Hatutan.com (20 Jullu 2022) Díli—Ministériu Justisa (MJ) liu hosi Diresaun Geral Rejistu Notariadu (DGRN) daudaun ne’e halo hela autentifikasaun ba dokumentu hosi Partidu foun ha’at mak hanesan Os Verdes, Fitun, Partidu Dezenvolvimentu Sosiál (PDS) no Partidu Timor Forte (PATIFÓR) antes lori ba rejistu iha Tribunál Rekursu (TR) hodi kompete iha eleisaun Parlamentár.

Diretór DGRN, Crisogno da Costa Neto.Foto dok Crisogno.

“Hosi autentifikasaun ne’ebé DGRN halo ho rezultadu maka partidu Os Verdes de Timor no partidu Fitun konsidera prienxe kritéria no liu ona atu ba rejistu iha TR hodi hetan legalidade, tanba sira nia dokumentu iha hela verifikasaun hosi gabineti Ministériu Justisa, maibé PDS ho PATIFÓR daudaun foin kompleta dokumentu,” Diretór DGRN, Crisogno da Costa Neto hateten ba Hatutan.com iha knaar fatin, Kuarta (20/07/2022). 

Konaba Partidu PATIFÓR daudaun sei ba Munisipiu hodi rekolla lista apoiantes molok hetan autentifikasaun, tanba iha prosesu autentifikasaun dokumentu tenki prienxe kritéria ne’ebé iha molok haruka ba gabinete MJ atu halo verifikasaun no rejistu iha TR, tanba DGRN halo de’it autentifikasaun maibé atu hetan legalidade tenki lori ba TR.

Iha sorin seluk, MJ aprova ona Partidu Fitun liu hosi verifikasaun dokumentu hodi haruka ona ba TR hodi proklama ninia legalidade.

“Partidu Fitun hetan ona aprovasaun liu hosi verifikasaun tanba prienxe rekezitu ne’ebé iha no MJ haruka fila ona ba DGRN, nune’e sira bele lori ba rejistu no daudaun sei halo verifikasaun ba PDS no depois de remata verifikasaun maka foin enkamiña fali ba DGRN,” MJ Tiago Amaral Sarmento hateten.

Kritéria sai Partidu foun maka tenke iha 20.000 proponentes, tenke iha kartaun eleitorál ne’ebé konfirmadu ho identifikasaun sivíl ka Billete Indentidade (BI), maibé karik BI laiha bele sertidaun moris, ka sertidaun batizmu no sertidaun kazamentu.

Alende ne’e, rekezitu seluk maka hanesan tenki iha emblema Partidu, Hino Partidu, Karimbu, Bandeira, Manuál, no mós programa no lista dominadu sira inklui sede partidu.

Jornalista: Carmelita Isaac