Hatutan.com, (08 Jullu 2022), Díli– Eis-Primeiru Ministru Japaun, Shinzo Abe, hakotu iis hafoin hetan tiru iha sidade Nara, Japaun Oeste, Sesta (08/07/2022).

Lee Mós : Eis-PM Japaun Shinzo Abe Hetan Tiru

Eis-Primeiru Ministru Japaun, Shinzo Abe, hakotu iis hafoin hetan tiru, Sesta (08/07/2022). Foto/REUTERS

Reprezentante Ospitál Universidade Medisina  Nara, Fukushima, informa katak eis-PM Shinzo Abe hakotu iis bainhira hala’o hela tratamentu intensivu.

“Shinzo Abe evakua mai ospitál tuku 12.20 oras Japaun, ho kondisaun kritiku  no iha tuku  15.03, eis-PM Shinzo Abe hakotu iis,”  Fukushima  haktuir iha konferénsia imprensa ne’ebé transmite husi NHK.

Eis-PM Shinzo  Abe hakotu iis hafoin hetan tiru bainhira hala’o hela diskursu iha kampaña iha sidade Nara besik Estásiu Yamatosaidaiji, hale’u tuku 11.30 oras Japaun.

Kyodo News relata katak eis-PM Shinzo Abe hetan tiru iha nia kotuk laran no monu kedas bá rai hodi rezulta nia mate ki’ik (tidak sadarkan diri).

Sasin moris sira, inklui reporter mídia lokál NHK, rekoñese katak sira rona tiru dala rua iha fatin akontesimentu. La kleur de’it, ema evakua kedas eis-PM   Shinzo Abe  hafoin hetan tiru dala dala tolu iha nia kotuk laran no kakorok.

Mídia seluk husi Japaun rasik relata katak posibilidade ki’ik tebes atu salva eis-Primeiru Ministru ne’e hafoin hetan tiru. Ikus mai eis-Primeiru Ministru  ne’e hakotu iis hafoin hetan tratamentu intensivu iha ospitál.

Autór mane ida ne’ebé tiru eis-PM ne’e rekoñese bá autoridade Polísia sira katak nia mak hakarka duni tiru eis-PM Shinzo Abe tanba la satisfás ho Abe nia lideransa durante nia ukun Japaun.

Fontes : NHK/Kyodo News