Hatutan.com, (05 Outubru 2022), Díli- Prezidente Eletrisidade Timor-Leste, Empreza Públiku (EDTL,E.P), Paulo da Silva, hateten nia remunerasaun ka saláriu mensal ne’ebé atinje $6.500, labele husu ba nia, maibé husu bá superior ne’ebé fó servisu bá nia.

Lee Mós : Konsellu Ministru Diskute Hela Redús Remunerasaun Kargu Xefia Sira iha I.P ho E.P

Prezidente Eletrisidade Timor-Leste, Empreza Públiku (EDTL,E.P), Paulo da Silva. Foto/Elio dos Santos da Costa

“Kona-bá ha’u nia saláriu ne’ebé boot, husu bá ema ne’ebé fó servisu bá ha’u. Ha’u traballadór,” Paulo da Silva hateten hodi hatán bá jornalista sira iha Palásiu Prezidensiál, Díli, Kuarta (05/10/2022).

Lei númeru 07/2007, kona-bá Titulár bá Órgaun Soberanu sira, iha artigu 10, esplika kona-bá vensimentu no regalia sira seluk (remunerasaun). Konteúdu hosi lei ne’e, bandu órgaun ka titulár sira Estadu nia saláriu boot liu fali Prezidente Repúblika nia saláriu ka remunerasaun.

Kontinua Utiliza Karreta Estadu ho Matrikula Privadu

Hatán kona-bá veíkulu no patrimóniu sira ne’ebé EDTL,E.P iha uza xapa matrikula privadu mezmu sosa hosi orsamentu Estadu, Paulo da Silva, argumenta katak EDTL-E.P iha ka hetan atribuisaun autonomia buat tolu, autonomia iha finanseiru, autonomia iha administrativu, autonomia judisiál no ida ikus liu mak patrimoniál signifika EDTL, E.P iha kompeténsia atu jere ninia fasilidade hotu, ninia patrimóniu hotu-hotu tuir regra internal ne’ebé iha.

“Agora ita iha veíkulu rua iha EDTL-EP, ida uluk transfere husi diresaun jerál mai, ita seidauk muda ninia plat ne’ebé sei nafatin utiliza marka G, no seluk ne’ebé depois tinan kotuk EDTL sai EDTL, E.P ita sosa ne’e utiliza patrimóniu própriu EDTL, E.P nian ne’ebé uza matrikula EDTL-E.P. Tamba hetan lisensamentu husi Diresaun Nasionál Transporte, tanba ne’e EDTL,E.P halo ezersísiu hela atu halo EDTL-EP ninia xapa matrikula rasik atu utiliza,” Paulo da Silva hateten.

Nia subliña EDTL, E.P laiha xapa matrikula  privadu ne’ebé tau ema ka indivíduu ida nia naran, plat sira iha ne’ebá ne’e depois sosa Diresaun Nasionál Transporte mak atribui mai temporáriu uza, maibé iha tempu besik depois hetan ona atribuisaun patrimóniu husi Ministériu Finansas no Ministériu Obras Públika mak sei halo ezersísiu atu prodús xapa matrikula  EDTL-EP ninia rasik.

EDTL, E.P informa progresu servisu ba Xefe Estadu

Prezidente Eletrisidade Timor-Leste, Empreza Públiku (EDTL,E.P), Paulo da Silva ho nia ekipa partilla informasuan servisu EDTL,E.P nian bá PR Ramos-Horta, Kuarta (05/10/2022). Foto/Elio dos Santos da Costa

Membru konsellu administrasaun hosi Eletrisidade de Timor Leste Empreza Públiku (EDTL, E.P), Kuarta (05/10/2022), partilla ho Xefe Estadu kona-bá  ezersísiu sira ne’ebé EDTL, E.P halo hafoin transforma husi diresaun jerál, mai Empreza Públiku (EP) hahú tinan 2021.

Diresaun EDTL, E.P relata ba Xefe Estadu progresu sira ne’ebé halo, inisiativa  sira ne’ebé EDTL, E.P iha, atu bele mellora di’ak liu tan servisu eletrisidade iha Timor-Leste.

Prezidente EDTL, E.P hateten progresu ne’ebé EDTL,E.P halo primeiru kona-ba kobertura asesu enerjia elétrika halo  ho programa eletrifikasaun nasionál, liu-liu bá suku sira ne’ebé seidauk enerjia elétrika.

EDTL, E.P halo programa ida ne’e fahe bá faze tolu, faze dahuluk 44 projetu kobre 24 suku, depois faze daruak 34 projetu ho 17 suku no ida seluk 36 projetu kobre 23 suku ne’ebé  implementa no  la’o hela (on going).

Faze dahuluk projetu la’o iha suku 6 mak konklui 100%, balun la’o hela espera iha fulan ida ho balun bele konklui tan.

Faze daruak mós tama ona iha implementasaun, kompañia hahú konstrusaun iha terrenu, faze datoluk agora tama ona faze finalizasaun, avaliasaun tékniku finansiál, depois la kleur tan asina kontratu kompañia sira, atu sira implementa, hela suku tolu mak seidauk lansa tenderizasaun.

“Semana oin ita lansa, suku Fatukalu-Same, Fatumakerek Manatuto, Fatumea Suai ne’e,” Prezidente EDTL,E.P hateten.

Tinan ida-ne’e EDTL, E.P promove hotu kedas suku hotu-hotu, la’ós asesu hotu kedas, maibé promove hotu prosesu eletrifikasaun ho espetativa fim do ano, maioria husi projetu sira ne’e bele konklui nune’e populasaun sira bele asesu naroman eletrisidade.

Progressu seluk mak EDTL,E.P halo instalasaun kontadór prepagu sira  ba populasaun iha  tinan 2021 108 mill, hahú kedas fulan-Outubru 2021 mai fulan Setembru 2022 no instala ona 76 mill kontadór  Timor laran tomak.

“Husi instalasaun kontadores ida ne’e, ita konsege hasa’e reseita, uluk sei iha diresaun jerál rata-rata ita kompleta de’it millaun $2.6 to’o  millaun $ 2.7 depois ita instala kontador no mós halo inspesaun rutina, ita fulan ida hetan to’o millaun $3.6 to’o millaun $3.7 to’o fulan Setembru tinan 2022 ita hetan ona millaun  $34.4 nune’e EDTL,E.P nia prozesaun iha tinan tomak 2022 sei hetan  millaun $40, maibé sei ita manetin ritmu koleksaun reseita ida ne’e to’o fim do anu, ita bele hetan liu  millaun $45,” nia esplika.

Prezidente Repúblika José Ramos Horta kontente ho servisu ne’ebé EDTL, E.P iha, mezmu iha dezafiu, no obstákulu barak, maibé Xefe Estadu kontente ho progresu sira ne’ebé iha.

“Xefe Estadu husu EDTL,E.P kontinua mellora servisu, hadi’a kualidade fornesimentu eletrisidade, no mós haree oinsá atu hatún presu eletrisidade ne’e rasik, entaun EDTL-EP sei haree no halo ezersísiu, atu refleta rekomendasaun sira ne’ebé Xefe Estadu hato’o,” Prezidente EDTL,E.P, Paulo da Silva hateten.

Tinan 2022 EDTL, E.P iha Gastu Millaun $200

Gastu sira EDTL, E.P iha tinan ida ne’e ho despeza de’it $200,000 ne’e bá kombustivel  (mina) servisu material sira, operasaun manutensaun bá sentrál, operasaun manutensaun bá rede transmisaun no mós ba distribuisaun mós kustu ba servisu konkorrente EDTL, E.P ne’e kustu boot despeza ba tinan 2022

“Tinan 2021, millaun  $157 no tinan 2022 sa’e ba millaun $200,000, entaun ne’e despeza ne’ebé EDTL,E.P halo,” nia sublina.

Prezidente EDTL, E.P ne’e hatutan reseita ne’ebé EDTL, E.P hetan kada tinan ne’e ki’ik oan, tanba timor nia merkadu ne’e ki’ik oan, ema uza enerjia uitoan. Uniku dalan atu EDTL,E.P garante ninia sustentabilidade, entaun promove inisiativa investimentu Enerjia renovavel ne’e atu hatún kustu produsaun, depois mak ajuda hasa’e reseita hodi atrai investidór sira.

Jornalista: Vito Salvadór