Hatutan.com, (23 Agostu 2022), Díli—Komandu FALINTIL Forsa Defeza Timor-Leste (F-FDTL), liuhosi unidade Polísia Militár (PM), hahú halo abertura ba kursu “Operasaun Maubere VI” ba Soldadu foun selesionadu na’in-37, durante fulan-tolu nia laran, hahú iha Tersa 23 Agostu 2022.

Komandu FALINTIL Forsa Defeza Timor-Leste (F-FDTL), liuhosi unidade Polísia Militár (PM), halo abertura ba kursu “Operasaun Maubere VI” ba Soldadu foun selesionadu na’in-37, durante fulan-tolu nia laran, hahú iha Tersa 23 Agostu 2022. Foto/Hatutan.com.

Soldadu PM na’in 37 ne’e, kompostu hosi feto na’in lima no mane na’in 32. Serimónia kursu Operasaun Maubere VI ne’e loke direta hosi Xefe Inspesaun F-FDTL nian, Brigadeiru Jenerál Cornélio Ximenes “Mau-Nana”.

Lee Mós: Ramos-Horta Husu F-FDTL Promove Pás iha TL no Mundu

“Alin kadetes sira iha treinamentu ne’e imi kuda buat tolu de’it iha imi nia fuan, imi nia laran, durante instrusaun fulan tolu. Primeiru, dixiplina, segundu, pontuál no terseiru, kamaradájen. Ida-ne’e importante,” Komandante unidade Polísia Militár (PM), Majór Abel da Costa “Niki” hateten iha intervensaun iha Salaun enkontru Kuartél PM, Kintál-boot.

Advertisement

Kamaradájen katak, tenke iha espíritu amigu nian ne’ebé di’ak entre soldadu sira. Iha dixiplina nian, tenke respeita instrutór sira, hosi superiór sira ba to’o iha Cabo. 

“Ida ne’e mak sai imi nia responsabilidade durante fulan-tolu. Ne’ebé husu ba ita boot sira, tenke  kumpri regra saida de’it, instrutór sira fó, ida-ne’e atu atinje imi nia objetivu. Formasaun ne’ebé mak imi atu hala’o durante fulan-tolu. Bainhira iha problema ruma iha treinamentu nia laran, aprezenta lalais ba imi nia instrutór sira, atu sira bele apoia imi, ajuda imi,” Majór Niki hateten.

Komandante unidade PM ne’e husu mós ba soldadu sira atu labele tun ba pasa férias fim de semana nian. Maibé, iha duni fim semana karik sei la autoriza atu soldadu sira ba hemu tua, tuir deskoteka ka bár.

Xefe Inspesaun F-FDTL, Brigadeiru Jenerál Cornélio Ximenes “Mau-Nana”.

Iha fatin hanesan, reprezentante Xefe Estadu Maior Jenerál F-FDTL, Xefe Inspesaun F-FDTL, Brigadeiru Jenerál Cornélio Ximenes “Mau-Nana” hateten,  kursu ida-ne’e nu’udár aplikasaun ida mós hosi ordén unida nian, iha treinamentu ba forsadu nian.

Brigadeiru Jenerál Mau-Nana esplika, Komandu F-FDTL deside forsa no instrutór Brazileiru sira mak hala’o treinamentu ba membru foun PM sira, tanba Brazil iha ninia forsa PM diferente tebes no di’ak liu nasaun sira seluk iha organizasaun Comunidade dos Paises de Lingua Portuguêsa (CPLP) nian.    

“Ita agradese ba governu Brazíl, maske embaixadór moras no la marka prezensa. Ha’u hanesan em nome do Xefe estadu maior jenerál, ha’u fó agradesimentu ba asesór foun sira ne’ebé atu mai fó instrusaun. Tanba sira mai hosi dook, para depois fó instrusaun, treinamentu ba imi,” Brigadeiru Jenerál Mau-Nana, hateten.

Advertisement

Jornalista: Rogério Pereira Cárceres