Hatutan.com, (28 Jullu 2022), Díli—Tribunál Distritál Díli (TDD) iha Kinta 28 fulan ne’e, liu hosi juiz kolektivu Afonso Carmona, Evangelino Belo no Ercilia de Jesus kontinua hala’o julgamentu ba krime omesídiu ne’ebé deskonfia involve arguidu na’in ha’at ho inisial AC, NC, MS no DC tanba oho vítima CL, hakanek FC no estraga lezadu RC, EB, VS, SS no FN nia uma iha konfrontu entre grupu arte marsiais iha Ermera.

Foto ilustrasaun kona-bá konfrontu. Google.

Iha audiénsia kontinuasaun ne’e, lezadu FN deklara ba Tribunál katak, nia haree ho matan arguidu AC, NC no MS hamutuk ho ema deskoñesidu seluk hodi halo asaltu ba lezadu sira nia hela fatin ne’ebé lokaliza iha fahiluhan Ermera, hodi estraga lezadu sira nia sasan hodi baku rahun uma, vidru no koziña.

Lee Mós: Tribunál Kontinua Hala’o Julgamentu ba Kazu Konfrontu iha Ermera

“Bainhira sira tuda ha’u nia janela, ha’u hateke sai ba liur hetan kedan arguidu na’in tolu ne’ebé iha momentu ne’ebá la taka oin, maske ha’u la hatene katak sira na’in-tolu mak tuda ka la’e maibé tanba sira na’in-tolu mai hamutuk ho ema seluk ne’ebé taka oin metin hodi halo asaltu ba komunidade ne’ebé iha fatin ne’ebé no ema barak tanba mai ho grupu no balun asalta iha kraik, balun sa’e mai ami nian,” lezadu hanesan mós sasin deklara iha audiénsia.

Nia konta tuir katak, durante ne’e bairru ne’e laiha problema ho arguidu sira, maibé derrepente arguidu sira halo asaltu ba bairru fahiluhan, lori ho katana, tuda uma, estraga ema nia sasan barak.

Hafoin rona lezadu, juiz prezide marka hikas audiénsia ba loron seluk hodi kontinua rona lezadu sira seluk.

Antes ne’e, tuir akuzasaun hosi Ministériu Públiku (MP) katak, iha loron 06 fulan Dezembru tinan 2010, arguidu na’in-haat hamutuk ho ema deskoñesidu halo ataka ba lezadu sira nia hela fatin ne’ebé lokaliza iha Ermera hodi tuda, sobu uma, óho vítima CL no hakanek lezadu sira seluk.

Tanba ne’e, Ministériu Públiku (MP) ne’ebé reprezenta hosi Prokuradór Simão de Brito akuza arguidu sira ba prátika krime omesídiu ne’ebé previstu iha artigu 138 hosi kódigu penál TL.

Audiénsia julgamentu ne’e prezide hosi juiz koletivu Afonso Carmona, Evangelino Belo no Ercilia de Jesus, MP reprezenta hosi Prokuradór Simão de Brito no arguidu hetan asisténsia legál hosi Defensór Públiku.

Jornalista: Carmelita Isaac