Hatutan.com, (13 Jullu 2022), Díli— Polísia Nasionál Timor Leste (PNTL) intensifika operasaun hodi halo kontrolu rigorozu iha área fronteira no iha Kuarta kalan konsege halo apreensaun ba atributu Grupu Arte Marsiais (GAM) ne’ebé hatama ilegál iha fronteira.

Farda Arte Marsial ne’ebé UPF-SNI halo apreensaun iha Fronteira tanba sidadaun sira hatama illegal iha Kuarta (13/07/2022). Foto/PNTL.

Operasaun rutina ne’e bazeia ba rekomendasaun hosi sosiedade sivil no deputadau sira iha uma fukun Parlamentu Nasionál (PN).

Lee Mós: UPF Detein Timor-oan Na’in-Haat Hatama Gazolina Ilegál

Komandante Unidade Patrullamentu Fronteira (UPF), Superintendente Polisia, Euclides Belo hateten, atributu ne’ebé rekolla mai tanba iha koordenasaun di’ak ho Servisu Nasionál Intelijénsia (SNI).

“Foin daudaun, ita nia membru Servisu Sekreta hosi Komandu UPF halo vizilánsia hamutuk iha fronteira konsege hetan komunidade balun tenta hatama atributu Grupu Arte marsiais ne’ebé pertense ba Grupu Persaudaraan Setia Hati Terate tuir dalan ilegál iha Suku Batugade, Postu-Administrativu Balibo, Munisipiu Bobonaro,” Hatutan.com sita deklarasaun Komandante Euclides Belo iha komunikadu.

Operasaun ne’e ekipa konjunta la konsege kaptura autór tanba sira konsege halai no so’e hela sasan sira ne’e iha mota laran maibé sira sei esforsu atu halo servisu extraordinária iha liña fronteira hodi buka-tuir suspeitu sira-ne’e.

“Sira halai so’e hela saku bot ida, plastik bot rua, pasta ida, farda treinu PSHT pares 52, sabuk hena mutin 20, faru PSHT kor mutin ida, kor metan haat, pasta  kiik hamutuk 14 no atributu hirak ne’e ita asegura ona iha Kuartél UPF Fatuk Bot, Batugade,” Komandante Euclides Belo hateten.

Kestiona kona-bá sidadaun sira ne’ebé kontinua tama ilegál, Euclides Belo haktuir fronteiras terrestre hanesan fatin ne’ebé mak lu’an no presize apoiu hosi komunidade atu servisu hamutuk ho UPF nune’e bele halo kapturasaun  ba ema sira ne’ebé mak tama sai ilegál.

“Ita nafatin servisu hamutuk ho komunidade iha liña fronteira, faktus hatudu katak informasaun hotu ne’ebé iha mai hosi komunidade ne’ebé iha ona konsiénsia nasionalizmu, hatene sentidu Estadu mak pasa imformasaun ba servisu sekreta UPF no SNI. Ami apela nafatin ba komunidade atu  servisu hamutuk ho membru sira hodi asegura  no prevene  ema labele hakur liu fronteira ho ilegalmente nune’e ita bele asegura didi’ak ita-nia fronteira,” subliña.

Jornalista: Rogério Pereira Cárceres