Hatutan.com, (09 Agostu 2022), Díli—Governu liuhosi Ministériu Interiór (MI), prepara ona rezolusaun ida, hodi regula sidadaun sira hosi Repúblika Indonézia (RI) ne’ebé hakarak viájen tama mai territóriu Timor Leste tenke selu viza.

Vise-Ministru Interiór (MI), António Armindo.

Vise Ministru Interiór (MI), António Armindo levanta ona iha Konsellu Ministru (KM) no Primeiru Ministru (PM), Taur Matan Ruak ho Ministra Negósiu Estranjeiru no Kooperasaun (MNEK) sei haree asuntu ida-ne’e.

“Agora daudaun Timoroan sira kuandu tama ba Indonézia selu on arrival, maibé sidadaun Indonézia mai TL ne’e tama gratuita de’it. Tanba ne’e mak ita hetan ona orientasaun hosi Primeiru Ministru atu halo fali rezolusaun ida, hodi anula tiha rezolusaun ida uluk ninian, nune’e bele hahú aplika fali vistu ba sidadaun sira Indonézia sira tama mai TL, tenke selu,” António Armindo hateten iha Vilaverde Díli, Tersa (09/08/2022).

Rezolusaun ida-ne’e, António Armindo haruka ona ba gabinete Primeiru Ministru, Taur Matan Ruak nune’e iha Kuarta (10/08/2022), bele hahú tau iha ajenda diskusaun Konsellu Ministru.

Rezolusaun anteriór ne’e mosu tanba iha konkordánsia, entre governu nasaun rua nian, no konsege aplika to’o iha situasaun Estadu emerjénsia foin lalais ne’e.

Hafoin ultrapasa tiha situasaun ida-ne’e, Governu Indonézia hahú aplika fali selu vistu ba timoroan sira ne’ebé mak atu tama ba Indonézia.

“Entaun, ita mós tenke hahú hanoin ona atu sidadaun Indonézia mai TL mós tenke selu sira nia vistu turizmu ne’e, nune’e bele justu. Antes ne’e, ita bá ne’e, gratuita. Agora, ba oin, nasaun rua tenke selu hotu,” António Armindo hateten.

Tuir planu, iha Kuarta (10/08/2022), Konsellu Ministru sei halo disksauun ba asuntu ida-ne’e no bainhira iha ona aprovasaun ba rezolusaun ne’e, ba oin, sei hahú fali-fali aplikasaun selu taxa ba sidadaun Indonézia sira ne’ebé mak hakarak tama iha TL. Sira tama iha TL, sei hela durante loron 30 depois halo estensaun, maibé tenke selu.

“Rezolusaun ne’e kuandu aprova ona iha Konsellu Ministru, naturalmente tenke selu. Pressu selu ne’e, baibain bazeia ba lei imigrasaun selu $35. Tanba ne’e, rezolusaun governu nian de’it, Primeiru Ministru, hanesan mós Ministru Interiór kuandu asina ona, imigrasaun implementa ona,” António Armindo, hateten.

Ministériu interiór, submete ona karta ida ba Ministériu Negósiu Estranjeiru no Kooperasaun (MNEK), atu koordena no atualiza informasaun ne’e ho MNEK Indonézia iha TL.

Jornalista: Rogério Pereira Cárceres