Hatutan.com, (02 Novembru 2022), Díli—Prezidente Repúblika (PR), José Ramós-Horta akompaña hosi  Ministra Negosiu Estranjeiru no Kooperasaun (MNEK),  Adaljiza Magno no Embaixadora Timor-Leste bá Portugál, Isabel Guterres partisipa abertura konferénsia teknolojia, empreendedorizmu, Websummit bá dala-22 iha Lisboa, Portugál, iha loron 01 Novembru 2022.

Prezidente Repúblika (PR), José Ramós-Horta akompaña hosi Ministra Negosiu Estranjeiru no Kooperasaun (MNEK), Adaljiza Magno no Embaixadora Timor-Leste bá Portugál, Isabel Guterres partisipa abertura konferénsia teknolojia, empreendedorizmu, Websummit bá dala-22 iha Lisboa, Portugál, iha loron 01 Novembru 2022. Foto/Média PR.

Xefe Estadu Ramós-Horta konsidera eventu teknolójiku ne’e importante liu iha mundu, ho partisipante hosi ema 70.000 mai hosi nasaun 165 no espozitór na’in-2.630 no investidór no ema riku boot sira na’in 1.120 no oradór 1.000-resin.

Lee Mós: Portugál Sei Kria Kondisaun bá Timoroan Hodi Kombate Esplorasaun no Tráfiku Umanu

“Ohin ha’u mai haree de’it, abertura konferénsia teknolojia, empreendedorismu Websummit ba dala 22  ne’ebé ema 70.000 partisipa iha ne’e. Ha’u koñese ema lubuk ida, investidór ho osan boot  ne’ebé ha’u ko’alia bá sira kona-bá oinsa Timor-Leste sai hanesan web rejionál ida, ita tenki investe ba digitalizasaun  teknolojia  no intelijénsia artifisiál. Tanba Timor iha kualidade atu hola parte ho kabu submarinu ne’ebé sei dada ba Timor-Leste,” Hatutan.com sita komunikadu.

Tuir Xefe Estadu, bainhira Timor-Leste investe makas iha teknolojia dijitál, bele lori Timor-Leste hametin mós nia parseria ho nasaun belun sira iha mundu tomak, liu-liu país sira iha rejiaun besik malu iha kontinente Ázia.

“Ha’u mai iha ne’e sei ko’alia ho sira hakarak dada sira riku boot no investidór boot bele ba Timor investe iha ne’ebá no sira hotu-hotu tenki koñese Timor no bá Timor hodi halo vizita no haree oportunidade negósiu iha Timor-Leste,” Horta ko’alia.

PR Horta elojia ho konferénsia websummit bá dala 22 ne’ebé Estadu Portugál halo hametin mós kooperasaun ho nasaun tomak iha mundu hodi hola parte iha konferénsia ne’e.

Konferénsia ida ne’e foka ba teknolojia internet, teknolojia foin mósu no benefísiu hosi kapitalizmu ne’ebé Timor-Leste presiza liu, atu akompaña no komprende iha dezenvolvimentu iha nível mundiál.

Timor-Leste, maske ho populasaun porsentu 60 hanesan joven, labele sees hosi dezenvolvimentu teknolójiku liu-liu, relasiona ho intelijénsia artifisiál.

Tuir planu iha loron 03 Novembru, PR Horta sei sai Oradór Prinsipál hodi reprezenta Timor-Leste hodi hato’o nia palestra ba ema hotu iha mundu kona-bá pozisaun Timor-Leste hola parte iha konferénsia websummit bá dala 22 no vizita paviliaun hodi haree hikas ekipamentu teknolojia modernu ne’ebé ejiste iha mundu tomak.

Jornalista: Vito Salvadór