Hatutan.com, (14 Setembru 2022), Díli- Prezidente Repúblika (PR), José Ramos-Horta, afirma katak  sidadaun sira ne’ebé ho relijiaun Protestante no Musulmanu iha direitu atu hetan sertidaun kazamentu hosi Ministériu Justisa.

Prezidente Repúblika, José Ramos-Horta vizita JSMP, Kuarta (14/09/2022). Foto/JSMP

Nia hateten, relijiaun hotu-hotu iha Timor-Leste ne’ebé rekoñesidu antigu ona iha Timor-Leste, hanesan relijiaun Katólika iha direitu, kapasidade jurídika atu emite sertidaun kazamentu, tanba sá mak Protestante ho Musulmanu labele.

“Ha’u konkorda 100%, se ita rekoñese Igreja Katólika, kapasidade jurídiku atu halo sertidaun kazamentu, Protestante ho Musulmanu mós iha direitu bá ida ne’e,” Ramos-Horta bá jornalista sira iha ámbitu hala’o vizita bá edifísiu JSMP iha Dili, Kuarta (14/09/2022).

Molok ne’e, eis-Ministru Justisa Manuel Cárceres da Costa hateten, nia parte tenta atu altera lei Kódigu Sivíl artigu 1474 kona-bá kazamentu sivíl, katóliku tradisionál ne’ebé la korresponde situasaun iha Timor-Leste, tanba la rekoñese Sertidaun Kazamentu husi Kristaun Protestante.

Iha tinan 2011 Prezidente Repúblika José Ramos-Horta ne’ebé promulga lei kódigu sivíl iha artigu 1474 hodi la rekoñese sertidaun kazamentu protestante nian. Maibé daudaun ne’e, atuál Ministru Justisa, Tiago Amaral Sarmento, aprezenta lei refere bá konsellu Ministru hodi altera, tanba konsidera lei ne’e halo diskriminasaun ba Kristaun Protestante sira.

Ministru Justisa aprezenta ona bá Konsellu Ministru no Konsellu Ministru aprova ona lei rejistu sivíl ne’ebé, lei rejistu hotu-hotu halo iha Timór, depois la’ós ida ne’e de’it  prepara ona lei ida atu liberdade relijiozu ho nia rekizitu sira.

Jornalista: Vito Salvadór