Hatutan.com, (04 Outubru 2022), Díli- Sekretáriu Estadu Juventude no Desportu (SEJD), Abrão Saldanha, klarifika katak dezde prinsípiu Governu  la tau osan bá selesaun nasionál U-16 bá partisipa iha jogu Asian Football Confederation (AFC) Cup sub-17 2023 iha Bahrain tamba tuir regra jogu hotu ne’ebé tama bá kalendáriu AFC nia orsamentu tomak finansia hosi AFC no FIFA.

Lee Mós : FFTL Laiha Osan Sosa Tikéte Aviaun Fasilita Selesaun Nasionál Sub-17 Joga Iha Kazakistaun

Selesaun Nasionál U-16. Foto/FFTL

Sekretáriu Estadu Abrão Saldanha Tersa (04/10/2022) , iha nia servisu fatin, hateten jogu AFC nian ne’e tama iha kalendáriu AFC nian, no tuir regra AFC nian sira ne’ebé tama iha AFC nia kalendáriu orsamentu tomak finansia hosi AFC no FIFA, ne’ebé governu la tau orsamentu ruma bá iha ida ne’e.

Bainhira kona-bá atu bá, dezde selesaun nasional Sub-16 hetan rifa monu iha Tajikistaun, treinadór Sub-16 mestre Kim bá ko’alia ho SEJD kona-bá difikuldade ne’ebé sira enfrenta tamba dook demais, tanba nasaun tolu seluk hanesan Tajikistaun, Mongolia no Afeganistaun sira-nia viajen menus hosi oras rua bele bá joga ona, no Timor-Leste lori loron rua tamba ne’e Mestre Kim aprezenta difikuldade no se lori labarik sira bá hanesan ne’e iha problema.

“Ikus liu ona mak sira iha difikuldade atu bá tamba billete viajen ne’ebé sai tamba osan ne’e full hosi AFC, AFC hakarak hetan billete ne’ebé  nia presu estandar  (padraun) tuir sira-nia osan, tamba iha Timor-Leste aviaun charter mak barak nune’e presu ne’e kuaze triplu hosi presu normal online nian, entaun sira la bele halo no kuandu treinadór komunika ho ha’u, ami mós haree hodi ezamina mós kustu ne’ebé iha no karik ita lori sub-16 sai dunik nia billete de’it kona $200,000 seidauk sura ho sira seluk tan hanesan alojamentu, han-hemu no perdiem ba jogadór sira iha ne’ebá no estimasaun bele too $400,000 no Governu em-prinsípiu laiha ida ne’e,” Abrão Saldanha hateten.

Sekretáriu Estadu ne’e hatutan, uluk sub-16 bá mezmu kustu vida balun karun no AFC no FIFA nia osan la to’o, maibé Governu ajuda ne’e maka jogadór sira bá tiha jogu iha Indonézia no try out iha Korea.

Dala ida-ne’e, Abrão hateten, ho razaun viajen ne’ebé naruk no ho AFC nia limitasaun orsamentu ne’ebé fó bá viajen ida ne’e sira rasik konkorda no diskute tiha ho Federasaun Futeból Timor Leste (FFTL) hafoin husu retira.

Konsekuénsia saida husi retirada ne’ebé iha bá Timor-Leste, Abrão haree katak pratikamente la iha konsekuénsia ruma, tamba tuir regra FIFA no AFC nian liuliu regra sira AFC katak jogu sira sub-20 mai kraik ne’e nasaun membru ida no hanesan Timor-Leste iha devér minimu partisipa iha jogu rua tinan ida, no iha tinan ida ne’e Timor-Leste partisipa ona jogu tolu ne’ebé sei la hetan konsekuénsia ruma.

“Ha’u rasik bolu ona treinadór mai iha ha’u nia fatin, ha’u husu tiha ona nia dehan konsentra bá jogu sira seluk tamba ida ne’e dok demais, no sei halo kolen labarik sira, no agora daudaun treinadór husu atu ami halo selesaun hodi konsentra bá jogu sira tuir mai,” Abrão haktuir.

Retirada husi jogu sira AFC no FIFA nian laos foin Timor-Leste mak halo maibé iha rai barak ne’ebé mos halo ho razaun sira ne’ebé kada nasaun enfrenta tamba ne’e la’ós buat foun, hamutuk haree fali baáposibilidade iha jogu seluk ne’ebé sei mai.

Tuir oráriu jogu Sub-16 bá kualifikasaun tasa AFC Cup Bahrain  2023 grupu H, sei hahú iha loron 5 fulan-Outubru iha ne’ebé Timor-Leste hamutuk ho Tajikistan hanesan uma-na’in inklui mós ho Afeganistaun no Mongolia.

Jornalista: Vito Salvadór