Hatutan.com (01 Jullu 2022) Díli-Tribunál Distritál Díli (TDD), Sesta (01/07/2022), hala’o re-julgamentu bá krime administrasaun danoza no partisipasaun ekonomia iha negósiu ne’ebé deskonfia involve eis-Ministra Finansa arguida Emilia Pires no no eis-Vise Ministra Saúde Madalena Hanjam, relasiona ho projetu fornesimentu kama elétriku bá Ministériu Saúde iha 2016.

Lee Mós : Rejulgamentu, Tribunál Fó Tempu Loron Lima ba Advogadu Aprezenta Paradeiru Emília Pires

Eis-Ministra Finansas, Emilia Pires. Foto/Espesiál

Tuir ajenda Tribunál nian katak iha loron 1 fulan-Jullu ne’e, haleu tuku 14:00 Otl, Tribunál sei rona arguida na’in-rua nia deklarasaun kona-bá sira nia envolvimentu iha kazu ne’e, maibé Tribunál seidauk bele rona tanba arguida Emilia Pires la marka prezensa maske arguida Madalena Hanjam marka prezensa.

Ho razaun ne’e, Ministériu Públiku (MP)  ne’ebé reprezenta husi Prokuradór Rogério Viegas husu bá Tribunál atu notifika arguidu Emilia Pires hodi husu nia paradeiru, tanba tuir artigu 257 katak arguida na’in-rua iha devér atu marka prezensa iha Tribunál nune’e julgamentu bele lao. Maibé, parte advogadu no advogada privadu José Guterres no Soraya Marques husu bá Tribunál karik arguida la marka prezensa maka advogadu no advogada bele reprezenta arguida nia fatin nune’e julgamentu bele lao.

Bazeia bá pedidu husi MP no advogadu nian, Tribunál deside fó tempu loron 20 hodi notifika arguida Emilia Pires ho nune’e Tribunál adia hikas julgamentu bá loron 19 fulan-Setembru 2022.

Antes ne’e, iha desizaun TDD iha primeira instánsia ne’ebé hala’o iha loron 20 fulan-Dezembru 2016, liu husi juis koletivu José Maria de Araújo, Francisca Cabral no Maria Solana, deside kondena arguida Emilia Pires ho pena prizaun tinan-hitu (7) no arguida Madalena Hanjam ho pena prizaun tinan-haat (4) no selu kustu judisiál US$100.00 ba kada arguida.

Iha kazu ne’e, Ministériu Públiku (MP) akuza arguida na’in-rua bá pratika krime partisipasaun ekonomia iha negósiu no administrasaun danoza ne’ebé previstu iha artigu 299, 274 husi kódigu penal TL.

Audiénsia Julgamentu prezide hosi juis koletivu Jose Maria de Araújo, Francisca Cabral, Maria Solana, MP reprezenta husi Prokuradór Rogério Viegas no arguida na’in-rua hetan asisténsia legal husi Advogadu privadu José Guterres ho Soraya Marques.

 Jornalista : Carmelita Isaac