Hatutan.com, (08 Agostu 2022), Díli- Lider Karizmátiku  Kay Rala Xanana Gusmão husu timoroan hotu tenke iha unidade atu konsolida Fraternidade Umana hodi hametin pás no estabilidade bá dezenvolvimentu nasional iha Timor-Leste.

Lee Mós : Eurico Guterres ho Nia Grupu Prontu Kontribui bá Konseitu Fraternidade Umana

Abertura Tasa Avô Nana bá kategoria Koral-Vokal Group ne’ebé ho tema Konsolidasaun Fraternidade Umana, iha Salaun Hosana, Villa Verde, Díli, Segunda (08/08/2022). Foto/Hatutan.com

Xanana Gusmão iha  nia diskursu bá  abertura Tasa Avô Nana bá kategoria Koral-Vokal Group ne’ebé ho tema Konsolidasaun Fraternidade Umana, iha Salaun Hosana, Villa Verde, Díli, Segunda (08/08/2022), hato’o parabéns ba inisiativa husi Asosiasaun Turizmu Relijiozu- Timor Leste (ATR) ne’ebé reprezenta husi kada relijiaun iha Timor Leste.

Xanana fó parabéns bá lider relijiaun hotu tamba haree bá kotuk Timor -este iha problema ho fiar ne’ebé mai haketak timoroan sira kauza husi funu, maibé grasa Maromak Nian iha tempu ohin loron seidauk iha problema entre relijiaun no ida-ne’e mak presiza timoroan tomak konsolida nafatin atu sai ezemplu iha mundu.

Advertisement

“Ita hotu tuur hamutuk iha ne’e, hateke bá malu mesak maun-alin no feton ho nan de’it tempu ona hamutuk konsolida Fraternidade Umana bá Timor-Leste ida prósperu,” Xanana Gusmão hateten.

Problema oin-oin mosu iha Timor-Leste, joven sira baku malu maibé tuir Xanana too ohin loron seidauk iha ema katóliku ida baku ema musulmanu, ida nune’e mós seidauk iha protestante ida baku budista ida no hahalok sira hanesan ne’e tenke kontinua no mantein nafatin Fraternidade Umana entre relijiozu hotu ho di’ak hodi la haree bá koor, rasa, étniku no relijiaun tamba hotu-hotu timoroan.

“Ho ida-idak  nia fiar ita respeita malu, tamba respeita malu halo ema hamutuk, hametin unidade no amizade atu hamutuk halo di’ak bá Timor -Leste,” Xanana tenik.

Lee Mós : Dokumentu Fraternidade Umana Lori Horta Hasuru Lopes da Cruz ho Eurico Guterres

Presiza Ema Konsolida Buat Di’ak Sira iha Mundu

Advertisement

Prezidente ATR-TL, Pe. Ângelo Salsinha iha nia diskursu hateten, mundu nakonu ho buat di’ak oin-oin, kultura, relijiaun no buat di’ak seluk, maibé presiza ema atu konsolida buat di’ak sira ne’e hamutuk.

Ema hotu presiza hamutuk ne’e mak hanaran Fraternidade Umana hodi halo di’ak hodi hafurak planeta ne’e ho ksolok oin-oin, atu ema hotu goza tuir Maromak nia hakarak bá tinan naruk. Fiar sai sentru bá ema nia moris no atividade sira hodi promove valores kulturál, sosiál, relijiozu no liliu fiar nia vertude.

ATR-TL nia lema mos hatuur Fiar nu’udár sentru tamba Fiar lori ema bá unidade iha diversidade, kultura, rasa no kor oin-oin, ne’e tenke halo ema unidade tanba umanidade ne’e ida de’it no hosi ne’e lori ema bá amizade no iha amizade ema la haree ona bá buat seluk, hotu-hotu hanesan maun-alin tuir Fraternidade umana ne’ebé mak Amu Papa Francisco promove daudaun atu oinsá mak mundu ne’e haree-malu hanesan maun-alin.

“Buat sira ne’e hotu sei kompletu bainhira liga ho natureza divina, katak buat hotu mai hosi ida ne’ebé ás liu mak Maromak,” Pe. Ângelo Salsinha hateten.

Saserdote ne’e hatutan agradese ba ekipa avô Nana ne’ebé fo konfiansa ba ATR-TL hodi realiza eventu kompetisaun tasa Avô Nana. Nune’e ba oin ATR-TL iha mehi atu halo eventu inter relijiozu no nafatin iha esperansa ho mehi boot atu nafatin hetan tulun husi avô Nana ho ekipa.

Advertisement

Iha fatin seluk, prezidente komisaun organizadora, Glenda M. F. de Carvalho hateten tema bá kompetisaun Koral-Vokal Grupu ba tasa Avô Nana mak Konsolidasaun Fraternidade Umana bazeia bá dokumentu ofisial ne’ebé Amu Papa Francisco ho Gran Imam husi Meskita Al-Azhar hasai no Timor-Leste rasik adopta nu’udár dokumentu nasional ida hodi integra iha kurríkulu.

Nia afirma iha objetivu prinsipál rua iha serimónia kompetisaun Koral-Vokal Grupu tasa Avô Nana mak atu selebra lider Karizmátiku Xanana Gusmão nia aniversáriu ba dala-76 no ida seluk mak atu hakle’an no konsolida Fraternidade Umana bá foin-sa’e sira liu husi múzika hodi hametin unidade.

“Ita hanoin katak ho múzika bele hametin unidade no fraternidade umana iha diversidade kultura, relijiaun, rasa no valores identidade sira seluk,” Glenda M. F. de Carvalho hateten.

Total grupu Koral no Vokal Grupu ne’ebé sei kompete iha tasa Avô Nana hamutuk grupu 24, koral iha grupu 19 ho total partisipante 165 enkuantu vokal grupu iha 5 ho total partisipante 86.

Bá manan na’in sira iha kada modalidade primeiru lugar sei hetan osan $1500 ho tasa inklui sertifikadu, segundu lugar osan $1000 ho tasa inklui sertifikadu, terseiru lugar osan $600 ho tasa inklui sertifikadu, kuartu lugar osan $400 ho tasa inklui sertifikadu no ikus liu kintu lugar osan $300 ho tasa inklui sertifikadu. Sei iha mós prémiu ba grupu favoritu ho osan $200 ho tasa inklui sertifikadu.

Advertisement

Jornalista: Vito Salvadór