Hatutan.com, (03 Outubru 2022), Díli-Ministru bá Asuntu Parlamentár no Komunikasaun Sosiál (MAPKOMS), Francisco da Costa Pereira Jerónimo, halo hela  analiza ka tetu nia desizaun ida loloos, molok harii Institutu Formasaun bá Komunikasaun Sosiál ho Multimedia (IFKSM), tanba ‘sei dúvida’ ho kestaun sustentabilidade institutu estadu estatál ne’e iha futuru.

Lee Mós : SEKOMS Sei Ko’alia Fali ho MAPKOMS atu Avansa Projetu Lei Subsídiu ba Mídia

MAPKOMS, Francisco Jeronimo hlao sorumutuk ho PM Taur Matan Ruak, Segunda (03/10/2022). Foto/Elio dos Santos da Costa

Asuntu ne’e MAPKOMS hato’o, relasiona ho planu governu nian ne’ebé iha fulan-hirak liubá, pronunsia direta hosi ministru Francisco Jerónimo, katak atu harii ka estabelese institutu estatál ida, ne’ebé mak sei foka kona-bá formasaun bá komunikasaun sosiál no multimedia.

“Ohin, mai informa bá Primeiru-Ministru kona-bá, bainhira mak atu harii institutu formasaun bá komunikasaun sosial ho multimedia. Entaun, ohin, ha’u ko’alia ho Primeiru-Ministru, ha’u aprezenta relatóriu ho estudu ne’ebé mak iha para atu haree, diskute uitoan kona-bá, halo nusa maka ninia progresu bá futuru. Tanba, ita agora, ko’alia kona-bá sustentabilidade,” MAPKOMS, Francisco da Costa Pereira Jerónimo, hateten bá jornalista sira hafoin sorumutuk regulár ho Primeiru Ministru,  Taur Matan Ruak, iha rezidénsia Faról, Segunda (03/10/2022).

Advertisement

Francisco Jerónimo dehan, bainhira institutu estatál ne’e harii, sé mak atu sustenta bá futuru, no ekonomikamente, iha dalan ka lae, bele para moris ka lae, keta halo, oras ida ‘paradu fali’. Entaun, governu tenke kuidadu.

“Ha’u hato’o ne’e bá sua-exelénsia, no ha’u entrega bá primeiru ministru ninia desizaun,” Ministru bá Asuntu Parlamentár no Komunikasaun Sosiál (MAPKOMS), Francisco Jerónimo, hateten.

PM Taur Matan Ruak, husu mós bá MAPKOMS ninia opiniaun bá planu Governu nian ida ne’e, maibé, Francisco Jerónimo, hatán katak, kona-bá estudu bá harii institutu ne’e rasik, nia hatete dala-hira ona bá públiku katak, problema sustentabilidade bá futuru.

“Ho atu jere ida ne’e, presiza rekursu ne’ebé mak tenke di’ak. Ha’u hanoin ita presiza fatin, buat sira ne’e hotu, no to’o oras ne’e ita seidauk iha preparasaun sira ne’e,” MAPKOMS rekoñese.

Maske Governu liuhosi MAPKOMS, iha ona mós sentru formasaun ida bá jornalista sira mak hanesan Centro de Formação Técnica em Comunicação (EFTEC). Maibé, ida ne’e de’it, Governu seidauk hateke dook, entaun, tenke halo preparasaun dook.

Advertisement

Sei sai pergunta boot tanba Timor-Leste, iha ona mós Universidade Nasionál Timor Lorosa’e (UNTL), Universidade Orientál Timor-Lorosa’e (UNITAL), ho Universidade Católica Timorense (UCT), sira mós iha departamentu komunikasaun sosial  ne’ebé mak foka kona-bá área formasaun bá jornalizmu.

Agora, governu nian mai tán ho planu ida ne’e, entaun, presiza mós rekursu, tanba saida, atu jere institutu ne’e, nia karateriza aan ona ho nível sira akadémiku, la’ós nível formasaun baibain.

“Nusá maka ita la haree, halo kooperasaun de’it ho universidade ne’ebé mak iha, para atu nune’e bele fortifika rekursu sira iha ne’ebá, atu nune’e, sira halo servisu di’ak liu, duke ita harii tán ida, hodi halo kompetisaun. Mais, sei halo diskusaun, tanba oras ida tenke rona opiniaun primeiru-ministru nian,” Francisco Jerónimo, hateten.

Jornalista: Rogério Pereira Cárceres

Advertisement