Hatutan.com, (14 Jullu 2022), 2022- Tenente Jenerál reformadu Lere Anan Timur hateten, Governu iha obrigasaun atu halo kontrolu maka’as bá ajénsia traballadór sira ne’ebé eziste iha Timor-Leste no komete prátika tráfiku umanu ho krime organizadu.

Tenente Jenerál reformadu, Lere Anan Timur. Foto/Hatutan.com

Hafoin hasoru malu ho Prezidente Repúblika iha Palásiu Prezidensiál, Díli, Kinta (14/07/2022), Tenente Jenerál reformadu, Lere Anan Timur informa, nia mai hasoru malu ho Prezidente Repúblika nu’udar maun, aman bá nasaun no povu tomak, hodi  ko’alia liu kona-bá situasaun polítika interna, liuliu kona-bá joven sira ne’ebé nadodon bá rai-li’ur.

Tenente Jenerál reformadu ne’e konfesa bá Xefe Estadu katak ho situasaun sira ne’ebé timoroan sira enfrenta iha ema nia rai halo nia sente la seguru ho situasaun polítika atuál ne’ebé la’o iha Timor Leste.

Lere nu’udár mós veteranu FALINTIL ne’ebé luta tinan 24 nia laran bá libertasaun povu no rai ida-ne’e nian ladún kontente ho situasaun joven timoroan sira ne’ebé nadodon bá rai-li’ur tanba moris iha rai-laran ladún iha kondisaun ekonomia.

Agora iha mos fenomena foun ida ne’ebé sai preokupasaun públiku mak ajénsia barak iha Timor-Leste ne’ebé hakarak fasilita timoroan sira servisu iha liu’r mais depois bá ema nia rain moris terus no susar liu.

“Governu mós bele husu responsabilidade bá ajénsia sira ne’ebé fasilita joven sira bá, tanba se bainhira la kontrola neineik Timor-Leste bele monu ba tráfiku umanu, krime organizadu no haree katak buat sira ne’e komesa hahú ona,” Lere Anan Timur hateten.

Tenente Jenerál reformadu ne’e hatutan hanesan uluk iha fatin balun sempre dehan joven sai bá li’ur ne’e signifika Timor Leste esporta ema depois importa osan, maibé joven sira tenke bá ho dignidade hela iha ema nia rain ho dignidade no fila mós ho dignidade.

“La bele hanesan foin daudauk rona dehan joven sira iha Portugál toba iha dalan ninin sira ne’e no uma tatiis, ne’e laiha dignidade.  Ita-nia Governu mak tenke haree atu ita-nia joven sira bá ho dignidade, no moris no servisu ho dignidade iha ema nia rain. Presiza Governu nasaun rua tenke iha akordu hanesan Austrália ho Korea labele ida-idak la’o nian,” Lere Anan Timur hateten.

Iha parte seluk Tenente Jenerál reformadu ne’e ko’alia mós ho Xefe Estadu kona-bá dezenvolvimentu militár, iha planu bá forsa armada nian tuir estatutu 2020 ko’alia momoos kona-bá programasaun militár no prioridade mak tenke iha kapitál umanu bá forsa armada. Katak tenke iha kapasitasaun bá ofisiais sira atu bele iha matenek no vizaun bá dezenvolvimentu instituisaun forsa armada nian.

Prezidénsia Repúblika tenke iha forsa rezerva balun ne’ebé hanaran forsa de prevensaun. Kompañia ida iha Palásiu Prezidensiál atu buat ruma kaza Militár uza hodi asegura servisu Xefe Estadu nian atu servi povu di’ak liután.

“Xefe Estadu José Ramos Horta la hanesan ho kualkér prezidente tanba nia hanesan mós Premiadu Nobel da Pas tamba ne’e dalaruma nakloke liubá ema hotu no lagosta forsa barak no besik liu ho nia,” Lere fó sasin.

Jornalista: Vito Salvadór