Hatutan.com, (13 Agostu 2022), Díli—Ekipa konjunta kompostu hosi Servisu Nasionál Intelijénsia (SNI), Ekipa intelijénsia J2 FALINTIL-Forsa Defeza Timor Leste (F-FDTL), ho Polísia Sientífika Investigasaun Kriminál (PCIC)    konsege deskobre suspeitu na’in-sia (9) ne’ebé deskonfia envolve iha aktu ilísitu tranzasaun droga.

Foto Ilustrasaun Droga. Foti Hosi Google

Liuhosi operasaun no identifikasaun bá lokalizasaun durante loron rua; hosi loron 11 to’o loron 12 fulan-Agostu ne’e, konsege deskobre suspeitu sira ne’ebé sempre halo atividade tranzasaun estupefasiente.

Informasaun ne’ebé  Hatutan.com asesu hosi fonte sekreta haktuir katak tempu ne’ebá ekipa konjunta forma estratéjia operasaun intelijénsia hodi rekolla informasaun hosi fonte oioin no ikus konsege kaptura no detein suspeitu ida ho inisiál I iha fatin rua tanba suspeitu ne’e asegura hela evidénsia droga ho tipu hasis ka ganja.

Ekipa konjunta lori kedas suspeitu ne’e hodi halo identifikasaun nune’e bele dezenvolve di’ak liután rede ka sindikatu envolvimentu hosi suspeitu sira seluk tan.

Hosi identifikasaun ne’e, fonte sekreta ne’e haktuir, konsege rekolla informasaun komplementariu no buka tuir kedas suspeitu ida tan hela iha  área Delta-II no konsege kaptura suspeitu hodi halo mós buska iha suspeitu nia fatin hodi rekolla mós prova dorga  ho tipu hasis ka ganja  ne’ebé suspeitu sempre fa’an.

Hosi suspeitu ida ne’e, ekipa konjunta dezenvolve tan investigasaun no identifikasaun. Nune’e, iha loron tuir mai, Sesta (12/08/2022), ekipa konjunta buka tuir informasaun kona-bá tranzasaun droga ne’e no tempu ne’ebá ekipa konjunta halo operasaun iha área Bairru Grillos hodi detein tan suspeitu ho inisiál SSOCL no hetan mós prova krime hanesan droga ho modelu xokolate ka hasis ne’ebé suspeitu ne’e rai iha nia kuartu laran.

Ekipa konjunta kontinua dezenvolve investigasaun no deskobre na’in bá droga  ne’ebé hela iha área Pantai Kelapa.  Nune’e, ekipa halo buska no konsege rekolla  evidénsia hanesan pipeta ne’ebé suspeitu sira sempre utiliza hodi administra droga ho tipu sabu-sabu no droga xokolate ka hasis 1/5.

Ekipa konjunta lori kedas evidénsia sira ne’e hamutuk ho suspeitu buka tuir suspeitu ho inisiál MAA  iha área Palapasu, Díli.

Fonte sekreta ne’e konta tuir katak bainhira ekipa konjunta to’o iha suspeitu MAA nia hela fatin nia sei toba hela no konsege rekolla prova droga ho tipu sabu-sabu grama 0,50 no hetan mós osan ho montante $4,139.25. Osan  sira-ne’e, parte ekipa konjunta deskonfia nu’udár rezultadu hosi transasaun droga durante ne’e.

Hosi investigasaun bá suspeitu MAA deskobre hikas suspeitu seluk ho inisiál MSGS ne’ebé fortifika ekipa konjunta nia deskonfiansa hodi halo mós detensaun no kapturasaun bá suspeitu MSGS iha área Farol.

Hosi suspeitu MAA nian hetan mós evidénsia hanesan plástiku guarda sabu-sabu, metavitamina plástiku mutin ida ho grama 1,0 no osan ho montante Rp.4,139.000.

Ekipa konjunta deskobre mós suspeitu seluk ho inisiál AY no bainhira halo detensaun konsege foti mós evidénsia hanesan pipeta  ida, hashish ida ne’ebé uza tiha ona.

Hosi fali suspeitu seluk ho inisiál SSOCL konsege foti mós evidénsia hasis plástiku rua. Suspeitu hirak ne’e, tuir fonte sekreta ne’e katak  detein hela iha sela detensaun Polísia Sientífika Investigasaun Kriminál (PCIC)  hodi kompleta oras 72 nia laran  molok submete bá primeiru interrogatóriu iha Tribunál Distritál Díli (TDD).

Informasaun seluk ne’ebé hatutan.com rekolla hosi fonte seluk no halo identifikasaun bá suspeitu sira ne’e katak maioria suspeitu sira ne’e mesak ema sivilizadu nia oan de’it.

Iha suspeitu na’in rua ka tolu nia aman eis membru Governu no suspeitu balun fali iha nia empreza rasik no balun iha relasaun besik emboot ida iha rai ida-ne’e.

 Jornalista : Rogério Cárceres/fonte oioin