Hatutan.com, (07  Outubru 2022), Díli-Komandu Jerál Polísia Nasionál Timor-Leste (PNTL), Sesta (07/10/2022), iha Kuartél Jerál PNTL, distribui ka entrega viatura unidade 61 bá eskuadra PNTL sira hodi fasilita servisu operasionál nian.

Lee Mós : Ministériu Interiór Distribui Karreta 29 Bá PNTL Munisípiu

Komandu PNTL Entrega Viatura Unidade 61 Bá Eskuadra Sira. Foto/Elio dos Santos da Costa

Komandante Jerál PNTL Komisáriu Faustino da Costa, alerta atu membru PNTL hotu ne’ebé utiliza viatura Estadu nian ne’e tenke ho responsabilidade. Tanba viatura sira-ne’e sosa hosi osan povu nian.

Komandante Faustino da Costa, fó hanoin bá komandante no membru sira hotu iha munisípiu 12 ho Rejiaun Administrativu Espesiál Oé-Cusse Ambeno (RAEOA)  inklui unidade sira, atu soe tiha hahalok aat sira iha pasadu, no tenke muda mentalidade foun ida kona-bá utilizasaun bá karreta operasionál tanba fasilidade hirak ne’e maioria foun. 

Nia afirma katak karreta ho funsaun operasionál sira ne’e povu nian, sasán ne’e Estadu nian, no instituisaun seguransa hanesan PNTL, empresta de’it no uza hodi serbí Estadu, serbí povu no serbí rai ida-ne’e.

Komandante munisipiu sira ho membru tomak, tenke iha konsiénsia no garante katak, kareta sira ne’ebé ohin simu, tinan lima to’o sanulu mak foin bele husu sosa fali, la’ós tinan oin, ka tinan rua mai  sosa tán.

Oras ne’e, Komandu PNTL prepara ona regulamentu ka lei sira, oinsá atu bele regula sistema utilizasaun bá viatura sira Estadu iha PNTL laran. La’ós ne’e de’it, iha ona mós despaxu ida katak, motorista sira ne’ebé maka seidauk hetan sertifikasaun hosi komandu PNTL, maske nia iha karta kondusaun (SIM) hosi Diresaun Nasionál Transporte Terrestre (DNTT) sei la autoriza atu uza ka kondús karreta.

Membru sira ne’ebé hetan ona autorizasaun no merese atu kondús karreta sira ne’e iha munisípiu ho eskuadra sira iha na’in-100, tanba sira partisipa ona  kona-bá formasaun sai motorista, nune’e sira autorizadu atu utiliza viatura opersionál sira Estadu nian ne’e.

“Bainhira sira ne’ebé iha karta kondusaun, maibé laiha sertifikasaun hosi komandu, maka nia uza ka utiliza, no ida ne’e deteta karik, envolve iha kazu asidente ruma karik, komandante sira hotu, membru sira hotu, sujeita bá prosesu, no ida-idak responsabiliza bá kustu totál gastu ne’ebé akontese,” Komandante jerál PNTL ne’e hateten ho lia maka’as.

Komisaun B PN simbolikamente entrega viatura bá Komandu Jerál PNTL. Foto/Elio dos Santos da Costa

Komandante Faustino da Costa, esplika, serimónia fahe karerta ida ne’e, nu’udár eventu kontinuasaun ida hosi fulan-Maiu, tinan ne’e nian, iha ne’ebé parte Komandu PNTL hamutuk ho Governu liuhosi Ministériu Interior (MI) distribui ona mós karreta lubun ida bá komandu munisípiu ho unidade sira hodi responde bá nesesidade sira instituisaun PNTL nian iha terrenu.

Komandu PNTL, liuhosi Departamentu Justisa, ho Diresaun Jerál iha PNTL, sei halo fiskalizasaun bá kareta sira ne’e, to’o duni iha Eskuadra ne’ebé determinadu ka lae.

Komisáriu Polísia Faustino da Costa, agradese espesiál bá Ministériu Interior Taur Matan Ruak ho nia vise-Ministru Interiór, António Armindo ho  mós  Parlamentu Nasionál liuhosi deputadu sira iha Komisaun B bá asuntu Defeza ho Seguransa nian, tanba liuhosi sira mak prevee osan no defende maka’as hodi osan hirak ne’e bele sosa veíkulu operasaun PNTL.

Tenke Dixiplina no Respeita bá Hierárkia

Iha fatin hanesan, Vise Ministru Interior, António Armindo, fó hanoin kona-bá  buat rua mak importante iha utilizasaun bá viatura sira ho di’ak. Ida dixiplina no rua maka lokalidade bá ierarkia.

António Armindo fó razaun rua ne’e, tanba anteriormente, bainhira Komandu PNTL hamutuk ho MI, fahe karreta sira bá iha munisípiu, eskuadra sira ne’ebé mak destina ona, tuir lista ne’ebé mak Primeiru-Ministru Taur Mata Ruak ho kualidade hanesan ministru interior, asina  ikus mai to’o iha munisípiu la to’o iha eskuadra sira, para tiha iha komandu.

Nia reforsa katak, hahalok sira hanesan ne’e, labele akontese tán iha futuru, tanba ida-ne’e mós kestaun ida atu hatudu komandante sira-nia dixiplina bá komandu, no bá Governu dehan katak, karreta ne’ebé determinadu bá eskuadra sira, tenke la’o tuir duni desizaun ne’ebé mak iha ona antes. Veíkulu operasionál PNTL nian ne’e sosa hosi Kompañia Auto Timor ho valór orsamentu hamutuk millaun $2 resin.

Jornalista: Rogério Pereira Cárceres