Hatutan.com, (01 Jullu 2022), Díli— Komisáriu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio akompanha hosi Diretór Rosário Araújo ho estrutura Prevensaun korrupsaun aprezenta rezultadu deskobrimentu kona-bá rekrutamentu ofisiál guarda florestál ne’ebé fulan kotuk sai debate nível nasionál, tanba indika eziste poténsia irregularidade durante prosesu rekrutamentu.

Komisáriu Adjuntu CAC ba Asuntu Prevensaun no Sensibilizasaun, Luis de Oliveira Sampaio akompaña hosi Diretór Rosário Araújo ho estrutura Prevensaun korrupsaun aprezenta rezultadu deskobrimentu kona-bá rekrutamentu ofisiál guarda florestál ne’ebé fulan kotuk sai debate nível nasionál, tanba indika eziste poténsia irregularidade durante prosesu rekrutamentu, iha Salaun Diresaun Jerál Florestas, Café e Plantas Industriais MAP nian, iha Caicoli Dili, Sesta (01/07/2022). Foto/CAC.

Aprezentasaun analiza ba rekrutamentu prelimináriu ne’e, ekipa delegasaun CAC aprezenta ba Diretór Jerál Floresta nomos nu’udár Prezidente Ekipa Juri rekrutamentu nian, Simão Raimundo Mau ho ninian estrutura tomak iha Salaun Diresaun Jerál Florestas, Café e Plantas Industriais MAP nian, iha Caicoli Dili. , Sesta (01/07/2022).

Lee Mós: CAC Analiza Hela Dokumentu Kazu Rekrutamentu Guarda Floresta

“Hafoin halo analiza no verifikasaun ba dokumentu sira ne’ebé MAP aprezenta ba CAC, revela katak la’ós kandidatu na’in-sia de’it mak sai problema hanesan viral iha média nasionál, média sosiál no mós iha Parlamentu Nasionál maibé iha kandidatu hamutuk na’in 15 mak deteta iha irregularidade,” Hatutan.com sita komunikadu.

Indikasaun ba faktus irregularidade hirak ne’ebé CAC deskobre maka, Ida, hosi kandidatu funsionáriu guarda floresta sira ne’e balun nia naran la sai iha lista prezensa simu dokumentus nian hosi Diresaun Jerál Floresta; Rua, iha faze submisaun dokumentus kandidatu balun la hatama dokumentus; Tolu, faze selesaun dokumentus kandidatu balun la liu (eskluidu) kedas ona; Haat, kandidatu balun nia lista prezensa laiha, la hatama dokumentus, selesaun dokumentus la liu, la tuir teste eskrita maibé naran sai fali iha teste final ka orál nian ho valór klasifikadu; Lima, kandidatu balun iha teste orál valór la reflete tiha ona estandarte ka padraun tuir Lei Funsaun Públika valór 60 mínimu, kandidatu balun valór atinze de’it 54 mai karaik.

Ho deskobrementu hirak ne’e, CAC prezume katak prosesu hirak ne’e iha indikasaun forte ba familiarizmu, klientislizmu, no nepotizmu.

Rekrutamentu ida-ne’e la reflete ba baze ho méritu, koñesimentu profesionál adekuada no abilidade relevante ka bada’en iha área referidu.

Rekrutamentu mós la bazeia ba PAA, 2022 maibé halo adjustamentu ba orsamentu ratifikativu nian.  Aleinde ne’e, esplikasaun hosi Prezidente ba Ekipa Juri no membru juri sira seluk diferente no dokumentus ne’ebé submete mai CAC no revela verdade oin seluk.

Reflete ba rezultadu preliminária ne’ebé bazeia ba análiza no deskobrimentu ne’e, ekipa Unidade Inspesaun CAC hola konkluzaun katak: IDA, iha prosesu rekrutamentu ne’e hatudu indisius forte katak iha aranju hosi MAP hodi fó oportunidade ba  klientislizmu, familiarizmu no nepotizmu; RUA, prosesu rekrutamentu ne’e mós nakonu ho poténsia konflitu intereses hodi fó vantajen ba grupu preferensiál asosiadu sira; TOLU, iha tendensiozu makaa’as kona-bá posibilidade atu halo korresaun dokumentus ba kandidatu sira; HAAT, iha konfuzaun kona-bá modalidade rekrutamentu nian tanba tuir esplikasaun hosi juri sira katak rekrutamentu ne’e ho karáter kazuais, maibé iha implementasaun iha avizu ne’ebé fó sai iha konkursu dehan kontratu anuál ho posibilidade ba extendsaun; LIMA, rekrutamentu ida ne’e la refleta ba prinsipiu mérito, profesionál no bada’en di’ak; NEEN, rekrutamentu la bazeia ba PAA 2022 maibé halo ajustamentu ba orsamentu retifikativu.

Tanba ne’e, bazeia artigu 5 (1) letra c, CAC akonsella Diretór Jerál Floresta no ekipa juri sira atu rekonsidera prosesu rekrutamentu ne’ebé hatudu indisius forte ba irregularidade.

CAC mós subliña katak independentemente hosi aprosimasaun no akonsellamentu ne’ebé Diresaun Prevensaun realiza dadaun ho Diretór Jerál Floresta ho estrutura jestór sira iha MAP, Diresaun Prevensaun sei entrega deskobrementu hirak ne’e ba iha Diresaun Investigasaun Kriminál CAC nian hodi halo investigasaun kle’an liu tán ba prosesu ne’e.

Aleinde ne’e, deskobrimentu ne’e sei partilla ho Komisaun Funsaun Públika (CFP) atu haree ba kestaun administrativu ne’ebé kabe ba CFP nian kompeténsia.

Kazu indikasaun irregularidades rekrutamentu guarda florestál iha MAP ne’ebé hetan atensaun aas hosi públiku, obriga Komisáriu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio hodi lidera ekipa Quadrilateral kompostu hosi CAC, Comissão Função Pública (CFP), Provedór Direitus Humanus no Justisa (PDHJ) no Inspetór Geral do Estado (IGE) ba hasoru-malu ho ekipa juri rekrutamentu nian CAC iha loron Sesta (10/06).

Jornalista: Carmelita Isaac