Hosi : Francisco Belo Simões, xefe redasaun

Foin tinan-ida (1), hosi loron 20 fulan-Agostu 2021-2022, Hatutan.com eziste ofisial  nu’udár mídia online iha Timor-Leste. Espetativa, esperansa no espíritu atu serbí povu ida-ne’e hodi hakonu públiku nia informasaun sai nafatin mandatu bá Hatutan.com kontinua eziste no serbí.

Lee Mós : Dalan sei naruk: Tinan Ida Eziste, Hatutan.com Mosu ho Deferénsia

Reuniaun kada fulan Hatutan.com nian ne’ebé sai ona kultura iha Hatutan.com. Foto/Dok.Hatutan.com

Hatutan.com nu’udár meiu komunikasaun sosiál ho karater multimedia ho plataforma online ne’ebé mai hosi órgaun komunikasaun sosiál RAYA MEDIA & ENTERTAINMENT, Unipessoal, Lda. Sede : Rua. Av. de Portugal, Nú. 74, Díli, Timor-Leste.

Fundamentasaun estabelese Hatutan.com atu sai fonte informasaun ida bá povu Timor-Leste ne’ebé iha kbiit elabora produtu informasaun no notísia-sira hodi fasilita públiku hetan informasaun ho kredivel iha eskalaun nasionál, rejionál no internasionál.

Hatutan.com nu’udár meiu komunikasaun sosiál ne’ebé eziste iha Timor-Leste ho karakter multimedia ne’ebé bele mós sai sentru opiniaun públiku, forum diskusaun públiku no mós sentru edukasaun-formasaun peskiza no dezenvolvimentu komunikasaun aplikada.

Hatutan.com kaer metin nafatin bá nia filozofia “Notísia bá Mudansa” ho nia vizaun no misaun, “atu forma sosiedade demokrátiku iha Timor-Leste ne’ebé kontribui bá dezenvolvimentu nasionál”.

Foin-tinan ida (1) kompara karik ho loro-matan foin mak nakaras hosi lorosa’e. Sasidik no sasadik oioin, sei hafutar iha dalan oin iha Hatutan.com nia hakat sira. Maibé, ho apoiu hosi povu ida-ne’e hotu, Hatutan.com  buka atu enfrenta tuir kbiit ne’ebé iha.

Iha tinan-ida (1) nia laran ne’e Hatutan.com hanesan mídia ida ho plataforma digital (online)  buka hala’o nia knar ho objetividade no independente  tuir norma ka baze legal sira ne’ebé estabelese ona iha Timor-Leste, liuliu kódigu étika, Lei Komunikasaun Sosiál   no prinsípiu universal jornalizmu nian.

Hatutan.com nia atividade reuniaun rutina kada fulan. Foto/dok.Hatutan.com

Hatutan.com eziste ho hakarak de’it mak kontribui bá  hametin Estadu Demokrátiku, hala’o funsaun kontrola sosiál no importante liu mak hakonu públiku nia informasaun no promove Liberdade ko’alia no Informasaun nian iha Artigu 40 Konstituisaun RDTL ho Artigu 41 kona-bá Liberdade Imprensa no Komunikasaun Sosiál nian.

Artigu 40 (Liberdade ko’alia no informasaun ninian)

1. Ema hotu-hotu iha direitu ba liberdade ko’alia nian no direitu atu hetan informasaun ruma, no tan informasaun loloos nian.
2. Liberdade ko’alia no informasaun ninian labele hetan limitasaun hosi sensura ruma.
3. Lei maka sei regula direitu no liberdade ne’ebé temi-sai iha artigu ida-ne’e, ho baze iha imperativu kona-bá respeitu bá Lei-Inan no respeitu ba ema ida-idak nia dignidade.

Artigu 41 (Liberdade imprensa no komunikasaun sosiál ninian)

1. Iha garantia ba liberdade imprensa nian no ba meius seluk tan kona-ba komunikasaun sosiál.
2. Halo parte liberdade imprensa nian, liberdade ko’alia nian no hamoris/hakiak jornalista sira, asesu bá fonte kona-bá informasaun, liberdade editoriál, protesaun ba independénsia no bá segredu profisionál no mós direitu atu halo jornál, publikasaun ninian no meius difuzaun selu-seluk tan.
3. Labele permite monopóliu kona-bá meiu komunikasaun sosiál sira.
4. Estadu hametin liberdade no independénsia ba órgaun públiku kona-ba komunikasaun sosiál, husi podér polítiku no podér ekonómiku.
5. Estadu hametin ezisténsia ba servisu públiku ida ba rádiu no televizaun, ne’ebé sente livre, haree mós ba objetivu seluk, hanesan protesaun no divulgasaun kona-ba kultura no tradisaun Repúblika Demokrátika Timór-Leste nian, no fó garantia ba ema ida-idak atu hateten nia hanoin rasik.
6. Estasaun emisora ba radiufuzaun no rádiu televizaun nian bele hala’o de’it ho lisensa tuir lei haruka.

Reuniaun projesaun redasaun Hatutan.com. Foto/dok.Hatutan.com

Iha esperansa boot hosi públiku bá Hatutan.com atu kontinua sai nafatin “pioneiru” (pelopor) mídia online ho publikasaun notísia sira ka produtu jornalistiku sira ho kredivel, balansu no independente. Nune’e, ho tinan-ida ne’e, aproveita momentu sira tuir mai atu maduru liután, kontinua  kriativu no inovativu.

Kona-bá Hatutan.com

Hatutan.com hala’o publikasaun bá edisaun dahuluk (edisi perdana) iha loron 20 fulan-Agostu 2022. Nune’e, nu’udár mídia profisionál tenke “obedese”  bá obrigasaun Lei Komunikasaun Sosiál (KomSos) hodi bá rejistu iha Conselho de Imprensa de Timor Leste no ikus mai hetan sertifikadu  ofisial hosi órgaun reguladór komunikasaun sosiál ne’e iha loron 03 fulan-Dezembru 2021.

Ideia hamosu naran Hatutan.com  ne’e aprezenta hosi Jenerál Manager Hatutan.com, Syeilla Surayya S. Ricardo, iha enkontru dahuluk ne’ebé hala’o iha edifísiu  RAYA MEDIA & ENTERTAINMENT, Unipessoal, Lda.  

Naran Hatutan.com ne’e hetan aprovasaun hosi proprietáriu mídia ne’e nian, Raul dos Reis Lemos,  tanba fasil atu ema hanoin hetan no seluk fali mak hakarak Hatutan informasaun ka notísia sira hosi rai-laran bá rai-li’ur no hosi rai-li’ur mai rai-laran. Hatutan no Hatutan de’it!

Hatutan.com dezde prinsípiu mai to’o halo tinan-ida (1) ne’e la haree bá kuantidade produtu Jornalístiku, maibé aposta iha kualidade. Ho nune’e, notísia sira Hatutan.com nian tau prioridade liubá notísia investigativu (reportajen investigativu) ho reportajen kle’an (in-depth reporting) bá iha área polítika, ekonomia no sosiál.

Forsa Traballu

Hatutan.com nia na’in ka owner mak emprezáriu Timoroan, Raul dos Reis Lemos ho nia espoza Krisdayanti. 

Ekipa Redasaun Hatutan.com. Foto/dok.Hatutan.com

Iha tinan-ida ne’e, Hatutan.com iha nia forsa traballu hamutuk na’in-12 ho nia kompozisaun mak hanesan; na’in-hitu (7) koloka iha Redasaun nu’udár jornalista no editór, no na’in-lima (5) iha multimedia (Hatutan Podcast) no administrasaun.

Tékniku profisionál hirak ne’ebé hola parte redasaun nian mesak jornalista timoroan, hanesan Francisco Belo Simões, nu’udár Xefe Redasaun no editór senior, Cipriano Kolo (koordenadór kobertura no editór senior), Selfiana Mendonça (Sekretaria Redasaun), Vito Salvador (jornalista), Rogério Cárceres (jornalista), Carmelita Amaro Isaac (jornalista), Elio da Costa dos Santos (fotógrafu),  Lùciana Verdial (jornalista estajiáriu). 

Hosi Diresaun Komunikasaun no Informátika  no administrasaun, finansa, lojístika  nian,  lidera hosi Syeilla Surayya S. Ricardo nu’udár Jenerál Manager,  Laurentina Pires de Jesus (Responsavel Podcast & Radio Streaming), Eligio Moniz do Rego (Web developer) ho Gabriel Nelson do Nascimento (Videographer no editór iha Hatutan Podcast).

Hatutan.com iha nia consultant jurídiku ka apoiu jurídiku ne’ebé lidera hosi Advogadu Adérito Fernandes dos Reis,  ne’ebé sempre fó opiniaun jurídiku ka paresér jurídiku  bá Konsellu Redasaun kona-bá notísia sira Hatutan.com nian, liuliu notísia sira ho karater investigativu. Dr. Adérito Fernandes dos Reis, mós prontu fasilita asistensia legal bá pesoal jornalista Hatutan.com ne’ebé enfrenta kazu legal ruma iha Tribunál relasiona ho publikasaun no produtu jornalistika ne’ebe publika iha portal Hatutan.com. **