Hatutan.com, (23 Setembru 2022), Díli-Komunidade no karau na’in sira iha área Aldeia Fehuriin, Suku Uma-Boco, Postu Administrativu Natarbora, Munisípiu Manatuto, Sesta (23/09/2022), hakfodak haree sira nia animal hakiak (karau vaka mean) mate dois hela iha soko-laran no hetan mós embolku kila-boot.

Ema ho Kilat Tiru Komunidade Nia Karau iha Natarbora. Foto/Espesiál

Komunidade no karau na’in sira iha aldeia refere deskonfia forte katak sira-nia karau tolu ne’ebé mate ne’e hetan tiru ho kilat-boot no kilat modernu hosi ema balun (deskoñesidu hela).    

Bio da Costa Gusmão, nu’udár karau na’in  bá informa bá Hatutan.com, liuhosi telefónika katak Sesta ne’e, haleu tuku 02:18 rai-nakaras, mosu kazu insidente ida ne’ebé mak deskonfia envolve hosi sidadaun balu bá ho grupu utiliza kilat-boot hodi tiru komunidade sira nia karau iha Aldeia Fehuriin, Suku Uma-Boco.

Hosi hahalok ema deskoñesidu sira ne’e nian rezulta karau tolu mak mate kedan iha fatin, ida, husik hela, maibé karau rua mak ema sira ne’e  konsege transporta iha sira-nia kareta lori halai liu.

Komunidade sira haree katak grupu deskoñesidu ne’e bá ho kareta ida tipu Rangel, maibé, laiha Xapa Matrikula.

“Sira konsege tiru mate karau tolu, karau rua mak sira lori, no ida mak sira husik hela iha fatin akontesimentu. Ha’u ho ha’u nia maun, tenta atu hapara kareta ne’e, maibé sira mai ho velosidade, entaun ami labele hapara. No ami mós duni tuir kedas iha momentu ne’e, maibé la konsege deskobre, tanba sira ho karreta, ha’u ho ha’u nia maun, ami uza motór,” Bio da Costa Gusmão haktuir.

Ho akontesimentu ne’e, parte família sira, informa kedan ona bá autoridade lokál no komunitáriu sira Natarbora, inklui Ofisial Polísia Suku (OPS), hodi buka tuir grupu deskoñesidu hirak ne’e mai hosi ne’ebé, sívil ka militár, inklui sei buka hatene mós ema fasilita grupu hirak ne’e iha Natarbora.

Komandu PNTL Seidauk Simu Relatóriu

Iha sorin seluk, portavós komandu Polísia Nasionál Timor Leste (PNTL), Superintendente Xefe Armando Monteiro, hateten liga ho kazu tiru karau komunidade sira nian iha Natarbora, to’o oras ne’e, parte komandu jerál PNTL seidauk simu relatóriu eskrita ruma.

“Ami foin mak akompaña, mais relatóriu hosi Komandu PNTL Munisípiu Manatuto, seidauk to’o mai. Sé bainhira to’o mai, ita sei publika hela. Maske informasaun ida ne’e, virál ona iha média sosiál, maibé presija liuhosi relatóriu ho investigasaun ida ne’ebé mak adekuadu, hodi nune’e, ita nia informasaun ne’ebé mak sai ne’e, ninia akuntabilidade ida,” Armando Monteiro, hateten.

Iha prosesu investigasaun ne’e, parte komandu PNTL mós sei halo mós ezaminasaun ka teste bá bala-musan ka embolku ne’ebé iha, nune’e be’e deskobre katak, tipu kilat saida mak grupu deskoñesidu sira ne’e uza hodi tiru ‘na’ok’ ema ninia animál.

Kazu ne’ebé hanesan, akontese mós iha área Munisípiu Manufahi, Postu Administrativu Same, Suku Holarua, iha ne’ebé ema ho armas ka kilat tiru ‘na’ok’ komunidade sira nia animal.

Iha Timor-Leste, oras ne’e, instituisaun hirak ne’ebé kaer armas ka kilat mak hanesan, FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL).

Jornalista: Rogério Pereira Cárceres