Hatutan.com, (31 Janeiru 2023), Díli- Konferénsia Espiskopál Timorense (CET, sigla portugés), liuhosi Komisaun Nasionál Justisa, Pás no Integridade Kriasaun (JPIC, sigla portugés), husu atu sarani no sidadaun sira nafatin kaer metin bá prinsípiu Fraternidade Umana hodi moris hanesan maun-alin hodi kontinua sai hanesan masin no roman bá sosiedade.

Lee Mós : Timoroan Tenke Sai “Masin” Fraternidade Umana

Komisaun Nasionál Justisa, Pás no Integridade Kriasaun (JPIC, sigla portugés). Foto/Elio dos Santos da Costa

Diretór Programa Edukasaun no Sidadania JPIC, Pe. Domingos Soares “Maubere” hateten, ohin komisaun Nasionál Justisa, Pás no Integridade Kriasaun mai hasoru malu ho Prezidente Repúblika hodi ko’alia kona-bá parseria Igreja no Estadu, liu-liu oinsa atu kontinua hametin prinsípiu Fraternidade Umana iha sosiedade nia moris.

Ko’alia kona-bá Fraternidade Umana ne’e nu’udar kna’ar Igreja nian atu hala’o, fraternidade umana katak hotu-hotu moris hanesan maun-alin tanba hotu-hotu mesak Maromak nia oan, tan ne’e hadomi Maromak no hadomi ema seluk.

“Importante atu hotu-hotu hanoin no refleta hikas sentidu loloos hosi fraternidade umana, tanba konflitu barak demais ne’ebé ema maun-alin de’it mak halo at bá malu, estraga malu entaun oinsá mak ita atu hala’o hodi fila fali bá ita nia abut sira, ba ita nia kultura hodi hanoin ita mesak Timoroan, ita mesak sarani no iha Igreja mak ita nia uma lisan boot hotu-hotu tenke hakbesil iha ne’eba no husi ne’e mak ita tama ba iha sosiadade hanesan masin no naroman,” Padre Domingos Soares “Maubere” bá jornalista sira iha Palásiu Prezidensiál, Tersa (31/01/2023).

Ko’alia kona-bá fraternidade umana no moris hakmatek buat importante mak justisa, ema dala barak la komprende malu, la rona malu tanba justisa ne’e laiha no dala ruma ema nia moris la fó importánsia ba valor sira ne’ebé fó influénsia direita ba ema nia moris ne’e rasik.

“Fraternidade Umana ne’e doutrina Igreja nian tanba ne’e hotu-hotu tenke haree malu hanesan maun-alin no hotu-hotu Maromak nia oan liu hosi fiar ne’ebé iha,” Padre Domingos Maubere tenik.

Prezidente Repúblika (PR), José Ramos-Horta fó sujestaun atu oinsá mak Igreja fó resposta uitoan bá arte-marsiál sira, bá joven sira no okupa joven sira ho aktividade uma kreda nian, oinsá Igreja mós bele iha Peace Corp ne’ebé bele bá hela iha populasaun nia leet hodi aprende no tulun sosiadade ida ne’e.

Xefe Estadu mós husu atu iha formasaun morál, rona malu no aprende nafatin, atu hosi formasaun morál ne’ebé ema simu hosi família, eskola, sosiedade no Igreja bele sai sasukat ida atu resolve problema sira, liu-liu liga ho atetude ema nian.

Iha sorumutu ne’e, Prezidente Repúblika ho JPIC nasionál ko’alia mós pontu ida importante kona-bá eleisaun ne’ebé sei mai, tanba komisaun justisa no pás mós iha kna’ar importante atu bele ajuda povu hodi bele oinsá hili didi’ak lideransa sira.

Prezidente Repúblika iha nia deklarasaun antes mós husu atu partidu ida-idak aprejenta nia programa durante kampañia ba eleisaun parlamentár atu nune’e programa sira ne’ebé aprejenta hatudu momoos objetivu ba povu ne’e ninia di’ak no oinsá estratéjia polítika husi partidu polítiku sira atu resolve problema sira ne’ebé povu infrenta.

Jornalista: Vito Salvadór