Hatutan.com, (04 Novembru 2022), Díli— Oitavu Governu Konstitusionál liuhusi Ministériu Finansas (MF) to’o iha inísiu fulan-novembru 2022, halo ona levantamentu osan hosi Fundu Minarai ho montante billiaun $1,3 ka 53% hosi totál montante billiaun $2,55 ne’ebé mak Parlamentu Nasionál (PN) aprova ona liuhosi Lei Orsamentu Jerál Estadu (OJE) Retifikativu 2022.

To’o iha 31 Outubru, taxa ezekusaun reál OJE Retifikativu 2022 ba Administrasaun Sentrál (inklui Fundu Kombatentes Libertasaun Nasionál, billiaun $1), ezekuta ona 38% ka billiaun $1,2 hosi totál orsamentu retifikativu billiaun $3,1.

Lee Mós: Introdusaun Impostu iha Proposta OJE 2023, Governu Hakarak Hasa’e Reseita Dométika

“Taxa ezekusaun reál OJE Retifikativu 2022 ba Administrasaun Sentrál (esklui Fundu Kombatentes Libertasaun Nasionál, billiaun $1), ezekuta ona 64% ka billiaun $1,2 hosi totál orsamentu retifikativu billiaun $2,1,” Hatutan.com sita komunikadu.

Bazeia ba kalendáriu elaborasaun OJE 2023 tuir espíritu Lei Enkuadramentu Orsamentál, ne’ebé mak sai baze ba Reforma Jestaun Finanseira Públikas, Parlamentu Nasionál sei inisia Debate Jeneralidade Proposta OJE 2023 iha semana oin.

𝗞𝗮𝗹𝗲𝗻𝗱𝗮́𝗿𝗶𝘂 𝗘𝗹𝗮𝗯𝗼𝗿𝗮𝘀𝗮𝘂𝗻 𝗢𝗝𝗘 𝟮𝟬𝟮𝟯 𝗯𝗮𝘇𝗲𝗶𝗮 𝗯𝗮 𝗟𝗲𝗶 𝗘𝗻𝗸𝘂𝗮𝗱𝗿𝗮𝗺𝗲𝗻𝘁𝘂 𝗢𝗿𝘀𝗮𝗺𝗲𝗻𝘁𝗮́𝗹

✅ 7-9 Novembru: Debate Jeneralidade Proposta Lei OJE 2023 iha Parlamentu Nasionál
✅ 18 Novembru: Votasaun Finál Globál Proposta Lei OJE 2023 iha Parlamentu Nasionál
✅️ 21 Novembru: Parlamentu Nasionál submete Diploma OJE 2023 ba Gabinete Prezidénsia Repúblika
✅ Dezembru: Prezidente Repúblika promulga Lei OJE 2023
✅ Dezembru: Publikasaun Lei OJE 2023 iha Jornal da Repúblika.

Jornalista: Elio dos Santos da Costa