Hatutan.com, (27 Outubru 2022), Díli-Ekipa fiskalizasaun konjunta, kompostu hosi Ministériu Finansas (MF), Diresaun Jerál Jestaun Patrimóniu Estadu (DJJPE), Komisaun Funsaun Públika (CFP-sigla Portugés), Diresaun Nasionál Transporte no Terrestre (DNTT), Comissão Anti Corrupção (CAC), ho Polísia Nasional Timor-Leste (PNTL), liuhosi unidade Seguransa Rodoviária, “la tolera” funsionáriu públiku ka ajente administrasaun públiku sira atu utiliza veíkulu Estadu (karreta ho motór)  hodi hala’o viajen bá munisipiu durante selebrasaun loron  matebian ka Finadu.

Karreta Estadu Ne’ebé Ekipa Konjunta Halo Apreensaun iha fim da semana 02 Jullu 2022 iha Dili tanba funsionáriu públiku sira utiliza la tuir nesesidade. Foto/dok.Hatutan.com

Diretór jerál DJJPE, Januário da Gama, hateten, ekipa fiskalizasaun konjuntu, ne’ebé estabelese ho rezolusaun Governu no Sirkulár Ministériu Finansas (MF) nian, hanesan kontinuasaun hosi despaxu bá ekipa fiskalizasaun konjuntu iha tempu uluk ninian.

Hahú  Kinta, 27 fulan-Outubru 2022, ekipa fiskalizasaun, informa kona-bá nesesidade ekipa fiskalizasaun konjuntu, hodi halo kontrolu, ka check point bá movimentu veíkulu estadu nian, tantu karreta estadu, no motorizada estadu, iha ámbitu selebrasaun finadu nian.

Rezolusaun Governu 132/2021, kona-bá jestaun no realokasaun veíkulu Estadu no reforsa mós ho Dekretu-Lei númeru 21/2021, kona-bá subsídiu mensál, transporte bá funsionáriu públiku nian, fó kompeténsia no fó mandatu bá ekipa fiskalizasaun konjunta, hodi kontinua regulármente halo kontrolu bá movimentu veíkulu Estadu, la’ós de’it iha loron serbisu, maibé, iha loron fim da semana, no loron boot sira hanesan finadu , natal no tinan foun.

“Objetivu hosi kontrolu bá movimentu viatura estadu ne’ebé ekipa fiskalizasaun konjuntu sei halo, atu kontinua halo melloramentu ida, liu-liu oinsá ita bele iha efisiénsia no efetividade bá utilizasaun rekursu Estadu nian, no au-mézmu tempu, bele kontribui bá iha redusaun despeza Estadu nian,” Diretór jerál DJJPE, Januário da Gama, hateten liuhosi konferénsia imprensa ne’ebé hala’o iha Kuartél Jerál Komandu PNTL, Caicoli, Kinta (27/10/2022).

Januário da Gama, dehan, ema hotu hatene katak, bainhira veíkulu ka viatura estadu sira ne’e maka kontinua iha irregularidade bá utilizasaun, la kontribui bá iha nesesidade fins profisionál instituisaun nian, maka sei kontribui bá iha despeza Estadu ne’ebé boot liután.

Iha biban hanesan, Pontu fokál CAC, Euclides Vidal Madeira, hatutan, bazeia bá Dekretu-Lei númeru 21/2021, 10 Novembru, kria subsídiu mensál bá transporte, rezolusaun Governu númeru 130/2021 kona-bá jestaun no realokasaun veíkulu Estadu no Padraun Prosedimentu Operasionál (PPO) kona-bá realokasaun no utilizasaun veíkulu Estadu Pool iha ministériu, instituisaun Estadu, serbisu fundu autónoma no Pool Nasionál.

Ekipa fiskalizasaun konjunta sira ne’e, alerta ka fó hanoin bá responsavel lojístika no patrimóniu iha ministériu, instituisaun Estadu, serbisu fundu autónoma, autoridade no administrasaun munisipál hotu katak, tenke halo kontrolu másimu bá utilizasaun viatura Estadu iha loron feriadu finadu iha 31 outubru 2022, no autoriza de’it bá sira ne’ebé halo atividade bá fins profisionál ho karta autorizasaun hosi superior.

“Maibé, la aplika bá sira ne’ebé autorizadu ona ho lei no Dekretu-Lei sira hodi uza regulármente viatura Estadu. Husu bá responsavel lojístika no patrimóniu sira atu fó hatene bá utilizadór hotu, hodi kumpre avizu ne’e, karik iha utilizadór balu ne’ebé la kumpre, halo favór informa bá ekipa fiskalizasaun konjunta atu halo intervensaun imediata,” nia hateten.

Ekipa fiskalizasaun konjunta halo ona mós koordenasaun ho PNTL, diresaun Tránzitu Nasionál no Munisípiu, hodi halo check point bá movimentu viatura sira Estadu nian iha nivel munisípiu, postu administrativu sira, hodi identifika utilizadór viatura sira estadu nian ne’ebé la kumpre avizu ne’e, hodi bele prosede bá prosesu sira.

La’ós ne’e de’it, ekipa fiskalizasaun konjunta ne’e, husu bá públiku, atu ajuda halo mós kontrolu bá utilizasaun viatura sira estadu nian, durante loron finadu, liuhosi hasai fotografia no video hodi lansa iha média sosiál hanesan Facebook CAC ka WhatsApp ekipa fiskalizasaun konjunta nian, ho númeru 77304448, 77991550 no 77230192, hodi bele prosesa.

Jornalista: Rogério Pereira Cárceres