Hatutan.com, (10 Agostu 2022), Díli— Governu liuhosi sorumutu ordinária Konsellu Ministru (KM), iha Kuarta 10 Agostu 2022, aprova ona dekretu-lei dahuluk, kona-bá estatutu profisionál ba pesoál polisiál sira, iha instituisaun Polisia Nasionál Timor-Leste (PNTL).

Membru PNTL husi Unidade Espesiál Polísia (UEP). Foto/Hatutan.com

Diploma ida ne’e ninia objetivu maka atu fó ba PNTL estatutu profisionál ba pesoál rasik, ho perspetiva atu hasa’e kondisaun servisu ba pesoál, haree ba iha parte seluk, hasa’e kuadru motivasionál no autoestima polísia PNTL.

Lee Mós: KM Aprova Projetu Dekretu-Lei ba Alterasaun Orgánika PNTL

“Liuhosi diploma ida ne’e mós, atu reforsa PNTL ninia kapasidade hodi hasoru responsabilidade ne’ebé aumenta ba beibeik, ezijénsia no nesesidade efikásia atu fó servisu públiku Seguransa nian, liga ba nivel nesesidade sosiedade timoroan nian, ne’ebé sai informada, kompleksa no ezijente liután, no, iha sorin seluk, hodi adapta membru PNTL sira ba realidade sosiál foun no ba dezafiu sira país ne’e no mundu atuál nian,” Hatutan.com sita komunikadu.

Iha biban ne’e, konsellu ministru mós, aprova ona dekretu-lei daruak, ho objetivu atu halo alterasaun ba rejíme remuneratóriu PNTL nian. Hakarak ho alterasaun ida-ne’e kumpre ho saida ne’ebé hakerek iha númeru 2 husi artigu da-24 Dekretu-Lei númeru 2/2022, loron 12 fulan-janeiru, ne’ebé aprova ona husi rejime remuneratóriu PNTL nian, iha ne’ebé Estadu kompromete ona atu fó iha tinan 2023, aumentu porsentu 15% ba remunerasaun baze membru sira PNTL nian.

Aleinde aumentu ba remunerasaun baze ne’ebé prevee ona, halo atualizasaun ba diploma, haree ba alterasaun ba Orgánika Polísia Nasionál Timor-Leste (PNTL) ne’ebé foin aprova no haree mós ba nesesidade atu halo redasaun ida ne’ebé objetiva liután, hodi fasilita interpretasaun ba artigu balun ne’ebé inklui iha versaun diploma ne’ebé vigora hela.

Projetu Dekretu-Lei rua, ne’ebé aprezenta hosi Primeiru-Ministru no Ministru Interiór, Taur Matan Ruak, no hosi Vise-Ministru Interiór, António Armindo.

Konsellu ministru aprova mós projetu Rezolusaun Governu, aprezenta hosi Ministru Edukasaun Juventude Desportu (MEJD), Armindo Maia no hosi Sekretáriu Estadu Juventude no Desportu, Abrão Saldanha, ba kriasaun Festivál Nasionál Desportu.

Objetivu hosi kriasaun festivál maka halibur no hametin populasaun timoroan ho objetivu selebra atividade desportiva, ho promosaun ne’ebé inerente ba atividade fízika no enkoraja desportu iha sira-nia modalidade, iha planu ba edukasaun fízika iha kategoria desportu nian hanesan tradisionál, rekreativu, inkluzivu no alta kompetisaun.

Festival ne’e objetivu, atu rezumu, asume hanesan forma ida ne’ebé promove hamutuk ho joven sira, maibé no mós populasaun sira seluk, importánsia hosi desportu no atividade fízika, ninia benefísiu sira, ekonómiku, polítiku no iha area saúde públika nian.

Festivál ida ne’e, sei sai eventu ida ne’ebé sei hala’o iha kada tinan, ne’ebé nia estrutura, kalendarizasaun no regra sira sei define, tinan-tinan mós, husi Ministériu responsavel ba área desportu nian.

Konsellu Ministrus aprova ona projetu Rezolusaun Governu ne’ebé aprezenta husi Ministra Negósius Estranjeirus no Kooperasaun (MNEK), Adaljiza Albertina Xavier Reis Magno, ne’ebé aprova akordu entre Governu Repúblika Demokrátika Timor-Leste nian no g7+, kona-ba montante, finalidade no uzu ba subsídiu ne’ebé atu fó husi Repúblika Demokrátika Timor-Leste ba organizasaun intergovernamental.

Ho akordu ida-ne’e, ne’ebé asina husi parte rua iha loron 21 fulan-marsu tinan 2022, ninia objetivu mak atu kontribui ba atividade sira g7+ nian, Governu sei fó, entre tinan 2022 no 2027, montante dolar amerikanu millaun ida, tinan-tinan.

Subsídiu ida-ne’e tenke uza ba promosaun kooperasaun nian entre Estadu-Membru sira no ba finansiamentu despeza sira funsionamentu g7+ nian no ba organizasaun husi reuniaun ministériu nian tinan-tinan.

Ikusliu, Konsellu Ministrus delibera ona aprova prosedimentu aprovizionamentu, tuir konkursu públiku internasionál, hodi halo kontratu públiku sira ba konstrusaun eskema irrigasaun sira iha Laivai, iha Munisípiu Lautem no iha Gallata iha Munisípiu Baukau, tuir projetu ne’ebé aprezenta husi Ministru Agrikultura no Peskas (MAP), Pedro dos Reis.

Projetu irrigasaun Galata sei kobre ho ektare 600 no sei benefisia uma-kain hamutuk 750. Projetu ba irrigasaun Laivai sei kobre ektare 300, ne’ebé inklui natar ne’ebé eziste ona no sei benefisia ba uma-kain hamutuk 434.

Jornalista: Rogério Pereira Cárceres