Hatutan.com, (04 Agostu 2022), Díli—Asia Justice and Rights (AJAR) konsidera vítima violasaun seksuál ne’ebé akontese iha tempu pasadu, liu-liu iha tempu okupasaun Indonézia ne’ebé barak sei kontinua hetan diskriminasaun hosi família presiza tebes atensaun hosi Governu.

Diretór AJAR, Jose Luis Oliveira. Foto/Espesiál

Iha tinan 2012 ba leten AJAR servisu foka liu ba reparasaun ba vítima hodi foku liu ba ajudu vítima sira hodi hetan asisténsia sosiál ba asesu servisu iha Ministériu Solidariedade Sosiál no Ministériu Saúde (MS).

Lee Mós:AJAR Lori Timoroan 200 iha Indonézia Hasoru Família iha Timor-Leste

Maibé, bainhira ko’alia kona-bá reparasaun tenki hahú hosi rekoñesimentu ba sira nu’udár vítima maski lei própriu kaduka iha PN, enkuantu iha prosesu reparasaun materiál, sobrevivente hirak ne’ebé vulnerável liu hetan ona no reparasaun ba vítima violasaun direitus humanus sira balun nia kondisaun rekuperadu no balun moris di’ak inklui prizioneiru politiku.

“Maibé iha barak mós la konsege rekopera sira nia kondisaun ne’ebé merese hetan atensaun no asisténsia hosi Governu liu-liu ba vítima violasaun seksuál, tanba susar atu ko’alia sai saida mak akontese ba sira iha tempu pasadu, tanba barak mak hetan diskriminasaun hosi familia. Ida-ne’e mak difísil,” José Luis Oliveira ba Hatutan.com via telefónika, Kinta (04/08/2022).

Violasaun seksuál maioria ema Indonézia mak halo ba vítima ne’ebé konsege fo oan ba sira, maibé familia la apoiu iha kazu konkretu bainhira sira kaben fali ho mane seluk familia mane nian despreza vítima nia oan tanba konsidera la’ós sira nia oan.

Ho nune’e, Governu presiza fó atensaun ba sira, nune’e sira bele asesu ba apoiu hodi bele sustenta sira nia oan, tanba osan ne’ebé sira simu maioria familia mane nian mak hadau no to’o agora iha vitima balun seidauk bele ko’alia sai kona-bá sira nia kazu hirak ne’e.

Tuir dadus hosi asosiasaun vitima ACbit, kazu violasaun seksuál hamutuk ema na’in 218, atan seksuál 43, estraga ka pemerkosaan 28, kaben obrigatóriu 27 kazu no violasaun seksuál tipu seluk 120.

Jornalista: Carmelita Isaac