Hatutan.com, (28 Juñu 2022), Díli– Korpu Mariña Estadus Unidus Amérika no FALINTIL-Forsa Defeza Timor Leste (F-FDTL), Tersa (28/06/2022), hala’o demonstrasaun asisténsia umanitária ho aviaun MV-22 Osprey.

Lee Mós : EUA Tau Millaun $420 Apoia Programa Edukasaun, Bee-Moos ho Saneamentu

MV-22 Osprey, tipu aeronave úniku ida ho liras rotativa operada husi Estadus Unidus Amérika nia Korpu Mariña, no dezeñadu espesífikamente hodi halo operasaun iha ambiente oioin. Foto/Espesiál

Demonstrasaun loron-tomak ho aeronave MV-22 Osprey rua ne’ebé tu’un iha Aeroportu Internasionál Prezidente Nicolau Lobato, Díli, hodi transporta lideransa no funsionáriu F-FDTL no ofisial sira Ministériu Defeza, Ministériu Transporte no Komunikasaun, no Ajénsia Protesaun Sivíl ba Aeroportu Baucau hodi observa demonstrasaun ne’e.

Durante demonstrasaun, Fuzileiru hamutuk 27 husi Forsa Mariña Rotativa – Darwin (MRF-D) halo viajen mai Timor-Leste parseria ho F-FDTL Komponente Aéreu F-FDTL.

Manifestasaun ne’e sei haree liubá kapasidade aeronave Osprey nian, aviaun liras hadulas ho dezeñu úniku ne’ebé bele hala’o operasaun iha fatin/terrenu oin-oin.

Komunikadu imprensa ne’ebé Hatutan.com asesu husi Embaixada Estadus Unidus Amérika iha Timor-Leste relata katak MRF-D sei hatudu Sistema Purifikasaun Bee nian, sistema avansada ida ne ‘ebé bele hamoos bee-masin to’ o litru atus-rua ha’at-nulu (240 ltr) ka bee fresku litru atus-lima-hitu nulu (570 ltr) kada oras, hodi bele uza iha situasaun emerjénsia umanitária.

Demonstrasaun ne ‘e foka liubá hametin kooperasaun entre F-FDTL no Korpu Mariña Estadus Unidus nian. MRF-D nia pozisaun iha Norte Austrália lokalizadu úniku hodi hatán ba dezastre naturál sira ka situasaun emerjénsia sira seluk iha Sudeste Aziátiku no Oseánia.

Partisipante sira sei vizita instalasaun Aeroportu Baucau ne’ebé foin konstrui no haree mós ekipamentu foun ne’ebé sei fornese bá Komponente Aéreu F-FDTL nian. Ekipamentu no veíkulu sira mak hanesan kamioneta mina R-11, kamioneta-boot rua hodi hamoos dalan, kamioneta Ford F-350 rua, jeradór no ekipamentu seguransa.

“Ami kontente tebes ami-nia Fuzileiru sira bele parseria ho F-FDTL sira hodi hatudu demonstrasaun ida ne ‘e,” Enkarregadu Negósiu Embaixada Estadus Unidus, Tom Daley hateten.

 Demonstrasaun ne’ e hatudu prontidaun hodi tulun Timor-Leste atu hatán ba dezastre naturál no asisténsia umanitária emerjénsia sira. Eventu ne’e hatudu oinsá Timor-Leste bele utiliza aeroportu Baucau hodi responde ba problema dezastre no hala’o treinamentu.

Lee Mós : Povu EUA Apoia Tan ICU Movel Ida Mai Timor-Leste

“Ami orgullu bele apoia Timor-Leste ho projetu reabilitasaun konjunta ida-ne’e,” Tom Daley hateten.

Demonstrasaun asisténsia umanitária ida-ne ‘e forma tanba iha parseria seguransa ne’ebé metin entre Estadus Unidus ho Timor-Leste, liuliu kompromisu Estadus Unidus nian hamutuk ho Governu Timor-Leste atu reabilita Aeroportu Baucau.

Projetu ne ‘e sei fó asisténsia ba F-FDTL liu husi kriasaun Komponente Aéreu ida ne’ebé sei ajuda Governu Timor-Leste hodi monitoriza di’ak liután nia territóriu marítimu, hodi hatán ba dezastre naturál sira no promove dezenvolvimentu ekonómiku.

Iha tinan ida ne ‘e, Estadus Unidus Amérika sei organiza ezersísiu lima ho F-FDTL no sei haruka membru F-FDTL ba tuir formasaun lian Inglés no profisionál militár nian iha Estadus Unidus. Aleinde ne’ e, Estadus forsa Navál Seabees husi Estadus Unidus Amérika harii no reabilita ona klínika no eskola liu 100 iha Timor-Leste hodi ajuda harii futuru ida ne’ebé di’ak liubá timoroan sira, no kompleta ona projetu sira ho valór liu millaun $ 60 durante tinan 12 liubá.

Jornalista : Vito Salvador