Hatutan.com, (08 Jullu 2022), Díli– Diresaun Jerál Rejistu Notariadu (DGRN, sigla portugés), Ministériu Justisa (MJ) halo atendimentu bá emisaun pasaporte tanba sistema rekupera ona. Maske nune’e, Sesta (08/07/2022), imprime uluk pasaporte ho total 300 ne’ebé pendente hela inklui hirak ne’ebé urjente hanesan pasiente ne’ebé atu evakua bá rai-li’ur no bá atendimentu normal sei hahú funsiona iha  Segunda (11/07/2022).

Lee Mós : Sistema Avaria Laiha Atendimentu Bá Produsaun Pasaporte

Pasaporte RDTL. Foto/Espesiál

“Seidauk halo atendimentu bá sidadaun baibain maske sistema di’ak ona, tanba ohin loron ne’e atende de’it bá kazu urjente hanesan pasiente ne’ebé atu evakua bá rai-li’ur, inklui hirak ne’ebé semana kotuk mai halo ona pasaporte maibé sidauk imprime, tanba ne’e hahú Segunda maka foin simu foun hodi fó atendimentu ba sidadaun bai-bain ne’ebé atu halo pasaporte,” Diretór Jerál DGRN, Crisogno da Costa Neto  informa bá Hatutan.com iha Dili.

Husi parte DGRN fó ona aviza liuhusi Facebook no kuadru avizu katak DGRN sei hahú halo atendimentu bá emisaun pasaporte iha Segunda inklui mós atendimentu iha munisípiu sira, tanba sistema ida de’it ho nune’e bainhira sistema di’ak ona maka atendimentu hahú funsiona.

Iha sorin seluk liu husi komunikadu imprensa ne’ebé Hatutan.com asesu husi gabinete mídia Ministériu Justisa (MJ) relata katak daudaun sistema emisaun Pasaporte Eletróniku Timor-Leste (PETL) di’ak fali ona, maibé sei imprime uluk pasaporte ho total 300 ne’ebé pendente hela no sei atende uluk hirak ne’ebé maka urjente (pasiente) de’it.

DGRN la halo atendimentu ba emisaun pasaporte durante semana ida,  hahú kedas iha Sesta semana kotuk ho razaun sistema avaria.

Jornalista : Carmelita Isaac