Hatutan.com, (06 Juñu 2022), Díli—Eskuadra Polísia Nasionál Timor-Leste (PNTL) hamutuk lima iha Munisípiu Manatuto, to’o oras-ne’e seidauk iha karreta operasionál, atu bele fasilita membru sira hala’o servisu hodi atende nesesidade sira públiku, liu-liu bainhira akontese kazu ruma.

Komandante PNTL, Munisipiu Manatuto Superintendente Polísia, José da Costa. Foto/Espesiál.

Eskuadra lima ne’ebé seidauk iha karreta operasionál mak hanesan, Manatuto  Vila, Laleia, Lacló, Laclubár ho Soibada no eskuadra ne’ebé iha ona maka Natarbora.

Lee Mós:Eleisaun Prezidensiál, PNTL Enfrenta Difikuldade Barak

“Eskuadra ida iha ona desde 2021. Eskuadra lima mak seidauk. Informasaunm ne’ebé mak ami iha, tuir planu estratéjiku governu nian, nomós iha tinan 2022 sei kompleta ba eskuadra hirak ne’ebé mak seidauk iha sei hetan kompletu,” Komandante PNTL, Munisipiu Manatuto Superintendente Polísia, José da Costa hateten ba Hatutan.com, iha Suai Room, Timor Plaza, Dili, Segunda (06/06/2022).

Hahú hosi 2021 to’o 2022, governu liuhosi Ministériu Interiór (MI) ho Komandu Jerál PNTL, halo ona distribuisaun transporte ba munisipiu sira no iha 2019 distribui mós karreta iha eskuadra sira.

Tuir planu, iha tinan 2022 governu esforsu atu sosa tán karreta ba iha eskuadra sira iha territóriu nasionál, inklui Manatuto.

“Ami hein katak fulan-rua ka tolu mai tán, transporte ne’ebé mak Estadu sosa bele to’o hotu. Eskuadra sira mós bele hetan inklui ami iha munisipiu Manatuto,” nia hateten.

Iha Sesta, 03 Juñu 2022 Ministériu Interiór hamutuk ho Komandu PNTL realiza serimónia ida hodi entrega karreta hamutuk 25 ba komandu munisipiu sira, inklui Rejiaun Administrativa Espesiál Oecusse Ambeno (RAEOA), no kada munisípiu, hetan karreta rua, ba unidade tránzitu ho Vulnerable Person Unit (VPU).

Problema ne’ebé komandu PNTL Munisipiu Manatuto hasoru durante ne’e maka, seidauk iha torre, ikus mai difikulta liña komunikasaun entre membru sira, liuhosi rádiu.

Oras ne’e, governu ho komandu PNTL mós prepara hela atu hahú prosesu instalasaun ba torre, nune’e bele iha komunikasaun liuhosi rádiu ho di’ak liután, inklui sosa tán ekipamentu sira ba rádiu nian.

Jornalista: Rogério Pereira Cárceres