Hatutan.com, (11 Setembru 2022), Díli–Primeiru-Ministru Taur Matan Ruak, nu’udár mós Ministru Interior,  Domingu (11/09/2022), observa direitamente fatin konstrusaun seguransa no dormitóriu bá membru Unidade Patrullamentu Fronteira (UFP) iha Batugade, Postu Administrativu Balibo, Munisípiu Bobonaro.

PM Taur akompaña hosi Komandante UPF, Euclides Belo observa fatin konstrusaun seguransa no dormitóriu bá membru UPF iha Batugade, Postu Administrativu Balibo, Munisípiu Bobonaro, Domingu (11/09/2022). Foto/GPM

Komunikadu imprensa ne’ebé Hatutan.com asesu hosi Gabinete Primeiru-Ministru nian, relata katak, vizita PM Taur Matan Ruak nian ne’e akompaña hosi Komandante UPF Superintendente Euclides Belo.

Iha vizita ne’e Xefe Governu kontinua husu bá kompañia konstrutór sira atu serbisu ho didiak no garante nia kualidade atu UPF sira uza hodi halo seguransa ho di’ak bá fronteira sira entre Timor-Leste no Indonézia.

Konstrusaun bá Postu Unidade Patrullamentu Fronteira (UPF) hamutuk neen (6) hanesan Mota Ain, Tunu Bibi, Sakato, Oesilo, Citrana no Mota-Masin, no konstrusaun ne’ebé Xefe Governu observa lokaliza iha fronteira Motain, Postu Administrativu Balibó, Munisípiu Bobonaro.

Jornalista : Rogério Cárceres