Defeza & Seguransa
Konfrontu Entre Grupu Artemarsiál iha Luro, Ida Grave
Hatutan.com, (30 Setembru 2022), Díli— Konfrontu ne’ebé akontese iha segunda (26/09/2022) hale’u tuku 22:00, kalan Otl, involve membru Grupu Arte Marsiál (GAM), hosi Suku Baricafa ho Luro, iha Postu Administrativu Luro, Munisípiu Lautém, rezulta na’in ida kanek grave no na’in rua kapturadu.
Membru Grupu Arte Marsiál (GAM), hosi Suku Baricafa ho Luro, iha Postu Administrativu Luro, Munisípiu Lautém, ne’ebé Polisia kaptura tanba involve iha Konfrontu ne’ebé akontese iha Segunda (26/09/2022). Foto/PNTL.
Vítima ne’ebé hakanek, Samuel Ximenes (19), tanba hetan ta’a hosi iha parte ulun no liman.
Lee Mós: Konfrontu Becusse PNTL Detein Autór Na’in-Lima
Polísia Nasionál Timor Leste (PNTL) Munisipiu Lautém konsege halo kedan atuasaun hodi evakua vítima bá Ospitál no kontinua transporta bá Ospitál Referál Baucau hodi hetan tratamentu saúde.
PNTL mós konsege kaptura suspeitu na’in-tolu ho inisiál DC no SAC, hodi detein ona iha sela detensaun eskuadra Polísia Luro.
“Movitu hosi akontesimentu ne’e maka, grupu Arte Marsiál KORK no IKS provoka malu. Vítima hosi akontesimentu ne’e, mai hosi grupu artes marsiais IKS, enkuantu suspeitu sira hosi grupu artes marsiais KORK,” Hatutan.com sita komunikadu iha pájina ofisiál komandu PNTL, Sesta (30/09/2022).
Komandu PNTL liuhosi Investigadór eskuadra Polísia Luro, hala’o kedan prosesu investigasaun bá kazu ne’e no iha Kuarta (28/09/2022), aprezenta kedan bá Ministériu Públiku (MP), iha Munisípiu Baucau.
Suspeitu Na’in-tolu Kumpri Prizaun Preventiva
Hafoin enkamiña prosesu kazu ne’e bá iha MP, iha Kinta (29/09/2022), suspeitu na’in-tolu, submete kedan prosesu primeiru interrogatóriu judisiál iha Tribunál Distritál Baucau (TDB).
Nune’e, rezultadu hosi Primeiru Interrogatóriu ne’e, Juiz sira iha Tribunál Baucau deside aplika medida koasaun prizaun preventiva bá arguidu na’in-rua, ho inisiál DC no SAC no na’in-ida ho inisiál AC, Tribunál aplika medida koasaun aprezentasaun periódika.
Oras-ne’e, arguidu na’in-rua kumpri hela sentensa iha Prizaun Becora, hodi hein prosesu kontinuasaun.
Jornalista: Rogério Pereira Cárceres
Defeza & Seguransa
PM Xanana Observa Direta Atuasaun PCIC Desmantela Scam Call Centre iha City-8 no Kaer Mós Xinés 18 iha Kuluhun
Fransa Aprofunda Kooperasaun Bilaterál ho Timor-Leste
Projetu ICC, Governu Sakrifika Edifísiu Terminal Passajeiru Portu Dili Ne’ebé Foin Reabilita ho Kustu US$315,575,51
Kazu Scam Call Centre Kuluhun, Tribunál Aplika Kausaun Bá Jerente US$5,000.00 no Arguidu Na’in-18 US$4,000.00
Kazu Scam Call Centre Bedois, Tribunál Aplika Kausaun US$10,000.00 Bá Arguidu LC ho US$2,000.00 Bá Arguidu Na’in-Neen
PR Bolu Urjente MTK, MNEK, SNI, ANATL Ho AACTL Hodi Konfirma Verasidade Polémika Jet Privadu Cesna C700
DIT Hahú Introdús ba Estudante Sira Kona bá Seguransa ba Dadus Importante
IGJ Legaliza Corais Timor bá Atividade Futu-Manu
STOP PRESS: Ministru Nino Pereira Konsumu Dose Kontamina ho Frasku Halo Nanál Kanek no Ran
Indonesia dan Timor-Leste Perkuat Kerjasama Ekonomi, Sosial Budaya, dan Pariwisata
Governu Indika BTK Hadi’a Trotoár Naksobu iha Área Bebora
Asesu Gratuita HATUTAN.com
Hafoin Ferias Judisiáriu PGR Sei Ko’alia Kazu Set-top Box RTTL,E.P
Xefe Estadu TL Kondekora Militár Korea Súl Ne’ebé Mate iha Oé-Cusse
PCIC Detein MG Lori Osan Falsu Hosi Inglaterra
