Hatutan.com, (21 Jullu 2022), Díli- Sekretáriu Estadu Juventude no Desportu (SEJD), Abrão Saldanha, husu deskulpa aberta bá Primeiru Ministru (PM), Taur Matan Ruak ho atleta Paralímpiku sira tanba atrazu serimónia despedida ho atleta na’in-15 ne’ebé atu arranka bá partisipa SEA PARA GAMES iha  Solo, Indonézia.

Atleta Paralímpiku sira foto hamutuk ho PM Taur no SEJD Abrão Saldanha iha Palásiu Governu, Kinta (21/07/2022). Foto/Hatutan.com

Tuir ajenda iha konvite katak serimónia despedida Primeiru-Ministru Taur Matan Ruak ho atleta sira ne’ebé hala’o iha Palásiu Governu, Kinta (21/07/2022), iha tuku 07:3o otl, maibé iha difikuldade balun halo SEJD atraza to’o fali tuku 8:10 Otl.  

Primeiru-Ministru  Taur Matan Ruak rasik kumpre no to’o iha Palásiu Governu, tuku 07:15 Otl, no iha tuku 7:30 Otl, tesik bá Salaun Prezidensia Konsellu Ministru (PCM) hodi hasoru malu kedas ho atleta sira. Infelizmente, Sekretáriu Estadu Abrão Saldanha, seidauk marka prezensa iha fatin serimónia nian.

“Uluk nana’in, ha’u husu deskulpa tanba tarde, tau iha ajenda tuku 07:30 Otl, depois ha’u la rona loloos, dehan fali tuku 08:00 Otl, ne’e mak ha’u foin mai ne’e. Ne’ebé husu deskulpa ba exelénsia Primeiru-Ministru,” Sekretáriu Estadu Abrão Saldanha hateten  molok hahú ho diskursu iha serimónia despedida ho atleta sira atleta Paralímpiku  sira.

Maske nune’e, hanesan reprezentante bá Comite Paralimpico no ho atleta sira hotu, SEJD Abrão Saldanha agradese bá Xefe Governu, Taur Matan Ruak, tanba ho disponibilidade hodi partisipa ona iha eventu despedida ne’e.

Prezensa TL Atu Kompete

Iha serimónia despedida ne’e, Abrão Saldanha, reafirma katak, prezensa atleta timoroan sira nian bá iha eventu sira internasionál hirak ne’e, la’ós atu partisipa de’it, maibé bá atu kompete ho ema hosi nasaun seluk.

PM Taur kaer liman ho atleta parálimpiku iha Palásiu Governu. Foto/Hatutan.com

Iha kada eventu desportiva sira rejionál no internasionál nian, Governu sempre halo esforsu hodi lori kontinjénsia sira bá kompete no lori naran TL nian inklui bandeira rasik.

“Iha desportu hamutuk ho federasaun sira, ami assume dezafiu ida katak, to’o ona tempu atu ita husik terminolojia partisipasaun, no ita hahú uza liafuan kompetisaun,” SEJD Abrão  Saldanha hateten.

Hafoin tinan 20 Restaurasaun Independénsia ida ne’e, Governu hamutuk ho federasaun no atleta sira tenke konsiente no prontu ona atu kompete, bá buka medalla, no buka manán. La’ós ona tempu atu bá partisipa de’it, atu aumenta de’it númeru ka halo rame de’it.

“Ho laran ksolok tebes, sua-exelénsia mak ha’u bele mai relata bá ita katak, iha SEA PARA GAMES ida ne’e, ita sei bá kompete iha modalidade tolu. Modalidade Para Atletizmu, Para Tenis da meza, no modalidade Hetrofelízmu ka hi’it besi,” Abrão Saldanha informa.

Hosi modalidade tolu ne’e, Atletizmu nian reprezenta hosi atleta na’in-neen (6), feto 3 no mane 3. Tenis de Meza, iha atleta na’in-lima (5), feto 3, mane 2. Enkuantu hosi modalidade Hetroflízmu nian, sei reprezenta hosi atleta na’in-haat (4).

Atleta sira na’in-15 ne’e, Governu liuhosi SEJD hamutuk ho Comite Paralimpico no federasaun sira, tau sira iha sentru treinamentu durante fulan-tolu, hahú kedan iha 07 fulan-Maiu 2022 to’o loron ne’ebé sira atu arranka bá kompetisaun iha Solo-Indonézia.

“Atleta sira ne’e, liuhosi prosesu selesaun ida naruk, ne’ebé mak halo hosi kada federasaun sira, hahú hosi  2020. Sira ho klasifikasaun di’ak, mak tinan ida ne’e reprezenta TL no ho kontinjente tomak iha Sea Para Games iha Solo-Indonézia,” Abrão Saldanha informa.

Totál orsamentu ne’ebé SEJD gastu hodi halo bá preparasaun sira iha sentru treinamentu, hamutuk $38,000 Enkuantu, totál gastu bá sira-nia partisipasaun iha Solo Indonézia, hamutuk $65,000.

Primeiru Ministru (PM), Taur Matan Ruak, enkoraja atleta sira la mesak, tanba povu TL tomak inklui nia rasik reza hodi akompaña atleta sira atu kompetisaun hotu bele la’o ho di’ak.

Taur dehan, hanesan umanu, maluk defisiénsia sira  laiha forsa, Maromak de’et mak bele buat hotu. Maibé, buat importante ida maka, vontade atleta sira nian.

Haree ba istória TL nasaun ida ki’ik, kiak, maibé laiha nasaun boot sira atu domina iha TL nia istória.

“O hakarak ha’u nia nasaun nia naran, o hakarak konkista fatin bá ha’u, importante mak imi nia vontade. Ha’u espera, buat hothotu la’o di’ak, viajen imi nian, estadia iha ne’ebá buat hotu di’ak, imi fila fali mai, hanesan agora imi bá ne’e. Ami hotu iha ne’e, timoroan tomak, inklui ha’u, ami hotu reza, basta imi hotu fight iha ema nia oin. Imi la mesak,” PM Taur Matan Ruak  hateten.

Jornalista: Rogério Pereira Cárceres