Hatutan.com, (25 Jullu 2022), Díli—Ministériu Justisa (MJ), liuhosi Policia Ciêntífica e de Investigação Criminal (PCIC), iha 25 jullu 2022, halo detensaun ba suspeitu ida ho inisial MG iha sela detensaun PCIC, tanba lori osan falsu hosi nasaun Inglaterra mai Timor-Leste (TL).

Policia Ciêntífica e de Investigação Criminal (PCIC), iha 25 jullu 2022, halo detensaun ba suspeitu ida ho inisial MG iha sela detensaun PCIC, tanba lori osan falsu hosi nasaun Inglaterra mai Timor-Leste (TL).

Portavós PCIC, Octávio da Costa Araújo informa, suspeitune’e ekipa servisu pikete no prevensaun PCIC nian halo detenção em flagrante delito, tuku 09 liu iha área Banku Sentrál Timor-Leste (BCTL-Sigla Português), Díli.

Molok ne’e, suspeitu servisu iha Inglatera no foin fila iha Kinta (21/07/2022) foin lalais ne’e. PCIC halo detençõ em flagrante delito ba suspeitu ne’e tanba halo pose ka halo pasajen ba moéda falsa (osan falsu) ho valór $100, iha totál tahan 62.

“Entaun, aktu suspeitu ninian, ita prezume ba krime pasajen de moéda falsa, previstu iha punidu, konforme artigu 308, lei penál Timor-Leste. Entaun, suspeitu ita detein durante oras 72, hodi submete ba prosesu primeiru interrogatóriu judisiál,” Octávio da Costa Araújo hateten ba jornalista sira, liuhosi konferénsia imprénsa iha kna’ar fatin Caicoli, Segunda (25/07/2022).

Hosi totál osan $100 tahan 62 ne’e, ekipa espesialista PCIC nian foin halo ezame ba tahan 17 no tahan 45 mak sei iha prosesu ezaminasaun laran.

“Osan $100 ne’ebé mak suspeitu lori hamutuk 62 follas,” Octávio da Costa Aráujo informa.

Portavós PCIC, Octávio da Costa Araújo hala’o konferénsia imprénsa.

La’ós ne’e de’it, atu antesipa osan falsu sira ne’e labele sirkula tán iha fatin seluk, ekipa PCIC nian identifika kedan fatin balun hanesan iha loja ne’ebé mak suspeitu halo ona sirkulasaun ka uza ona osan hodi sosa sasán. Maibé, osan sira ne’e ninia paradeiru daudaun ne’e iha hotu ona banku.

“Osan refere nia pose hosi Inglaterra mak hodi tama mai iha ita nia nasaun. Osan ne’e nia lori direta, la’ós transfere liuhosi banku. Suspeitu agora ita detein hela iha sela PCIC ninian, ita informa ona ba Prokuradór Jerál Repúblika hanesan na’in ba asaun penál, hodi hein prosesu tuir mai,” Octávio Araújo esplika.

Hafoin halo ezaminasaun ba osan sira ne’e, PCIC sei submete ka entrega hotu kedan ba Ministériu Públiku no sai hanesan provas ba iha Tribunál Distritál Dili (TDD), hodi deside tuir lei.

Kona-bá osan sira ne’ebé mak molok ne’e suspeitu utiliza hodi sosa ona motorizada ida, sasán na’in sira deklara katak osan sira ne’e maioria orijinál.

Jornalista: Rogério Pereira Cárceres