Hatutan.com, (18 Agostu 2022), Díli—Ministériu Públiku (MP) liu hosi Prokuradór Rogério Viegas sei hatama rekursu kontra desizaun primeira instánsia ba kazu ilísitu bá droga ne’ebé antes ne’e Tribunál Distritál Dili (TDD) liu hosi juiz José Gonçalves aplika medida koasaun Termu Identidade Rezidénsia (TIR) no aprezentasaun periódika ba arguidu na’in-sia DGS, MM, B, MAA, AY, SSO, M, CRM ho J.

Distritál Dili (TDD) liu hosi juiz José Gonçalves aplika medida koasaun Termu Identidade Rezidénsia (TIR) no aprezentasaun periódika ba arguidu droga na’in-sia.

Konteúdu hosi rekursu ne’e rasik maka, husu atu halo alterasaun ba medida koasaun TIR no aprezentasaun periódika ba fali Prizaun Preventiva.

Lee Mós: TDD Aplika TIR bá Arguidu sira Kazu Ilísitu bá Droga

“Daudaun ha’u halo hela rekursu ba prosesu ne’e no tuir prazu loron 15 hahú hosi despaixu ne’e tun. Tanba ne’e, sei iha tempu hodi prepara rekursu no konteúdu rekursu, tanba antes ne’e iha alegasaun ba primeiru interrogatóriu MP husu aplika medida koasaun prizaun preventive. Maibé ikus mai TDD aplika fali TIR no aprezentasaun periódika. Tanba ne’e, MP la konkorda hodi halo rekursu atu altera medida koasaun TIR no aprezentasaun periódika ba fali Prizaun Preventiva,” Rogério Viegas ba Hatutan.com via telefónika, Kinta (18/08/2022).

Rekursu refere ba medida koasaun no ba prosesu investigasaun sei la’o tuir regra ne’ebé iha hodi asegura segredu justisa.

Antes ne’e Kuarta (17/08/2022), Ministru Justisa (MJ) Tiago Amaral Sarmento preokupa ho medida koasaun Termu Identidade Rezidénsia (TIR) no aprezentasaun periódika ne’ebé TDD liu hosi juiz José Gonçalves aplika ba arguidu na’in-sia ba kazu ilísitu droga.

Tanba ne’e, MJ husu ba MP atu halo rekursu kontra desizaun primeira instánsia ba arguidu DGS, MM, B, MAA, AY, SSO, M, CRM ho J.

“Faze kontinuasaun sei iha no MP sei halo akuzasaun no kontinua prosesa hodi aprezenta fali ba Tribunál bainhira iha ona provas sufisiente,” Tiago Amaral Sarmento hateten.

PM Taur Lakohi Komenta Desizaun Tribunál

Primeiru Ministru (PM), Taur Matan Ruak, rezeita atu fó  komentáriu relasiona ho preokupasaun públiku nian bá desizaun Juis singulár José Gonçalves, ne’ebé aplika  medida koasaun Termu Identidade Rezidénsia no Aprezentasaun Periódiku bá arguidu na’in-sia (9) kazu ilísitu droga.

Primeiru-Ministru Taur Matan Ruak hateten sei la halo komentáriu tanba konsidera ida-ne’e servisu justisa nian.

“Ne’e kestaun justisa nian, ha’u laiha komentáriu ida,” Taur Matan Ruak hateten hafoin hasoru malu ho Prezidente Repúblika José Ramos-Horta iha Palásiu Prezidensiál, Kinta (18/08/2022).

Xefe VIII Governu ne’e hatutan kona-bá implementadór lei ne’e, Timor Leste iha Ministériu Públiku (MP), iha Polísia Sientífika Investigasaun Kriminál (PCIC), no iha Tribunál nune’e hosik sira servisu.

Iha Kodigu Prosesu Penal, TIR, aprenzentasaun periodika no Prizaun Preventiva hanesan medida ida hodi garante arguidu sira nia prezensa durante prosesu investigasaun tanba ne’e la signifika katak prosesu ba kazu ne’e hotu ona.

Antes ne’e, TDD liu hosi Primeiru Interogatoriu ne’ebe prezide hosi juiz singular José Gonçalves deside aplika medida koasaun Termu Identidade Rezidensia (TIR) no Aprezentasaun Periodika fulan ida dala ida ba arguidu na’in-sia (9) ho inisial DGS, MM, B, MAA, AY, SSO, M, CRM ho J ne’ebé deskonfia envolve iha kazu ilísitu bá droga.

Jornalista: Carmelita Isaac/Vito Salvadór