Hatutan.com, (02 Agostu 2022), Díli-Komandu FALINTIL-Forsa Defeza Timor-Leste (F-FDTL) liuhosi Komisaun Rekrutamentu, fó sai katak, prosesu teste fíziku bá kandidatu sira ne’ebé mak oras ne’e la’o hela iha Centro de Formação e Treino (CFT) Metinaro, barak mak lakon iha altura, tanba altura la to’o.

Lee Mós : Rekrutamentu F-FDTL 2022, Laiha Rekomedasaun Espesiál

Tuir rekizitu kandidatu F-FDTL mane tenke ho  altura 165 sentímetru no feto nia altura tenke 158 sentímetru. 

Portavós komisaun rekrutamentu F-FDTL, Kapitaun Enjeñeira, José António Nunes da Costa, informa bá juventude no povu Timor-Leste tomak katak, daudaun ne’e Komandu F-FDTL hala’o hela teste bá kandidatu foun sira ne’ebé mak pasa ona iha primeira selesaun dokumentu.

Oras ne’e daudaun tama ona bá iha faze segundu bá teste fíziku, saúde, haree liubá altura, psikoteste, akadémiku. Signifika katak kandidatu sira sei tuir entrevista no teste eskrita.

Maske iha dokumentu Billete Identidade (BI) kandidatu sira nian hosi notariadu, hakerek altura to’o 145 bá leten. Maibé, bainhira ekipa komisaun rekrutamentu sira halo sukat fila-fali rezultadu hatudu, balu altura la to’o. 

“Buat ida mak ha’u hakarak hatete katak, kandidatu barak mak la liu iha altura. Meske iha sira-nia BI hakerek katak, altura 165 sentímetru talves sira sukat iha notariadu uza sapatu, maibé tuir sistema ne’ebé maka sukat iha Metinaro, tenke ain-tanan, hasai sapatu maka foin sukat,” Kapitaun Enjeñeira, José António Nunes da Costa, hateten ba jornalista sira liuhosi konferénsia imprensa iha Kuartél Jenerál F-FDTL, Fatuhada, Díli, Tersa (02/08/2022). 

Lee Mós : Governu Aloka Ona Osan ba Rekrutamentu F-FDTL 600 iha 2022

Durante prosesu teste ne’e, iha kandidatu balu mós la liu, tanba iha problema ho tilun, matan, no nehan. Kandidatu sira ne’e sei elimina kedan tuir rekizitu sira ne’ebé maka fó sai ona, nune’e mós bá teste saúde nian.

Komandu F-FDTL husu bá públiku, atu lalika rona boatu oioin iha kotuk ne’ebá. Depois teste sira ne’e hotu, instituisaun F-FDTL sei fó sai formalmente bá iha públiku kona-bá rezultadu teste sira.

Iha prosesu rekrutamentu ida ne’e, hosi parte instituisaun F-FDTL, la eziste rekomendasaun espesiál sira, tanba buat hotu-hotu bazeia bá rekezitu no  regra sira ne’ebé estabelese tiha ona.

Jornalista: Rogério Pereira Cárceres