Hatutan.com, (06 Novembru 2022), Díli— Prezidente Repúblika Timor Leste, José Ramos-Horta ho nia omólogu Prezidente Repúblika Portugál, Marcelo Rebelo de Sousa lansa livru intitlu “TIMOR Testamunhos de Quatro Anos de Presença de Forças Nacionais Destacadas Lusas Em Terras do Sol Nascente, 2000-2004”.

Prezidente Repúblika Timor Leste, José Ramos-Horta ho nia omólogu Prezidente Repúblika Portugál, Marcelo Rebelo de Sousa lansa livru intitlu “TIMOR Testamunhos de Quatro Anos de Presença de Forças Nacionais Destacadas Lusas Em Terras do Sol Nascente, 2000-2004”, iha Akademia Militár iha Amadora Distritu Lisboa (04/11/2022), hetan partisipasaun másimu hosi lideransa militár Portugués, korpu diplomátiku, eskritór importante sira no membru governu. Foto/Média PR.

Livru ne’e hakerek hosi eskritór koñesidu ne’ebé aprezenta direta hosi Embaixadór Fernando d’Oliveira Neves, koordena ho parte autoridade militár  hanesan, Tenente-General Xavier de Sousa, Coronel Miguel Pimenta no Tenente-Coronel Luís Pimenta.

Lee Mós: Ramos-Horta Konvida Emprezáriu Português Investe Iha TL

Livru ho pajina 700 liu ne’e hakerek kona-bá involvimentu direta hosi ezérsitu militár Portugés iha misaun manutensaun paz Orgnizasaun Nasoes Unidas (ONU) iha Timor-Leste no mós apoiu militár Portugés ba formasaun rekursu umanu no modernizasaun instituisaun FALINTIL-FDTL.

Prezidente Republika, José Ramos Horta konsidera livru ne’e importante, hodi hametin identidade kooperasaun forsa defeza Portugés no Timor-Leste nian.

“Livru ida ne’e importante tebes fó kontribuisaun ba istória Timor-Leste ba misaun ONU iha Timor-Leste,” Hatutan.com sita deklarasaun Prezidente Ramos-Horta iha komunikadu.

Xefe Estadu destaka apoiu ezérsitu hosi Portugál, Austrália, Nova Zelándia, Japaun, Koreia do Súl, Estadus Unidus Amérika, Itália no nasaun seluk tán involve iha misaun ONU, hodi ajuda dezenvolvimentu PNTL no F-FDTL iha periodu kritiku nia laran, hafoin violénsia hosi tinan 1999 no inísiu independénsia iha tinan 2022.

Ramos-Horta agradese ba prezensa Forsa Armada Portugál liu hosi dezisaun Primeiru Ministru, António Guterres no Prezidente, Jorge Sampaio, hodi apoia misaun ba pás, hodi tulun povu Timor-Leste iha situasaun difisíl durante priodu 1999 to’o 2004 hamutuk ho forsa nasaun seluk ne’ebé hola parte iha misaun ONU no mós ho INTERFET.

Prezidente Portugál, Marcelo Rebelo elojia perkursu luta ba libertasaun nasionál no mós dezempeñu ninia omólogu Ramos-Horta iha kontextu diplomátiku.

“Buat ne’ebé halo, la’ós de’it ba Portugál maibé mós ba komunidade internasionál, ba povu Timor hodi homenajea, korajem hosi povu Timor, hosi jerasaun ba jerasaun ne’ebé luta ba ninia afirmasaun independénsia iha mundu, luta kontra kontestu esternu, kontra kontestu jeoestratéjiku no saida mak liu, hanesan exemplu ida iha historia kontemporánea, tanba luta ba libertasaun nasionál alkansa duni, no tuir mai estabilizasaun politika no institusionalizasuan demokratika, iha difikuldade nia laran, maibé ne’e mos to’o susesu, dala ida tan ho Prezidente Ramos-Horta ninia Xefia to’o susesu,” Xefe Estadu Portugués haktuir.

Lansamentu livru ne’ebé hala’o iha Akademia Militár iha Amadora Distritu Lisboa (04/11/2022) ne’e,  hetan partisipasaun másimu hosi lideransa militár Portugués, korpu diplomátiku, eskritór importante sira no membru governu.

Jornalista: Vito Salvadór