nian kompañia manán nu’udár evidénsia no objetivu krime.

Kazu ne’e rasik hetan delegasaun kompeténsia hosi Prokuradór Distritál Oé-Cusse hodi fó delegasaun ba investigadór CAC tuir podér lei hodi halo prosesu investigasaun ho kuidadozu hanesan rona sasin sira, halibur dokumentu no halo survelénsia ba iha intervenenti prosesuál liu-liu arguidu nian bens sira.

Jornalista: Carmelita Isaac