Hatutan.com, (02 Agostu 2022), Díli—Membru FALINTIL Forsa Defeza Timor-Leste (F-FDTL), na’in 40, kontribui ran ba Ministériu Saúde (MS), liuhosi Hospitál Nacional Guido Valadáres (HNGV) Departamentu Banco de Sangue, Tersa (02/08/2022).

Membru FALINTIL Forsa Defeza Timor-Leste (F-FDTL), na’in 40 kontribui ran ba Ministériu Saúde (MS), liuhosi Hospitál Nacional Guido Valadáres (HNGV) Departamentu Banco de Sangue, Tersa (02/08/2022). Foto/Hatutan.com.

Membru na’in-40 ne’e, mai hosi Unidade FALINTIL (UF) na’in-10, Quartel Jenerál na’in-10, Polísia Militar (PM) na’in-10, no Komponente Aéreo (KA) na’in-10.

Lee Mós: Ema Na’in-Ualu Mate ho Dengue iha HNGV

Doasaun ran ne’e hodi komemora aniversáriu instituisaun F-FDTL  ne’ebé kompleta ona dala-47 (20 Agostu 1975 to’o 2022).

Advertisement

“Ran gota ida, ita bele kontribui ba ita nia maluk sira ne’ebé mak presiza tebtebes, atu bele salva sira nia vida iha ne’ebé momentu ida sira presiza tebtebes. Entaun, iha oportunidade ida ne’e, ha’u husu mós ba ita boot sira hotu atu bele hato’o netik ita-boot sira nia kontribuisaun ran ba ema hotu ne’ebé mak oras ne’e daudaun presiza,” Inspetóra Jerál iha Ministériu Defeza (MD), Josefa dos Reis Gonçalves hateten iha sala Auditóriu Kuartél Jenerál, Fatuhada, Díli.

Doasaun ran ida ne’e, la’ós de’it hosi membru F-FDTL sira maibé mós ba funsionáriu sira hotu iha MD atu bele kontribui mós sira nia ran turuk ida ba sidadaun sira ne’ebé karik presiza ho urjentemente.

Iha fatin hanesan, Xefe Departamentu Banco de Sangue, Januário da Cruz Freitas haktuir, atividade doasaun ran ida ne’e hala’o tanba iha kolaborasaun ho F-FDTL hodi komemora loron nasionál FALINTIL iha 20 Agostu 2022.

“Tuir loloos ne’e ita atu halo iha dia 11 Agostu, maibé tanba oras ida okupadu liu, ita hatene militár sira ne’e servisu. Entaun, ita tiha atividade ne’e mai oin no ohin ita halo iha Kuartél Jenerál, depois dia 05 Agostu ita sei halo iha komponente Naval, dia 08 agostu, ita sei halo iha Komponente Apoiu Servisu iha Metinaro,” nia hateten.

Enkuantu, benefísiu hosi daoasaun ran ne’e maka ema ne’ebé hasai ran, bele sente isin kmaan, hamenus risku ba stroke, reprodusaun raan foun, sai ema ne’ebé saudável no hatun kolesteról.

Advertisement

Estoke Ran iha HNGV Sufisiente

Januário da Cruz Freitas mós informa katak, daudaun ne’e estoke ran iha Banco de Sangue HNGV Bidau iha pakote 147 no kuantidade hirak ne’e sei sufisiente, atu atende kazu emerjénsia ruma bainhira akontese.

“Ida-ne’e bele responde ba kazu sira ne’ebé urjente liu. Kona-bá kazu normál ita garante katak, estoke ita bele oferese ba ema sira ne’ebé mak presiza, liu-liu moras sira ne’ebé mak tenke halo transmisaun ran,” nia hateten.

Durante ne’e, Timoroan barak hosi instituisaun Estadu oioin mak kontribui ona sira nia ran ho voluntariamente ba iha Banco de Sangue.

Pakote ran hirak-ne’e, sei oferese tutan ba família sira ne’ebé presiza. Maibé, dala-ruma estoke ran iha, ema la presiza, maibé bainhira laiha fali, pasiente sira presiza urjente loos.

Advertisement

“Tanba ne’e parte banco de sangue, husu atu ema hotuhotu ho konsiénsia katak bele ho voluntariamente, la’ós halo hanesan agora daudaun maibé ho individu husu konsiénsia atu bele fó ran ba ospitál,” Januário hateten.

Jornalista: Rogério Pereira Cárceres