Hatutan.com, (06 Jullu 2022), Díli—Komisáriu Comissão Anti-Corrupção (CAC) Sérgio Hornai akompaña hosi Komisáriu Adjuntu ba Asuntu Prevensaun no Sensibilizasaun Luis de Oliveira Sampaio ho estrutura Espesialista Anti-Korrupsaun (EAK) sosializa Lei Nu. 7/2020 – Medidas Prevensaun no Kombate Korrupsaun (MPCC) ba estrutra ajente públiku no kuadrus sira iha instituisaun publiku; Prezidente no vise-prezidente Autoridade RAEOA, Prezidente Rejiaun, Diretér Jerál, Diretór Nasionál, Diretór Eskola, Xefe Departamentu no funsionáriu diresaun estratejia hosi liña ministeriais ne’ebé hanesan jestór hosi instituisaun, Kuarta (06/07/2022).

Komisáriu Adjuntu ba Asuntu Prevensaun no Sensibilizasaun Luis de Oliveira Sampaio halo hela Aprezentasaun. Foto/CAC.

Sensibilizasaun Lei MPCC durante loron tomak ne’e hahu ho kanta Hino Nasionál, lian bem vindo no ofisalmente programa loke sensibilizasaun hosi Sekretáriu Rejionál Agrikultura José Eta no liafuan agradesimentu hosi Komisáriu CAC Sérgio Hornai. 

Lee Mós: Lei MPCC Obriga Ajente Públiku Deklara Rikusoin

Objetivu hosi sensibilizasaun Lei MPCC iha RAEOA ne’e atu asegura partisipasaun di’ak hosi ajente Estadu sira ne’ebé sujeita ba Deklarasaun Rendimentu Bens no Intereses (DRBI) nian.

Advertisement

CAC hanesan autoridade kompetente tuir lei MPCC sei halo ezersisiu hotu ne’ebé posivel hodi sensibiliza lei ne’e ba benefisiu ka dirijente no funsionáriu alvu sira no mós parseiru relevante.

Programa sensibilizasaun ho topiku sentral “HASAE KOÑESIMENTU AJENTE PÚBLIKU KONA-BÁ LEI MPCC,” ne’e atu hasa’e koñesimentu ida ne’ebé mak komprehensivu ba deklarante kona-bá prosedimentu rejistu DRBI sira ba ajente públiku.

Atu motiva funsionáriu públiku sira nia desizaun sira ne’ebé fó importánsia ka atensaun ba prinsipiu sira boa-governasaun nian hanesan; transparánsia, akuntabilidade, responsabilidade, independente no justu.  

Iha loron Datoluk prezensa offisiál CAC nian iha Oecusse semana ne’e, esplika ba autoridade prinsipál RAEOA nian kona-bá importánsia vantajen no desvantajen lejislasaun foun MPCC ba ajentes públiku sira.

“Lei ida ne’e atu proteje ajente públiku sira atu ema dun matak ajente públiku sira bainhira hetan moris di’ak tuir sira ninian kosar been rasik,” Hatutan.com sita esplikasaun Komisáriu Adjuntu ba Asuntu Prevensaun no Sensibilizasaun Luis Sampaio iha ninian aprezentasaun ba partisipante sira.

Advertisement

Komisáriu Comissão Anti-Corrupção (CAC) Sérgio Hornai Halo hela aprezentasuan, Kuarta (06/07/2022). Foto/CAC.

Lei MPCC katak obriga ajente públiku sira ne’ebé hetan fiar assume kargu Xefias  sira obrigadu tenki deklara riku-soin annualmente.

Funsionáriu públiku ordináriu obrigadu tenki aprezenta sira ninian rikusoin mai iha CAC tinan tolu dala ida.

“Husu ba funsionáriu públiku atu kolabora ho lei CAC hodi deklara rikusoin ho loloos. Se rekuza kolabora ho CAC, sei simu konsekuénsia todan administrativa hodi ko’a saláriu no kriminalmente,” Komisáriu Adjuntu Sampaio afirma.

Prezensa iha sorumutu sensibilizasaun ida ne’e estrutura RAEOA tomak hamutuk na’in 100-resin la ho prezensa Prezidente Autoridade RAEOA Arsénio Paixão Bano no Vise Prezidente Leonia da Costa Monteiro nian ne’ebé goza hela sira ninian férias iha Dili tuir lei.

Jornalista: Carmelita Isaac

Advertisement