Hatutan.com, (03 Juñu 2022), Díli—Governu liuhosi Ministériu Interiór (MI), hahú reativa atividade formasaun ba membru Polísia Nasionál Timor-Leste (PNTL), liu-liu feto sira hodi prepara di’akliu tán bele sai lideransa iha instituisaun ne’e.

Vise Ministru Interiór, António Armindo.

Vise Ministru Interiór (VMI), António Armindo hateten, durante 2020 to’o 2021, formasaun ba feto PNTL paradu tanba pandemia globál Covid-19, ne’ebé invade nasaun tomak iha mundu inklui Timor-Leste.

Lee Mós: Koñese Deviza PNTL no Formasaun atu Lidera Eskuadra to’o Komisáriu

“Foin lalais ne’e ita hahú ona treinamentu leadership. Alende ne’e, treinamentu iha rai-laran, ita lobby ho parseiru sira haruka ona ita nia polisia femenina Superintendente Xefe Natércia ba ona Austrália,” António Armindo hateten iha serimónia distribuisaun karreta ba komandu munisípiu sira, iha Kuartél Jerál Caicoli, Sesta (03/06/2022).

Tuir planu iha fulan-jullu tinan 2022, sei haruka tán feto PNTL entre na’in-ida to’o tolu no tinan 2023 sei haruka na’in-neen hahú hosi postu Sarjetu Xefe to’o Superintendente Xefe atu prepara ba kursu iha Faculty Pacific of Policy iha Sideney-Austrália.

MI iha ona konseitu atu dezenvolve instituisaun seguransa no iha konseitu ne’e, ida atu haree kona-bá norma legál sira ne’ebé mak eziste, balun halo ona revizaun no lei balun halo foun.

Ezemplu ida maka, rejíme salariál ne’ebé foun inklui revizaun ba lei orgánika PNTL ho mós estatutu ne’ebé mak ohin parte Komandu PNTL, haruka fila-fali ona ba iha ministériu no tuir tán maka, “bem estár ka moris di’ak” membru seguransa sira nian.

“Iha 2020, kuandu ita hahú mandate iha fulan-outubru ita hasa’e ona sira nia alimentasaun ba unidade tolu, $10 pur dia inklui mós ema sivíl sira ne’ebé mak durante ne’e servisu sira, sira selu ho sira nia saláriu rasik, mais ministériu deside atu instituisaun mak tenke selu,” nia hateten.

Revizaun ida ne’e, ministériu avansa kedan iha tinan 2021. La’ós ne’e de’it, iha rejíme salariál ne’e, sira aumenta tán 5%, iha membru sira nia osan alimentasaun, hasa’e ona ba $10 no ida ne’e aplika ba membru hotu-hotu.

Maibé iha Unidade Espesial tolu maka sira aplika ka hasa’e tán osan ba $3, atu bele iha diferensa oitoan ho kontinente jerál.

Nune’e mós, iha Sesta 03 Juñu 2022,  sira finaliza ona rejíme ida-ne’e no segunda semana oin sei avansa ka aumenta tán ba 15%.

Terseiru maka, infraestrutura. Infra-estrutura maka, inklui ita nia kondisaun servisu, hahú kedan hosi fronteira iha postu 25 iha tinan ida de’it no balun fulan neen kompleta ona.

Dezeñu Konstrusaun ba Edifísiu Munisipiu-Eskuadra

Iha kinta 02 juñu, Ministériu Interior hetan ona aprezentasaun hosi tékniku sira kona-bá dezeñu konstrusaun edifísiu foun ba edifísiu eskuadra PNTL mak hanesan, Ai-mutin, Lacló (Manatuto), Cristo Rei ho Na’in-Feto, inklui sei kontinua tán dezeñu ba edifísiu komandu Dili, Manatuto, Likisá, Aileu, Baucau, ho Viqueque.

“Ida ne’e sei akontese iha tinan ida ne’e. Ne’ebé ita hahú dadaun ona, seluk mós maka karreta. Iha tinan kotuk distribui ona karreta 21. Maibé, ita haree ba realidade la to’o nafatin, ita propoin liuhosi komisaun sira ita aumenta tán hamutuk 90,” António Armindo hateten.

Jornalista: Rogério Pereira Cárceres