Hatutan.com, (22 Jullu 2022), Díli-Polísia Nasionál Timor-Leste (PNTL) Munisípiu Díli  detein joven mane na’in-rua ho inisiál JSM no AR tanba ho sira-ninia motorizada hadau vítima GMS nia telemovel iha área ponte foun Comoro, Díli.

PNTL detein suspeitu na’in-rua ne’ebé durante ne’e uza motór hadau ema-nia telemovel. Foto/Hatutan.com

Segundu Komandante PNTL Munisípiu Díli, Superintendente João Sancho Pires, informa, kazu ne’e akontese iha Kuarta (20/07/2022), hale’u tuku 20:00 Otl.  Suspeitu sira-ne’e ho sira-nia motorizada  marka beat ida  maibé xapa matrikula (plat) parte oin ho kotuk laiha hotu hadau vítima GMS nia telefone  no vítima duni tuir suspeitu sira tama to’o área Bebonuk.

Bainhira tama to’o iha estrada ida área Bebonuk nian, suspeitu sira soe hela telefone iha estrada ibun. Tanba vítima mós duni tuir nafatin, hodi hakilar bá komunidade sira iha área ne’ebé, ikus mai kaer duni suspeitu ida, no suspeitu ida seluk konsege halai lakon.

Vítima ho komunidade informa kedan bá Polísia Eskuadra Dom Aleixo, hodi halo atuasaun. La to’o de’it iha ne’e, parte PNTL mós kontinua buka tuir suspeitu ida seluk, to’o kaptura tán iha loron tuir mai.

Advertisement

“Suspeitu ida kaer primeiru ne’e, JSM, mak ita konsege kaer ona, no suspeitu ida seluk AR ne’e, ami kaer iha área Timor Lodge. Agora daudaun, suspeitu sira-ne’e iha sela komandu Munisípiu Díli, no sira ne’e mak uza motór laiha xapa matrikula no uza kapasete kompletu, hodi na’ok ema nia telefone no hadau ema nia sasán sira ne’e,”   Superintendente João Sancho Pires hateten.

Kazu kona-bá na’ok ka hadau ema nia sasán ne’e, akontese bá dala-haat ona, tanba simu keixa hosi komunidade ka vítima sira, maibé autór sei deskoñesidu. Maibé autór na’in-rua ne’ebé daudaun detein hela iha sela, ho Número Único Crime (NUC) 0363.

“Sira dala-ruma uza hela motór iha dalan, tanba ne’e mak ita-nia auto stop  iha Dili laran, sei hala’o nafatin. Problema ne’eb’e akontese dala-haat ne’e, ita la kaer ema, tanba ema keixa, ita loke prosesu de’it. Suspeitu sira ne’e mak uza modus ida na’ok ema nia telefone, rasta iha dalan ne’e. Maibé suspeitu na’in-rua ne’e, agora iha hele ne’e, hodi ita haree prosesu ne’e la’o bá oin,” João Sancho Pires hateten.

Komandu PNTL Munisípiu Díli, husu bá públiku tomak katak, bainhira hasoru problema ne’ebé hanesan, bele diretamente hato’o keixa bá Polísia, nune’e bele hala’o atuasaun polisiál.

Jornalista: Rogério Pereira Cárceres

Advertisement