Connect with us
Pakote Ahi

Defeza & Seguransa

Ró NRTL Camnasa Aat Totál Tanba Laiha Manutensaun

Published

on

Hatutan.com, (22 Jullu 2022), Díli—Oras-ne’e kondisaun Ró NRTL Camnasa kondisaun aat totál no labele utiliza hodi halo operasaun iha tasi-laran.

Seremónia desmentelasaun ba Ró NRTL Camnasa ne’ebé kondisaun aat totál iha Portu Díli, Sesta (22/07/2022). Foto/Hatutan.com.

Ho kondisaun ró ne’ebé avaria, Komandu FALINTIL Forsa Defeza Timor-Leste (F-FDTL), liuhosi Komandante Komponente Navál, Capitão da Mar e Guerra, Higíno das Neves deside halo desmantelasaun, abate ka destroisaun ba ró ne’e tanba problema iha manutensaun.

Lee Mós: 2023, Austrália Oferese tán Ró Patrullamentu Rua ba F-FDTL

Iha 2010, Governu Korea Súl oferese ró hamutuk tolu mai Timor-Leste, liu-liu F-FDTL atu ajuda komponente navál hodi aumenta ninia kapasidade operasionál iha área tasi.

Advertisement

Maibé, iha altura ne’ebá, Komponente Navál ninia guardiaun ka efetivu sira seidauk barak, nune’e sira entrega tiha ró rua ba Polisia Nasionál Timor-Leste (PNTL), iha Unidade Polisia Marítima (UPM), no hela ró ida hamutuk ho komponente navál.

Bainhira ró sira ne’e to’o iha TL, seidauk to’o semana ida, la konsege halo operasaun tanba iha efisiénsia ró ne’ebé tuan ona, baihira simu hosi governu Korea Súl.

“Timor ladun iha kultura manutensaun, entaun ida ne’e to’o agora ita haree katak, ró para de’it depois okupa kais ne’ebé Estadu dezenvolve atu ró bele mai para, depois hala’o atividade komérsiu nian. Ita para de’it iha ne’e, entaun Ministru Defeza deside komponente navál nia proposta deside katak, tenke desmantela. Entaun, ami desmantea tiha ohin,” Komandante Komponente Navál, Capitão da Mar e Guerra, Higíno das Neves hateten ba jornalista sira, hafoin seremónia desmentelasaun ba ró iha Portu Dili, Sesta (22/07/2022).

Capitão da Mar e Guerra, Higíno das Neves.

Ho desmantelasaun ba ró ne’e, parte komandu F-FDTL sei entrega ba Diresaun Jerál ba Jestaun Patrimóniu Estadu (DJJPE), atu haree oinsá mak bele halo fali jestaun.

Maibé, materiál sira hanesan kilat mak iha ró ne’e nia laran, inklui sasán importante sira seluk sei hasai hotu hodi bele uza ba militár nian.

Mákina sira ne’e sei bele uza ba treinu iha rai-maran, ba futuru guardiaun ne’ebé komandu F-FDTL sei presiza, hodi prepara ba futuru ró ne’ebé mak atu simu hosi Governu Australia iha 2023.

Advertisement

“Ró ne’e kuaze tinan 30 ona, ninia kapasidade ekonómika kuaze labele ona. Entaun, ida-ne’e mak mai to’o iha ne’e. Ita la konsege husu ba halo misaun saida de’it. Nia mai paradu hela de’it to’o agora. Ida-ne’e mak objetivu ami halo desmantela ró Camnasa,” Komandante Higíno das Neves, hateten.

Molok ne’e, Governu tau duni osan hodi halo manutesaun ba ró ne’e dala-ida. Maibé, tanba osan la sufisiente entaun manutensaun ida ne’e la efetivu.

Sira halo tiha manutensaun hotu, membru sira uza hodi halo treinu oitoan iha tasi, maibé la to’o fulan-rua ka tolu, ró ne’e labele halo operasaun no para de’it iha Portu Dili to’o ohin loron.

Hatán kona-bá sei hela ró hira mak daudaun ne’e Komponente Navál utiliza hodi halo operasaun iha tasi, Capitão da Mar e Guerra, Higino das Neves dehan, sei hela ró ida ne’ebé mak Governu sosa hosi Xina ho área operasaun entre tasi Jaco ho Betano.

Maibé, ró ida-ne’e mós hein de’it ona atu ba halo manutensaun no daudaun ne’e Komponente Navál iha de’it Lar ki’ik oan rua hosi Austrália.

Advertisement

Capitão da Mar e Guerra, Higino das Neves, dehan ró sira ne’e avaria ka aat, la’ós sala hosi membru sira, maibé kestaun iha koñesimentu atu iha dimínui ba área tasi nian, no komponente foun ne’ebé hari’i ne’e mós sei iha dezafiu.

Istória Naviu NRTL Camnasa

Seremónia desmentelasaun ba Ró NRTL Camnasa ne’ebé kondisaun aat totál iha Portu Díli, Sesta (22/07/2022). Foto/Hatutan.com.

Ró NRTL Camnasa, oferese hosi Governu Korea Súl mai Timor-Leste, liuhosi kooperasaun defeza entre nasaun rua.

Ró ne’e inkorpora iha misaun servisu nu’udár ró funu nian, iha instituisaun F-FDTL, Komponente Navál iha 11 Setembru 2011.

Guardiaun dahuluk ba ró ne’e, komanda hosi Primeiru Tenente Nicolau Sousa Guterres, hosi 2011 to’o 2017.

Guardiaun darukak nian, komanda hosi Segundu Tenente, Jacinto de Nascimento, hosi 2017 to’o 2021.

Advertisement

Guardiaun datolun nian, komanda hosi Segundu Tenente, Gusmão Gonçalves, hosi 2021 to’o ró ida ne’e hetan dekomísiu ka desmantelasaun.

Durante inkorpora iha Komponente Navál, Ró NRTL Camnasa hala’o misaun patrullamentu iha área kosteira parte norte, bazeia ba misaun servisu ne’ebé atribui hosi komandu F-FDTL, liuhosi Komponente Navál.

Maibé, iha Sesta 22 jullu 2022, bazeia ba despaixu hosi Ministru Defeza (MD), Filomino da Paixão de Jesus ho númeru rejístu 1143, 11 jullu 2022, hodi “abate navio Camnasa”, tanba ninia kondisaun inoperasionál ona.

Nune’e, komandu F-FDTL termina ona misaun operasionalidade hosi NRTL Camnasa no deside halo deskorpora ba ró ida-ne’e.

Jornalista: Rogério Pereira Cárceres  

Advertisement

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Defeza & Seguransa

Bankada CNRT Husu PNTL Halo Seguransa Másimu Kombate Kazu Na’ok

Published

on

Hatutan.com, (23 Maiu 2024), Díli- Parlamentu Nasionál (PN) liuhosi Bankada CNRT husu Polísia Nasionál Timor-Leste (PNTL) halo seguransa másimu iha fatin riskú ne’ebé identifikadu akontese beibeik  kazu na’ok hanesan hadau ema nian telefone.

(more…)

Kontinua Le'e

Defeza & Seguransa

PNTL Detein Autór Sobu Kadeira iha GMT Laran

Published

on

Hatutan.com, (21 Maiu 2024), Díli-Polísia Nasionál Timor-Leste (PNTL) Munisípiu Díli kaptura no detein autór ida ho inisial MdS tanba harahun kadeira tuur-fatin hamutuk 14 ne’ebé baibain adeptu sira tuur durante asiste Kampionatu Nasionál Boxe iha salaun Jinájiu Munisipál Díli (GMT-sigla Indonézia).

(more…)

Kontinua Le'e

Defeza & Seguransa

UPF Prende Kombustivel Litru 245 iha Memo-Maliana

Published

on

Hatutan.com, (17 Maiu 2024), Díli-Polísia Nasionál Timor-Leste (PNTL) husi Unidade Patrullamentu Fronteira (UPF) prende  kombustivel ho kuantidade litru 245 iha área Memo, Postu Administrativu Maliana, Munisipiu Bobonaro.

(more…)

Kontinua Le'e
Advertisement

Trending